ᠤᠯᠠᠮᠵᠢᠯᠠᠯᠲᠤ ᠮᠣᠩᠭᠤᠯ ᠪᠦᠭᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠤ ᠶᠣᠰᠣᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/1/8
       ᠪᠦᠭᠡ ᠪᠠᠷᠢᠯᠳᠤᠬᠤ ᠪᠣᠯ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠡᠷᠲᠡᠨ ᠠᠴᠠ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠤᠨ ᠲᠦᠷᠦᠭᠦᠦ ᠨᠠᠭᠠᠳᠤᠮ ᠶᠤᠮ᠃ ᠮᠣᠩᠭᠤᠯᠴᠤᠳ ᠣᠷᠣᠨ ᠨᠤᠲᠤᠭ᠂ ᠪᠠᠶᠢᠭᠠᠯᠢ ᠣᠷᠴᠢᠨ ᠠᠴᠠ ᠪᠣᠯᠵᠤ᠂ ᠡᠷᠲᠡ ᠢᠵᠠᠭᠤᠷ ᠠᠴᠠ ᠪᠠᠨ ᠮᠠᠯ ᠠᠵᠤ ᠠᠬᠤᠢ ᠪᠠᠷ ᠭᠤᠣᠯᠯᠠᠨ᠂ ᠠᠩ ᠬᠦᠷᠦᠭᠡ ᠬᠢᠬᠦ ᠪᠣᠯ ᠲᠡᠳᠠᠨᠤᠰ ᠤᠨ ᠡᠳᠦᠷ ᠲᠤᠳᠤᠮ ᠤᠨ ᠠᠮᠢᠳᠤᠷᠠᠯ ᠤᠨ ᠴᠢᠬᠤᠯᠠ ᠠᠭᠤᠯᠭ᠎ᠠ ᠪᠠ ᠬᠥᠳᠡᠯᠭᠡᠭᠡᠨ ᠪᠣᠯᠵᠤ ᠪᠠᠶᠢᠵᠠᠢ᠃ ᠡᠶᠢᠮᠦ ᠠᠴᠠ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠬᠥᠮᠥᠰ ᠤᠨ ᠪᠢᠷ᠎ᠠ ᠴᠢᠳᠠᠯ᠂ ᠬᠦᠴᠦᠨ ᠲᠡᠩᠬᠡᠭᠡ᠂ ᠠᠷᠭ᠎ᠠ ᠮᠡᠭᠡ ᠶᠢ ᠶᠡᠭᠡ ᠴᠢᠬᠤᠯᠴᠢᠯᠠᠨ ᠱᠠᠭᠠᠷᠳᠠᠳᠠᠭ ᠪᠣᠯᠤᠭᠰᠠᠨ ᠳᠤ ᠬᠥᠮᠥᠰ ᠥᠪᠡᠷ ᠤᠨ ᠬᠦᠴᠦᠨ ᠴᠢᠳᠠᠯ᠂ ᠠᠪᠬᠠᠯᠵᠢ ᠰᠠᠮᠪᠠᠭ᠎ᠠ ᠪᠠᠨ ᠳᠡᠭᠡᠭᠰᠢᠯᠡᠭᠦᠯᠦᠨ ᠰᠠᠶᠢᠵᠢᠷᠠᠭᠤᠯᠬᠤ ᠵᠣᠷᠢᠯᠭ᠎ᠠ ᠪᠠᠷ ᠪᠠᠷᠢᠯᠳᠤᠭᠠᠨ ᠳᠤ ᠤᠷᠤᠯᠴᠠᠵᠦ᠂ ᠪᠦᠭᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠤ ᠬᠥᠭᠵᠢᠯᠲᠡ ᠶᠢ ᠠᠬᠢᠭᠤᠯᠵᠤ ᠢᠷᠡᠵᠡᠢ᠃ 13 ᠳ᠋ᠤᠭᠠᠷ ᠵᠠᠭᠤᠨ ᠪᠤᠯᠬᠤ ᠳᠤ ᠮᠣᠩᠭᠤᠯ ᠣᠷᠣᠨ ᠤ ᠠᠳᠤᠭᠤ ᠮᠠᠯ ᠨᠡᠮᠡᠭᠳᠡᠵᠦ᠂ ᠨᠤᠲᠤᠭ ᠪᠡᠯᠴᠢᠭᠡᠷ ᠪᠤᠯᠢᠶᠠᠯᠳᠤᠬᠤ᠂ ᠮᠠᠯ ᠰᠦᠷᠦᠭ ᠢ ᠨᠢ ᠪᠤᠯᠢᠶᠠᠵᠤ᠂ ᠬᠠᠷᠢᠯᠴᠠᠨ ᠳᠣᠪᠲᠣᠯᠵᠤ᠂ ᠠᠷᠠᠳ ᠢᠷᠭᠡᠳ ᠢ ᠨᠢ ᠣᠯᠵᠠᠯᠠᠬᠤ ᠲᠠᠶᠢᠨ ᠡᠭᠦᠰᠦᠭᠰᠡᠨ ᠠᠴᠠ ᠬᠡᠲᠦ ᠬᠡᠳᠦᠨ ᠣᠪᠣᠭ ᠨᠡᠶᠢᠯᠡᠵᠦ  ᠠᠶᠢᠮᠠᠭ ᠤᠨ ᠬᠤᠯᠪᠤᠭ᠎ᠠ ᠪᠠᠶᠢᠭᠤᠯᠪᠠ᠃           ᠡᠲᠡᠭᠡᠷ ᠠᠶᠢᠮᠠᠭ ᠤᠨ ᠬᠤᠯᠪᠤᠭ᠎ᠠ ᠨᠢ ᠨᠤᠲᠤᠭ ᠤᠰᠤ᠂ ᠠᠷᠠᠳ ᠢᠷᠭᠡᠨ᠂ ᠠᠳᠤᠭᠤ ᠮᠠᠯ ᠢᠶᠠᠨ ᠬᠠᠮᠠᠭᠠᠯᠠᠬᠤ ᠪᠠᠷ ᠡᠷ᠎ᠡ ᠶᠢᠨ ᠰᠠᠶᠢᠨ ᠢ ᠰᠣᠩᠭᠤᠨ ᠬᠦᠴᠦ ᠴᠢᠳᠠᠯ ᠢ ᠰᠤᠷᠬᠤ ᠰᠣᠷᠢᠯᠲᠠ ᠨᠠᠭᠠᠳᠤᠮ ᠢ ᠡᠷᠬᠢᠯᠡᠵᠦ᠂ ᠮᠣᠩᠭᠤᠯ ᠤᠨ ᠨᠡᠶᠢᠭᠡᠮ ᠤᠨ ᠪᠦᠭᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠢ ᠤᠯᠠᠮ ᠴᠢᠨᠠᠭᠰᠢᠳᠠ ᠠᠬᠢᠭᠤᠯᠤᠨ ᠬᠥᠭᠵᠢᠭᠦᠯᠵᠡᠢ᠂ ᠮᠣᠩᠭᠤᠯ ᠪᠦᠭᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠤ ᠶᠣᠰᠣᠨ ᠳᠤ ᠪᠦᠭᠡ ᠣᠨᠣᠭᠠᠬᠤ᠂ ᠪᠦᠭᠡ ᠵᠣᠳᠣᠭᠯᠠᠬᠤ᠂ ᠪᠦᠭᠡ ᠴᠣᠯᠠᠯᠠᠬᠤ᠂ ᠪᠦᠭᠡ ᠲᠠᠯᠪᠢᠬᠤ᠂ ᠳᠡᠪᠢᠬᠦ ᠪᠤᠶᠤ ᠮᠠᠭᠰᠢᠬᠤ ᠂ ᠦᠷᠦᠬᠦ᠂ ᠪᠠᠷᠢᠵᠡ ᠠᠪᠬᠤ᠂ ᠪᠠᠷᠢᠯᠳᠤᠵᠤ ᠳᠠᠪᠠᠭᠤ᠂ ᠲᠠᠬᠢᠮ ᠠᠪᠬᠤ᠂ ᠲᠤᠭ ᠲᠣᠭᠤᠷᠢᠬᠤ᠂ ᠣᠷᠣᠬᠤ᠂ ᠡᠮᠦᠰᠬᠡᠯ ᠲᠠᠶᠢᠯᠬᠤ᠂ ᠱᠠᠩᠨᠠᠬᠤ ᠮᠡᠲᠦ ᠶᠢᠨ ᠠᠭᠤᠯᠭ᠎ᠠ ᠪᠠᠶᠢᠳᠠᠭ ᠪᠥᠭᠡᠳ ᠡᠲᠡᠭᠡᠷ ᠶᠣᠰᠣ ᠨᠢ ᠴᠠᠭ ᠦᠶ᠎ᠡ ᠪᠠ ᠭᠠᠵᠠᠷ ᠣᠷᠣᠨ ᠤ ᠢᠯᠭᠠᠭ᠎ᠠ ᠲᠠᠢ ᠪᠠᠶᠢᠳᠠᠭ᠃ ᠥᠪᠥᠷ ᠮᠣᠩᠭᠤᠯ ᠤᠨ ᠡᠷᠲᠡᠨ ᠤ ᠪᠦᠬᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠤ ᠪᠦᠲᠦᠴᠡ ᠳᠤ ᠪᠦᠬᠡ ᠣᠨᠣᠭᠠᠬᠤ᠂ ᠨᠠᠶᠢᠷ ᠰᠡᠷᠭᠦᠭᠡᠬᠦ᠂ ᠪᠦᠭᠡ ᠲᠠᠯᠪᠢᠬᠤ ︵ᠪᠦᠭᠡ ᠭᠠᠷᠭᠠᠬᠤ᠂ ᠬᠠᠯᠬ᠎ᠠ ᠳᠤ ᠭᠠᠷᠤᠯᠲᠠ ᠭᠡᠲᠡᠭ︶᠂ ᠪᠦᠬᠡ ᠶᠢᠨ ᠳᠡᠪᠢᠯᠲᠡ ᠪᠤᠶᠤ ᠮᠠᠭᠰᠢᠯᠲᠠ᠂ ᠪᠠᠷᠢᠯᠳᠤᠬᠤ᠂ ᠪᠦᠬᠡ ᠪᠠᠭᠤᠬᠤ ︵ᠲᠠᠯᠠᠪᠤᠷ ᠠᠴᠠ ᠪᠠᠭᠤᠬᠤ᠂ ᠬᠠᠯᠬ᠎ᠠ ᠳᠤ ᠦᠷᠦᠯᠲᠡ ᠬᠡᠲᠡᠭ︶᠂ ᠱᠠᠩᠨᠠᠬᠤ ᠵᠡᠷᠭᠡ ᠶᠣᠰᠣᠨ ᠪᠠᠶᠢᠳᠠᠭ᠃           ᠪᠦᠬᠡ ᠣᠨᠣᠭᠠᠬᠤ᠃ ᠡᠷᠲᠡ ᠢᠵᠠᠭᠤᠷ ᠲᠤ ᠪᠠᠷᠢᠯᠳᠤᠭᠠᠨ ᠳᠤ ᠣᠷᠤᠯᠴᠠᠬᠤ ᠪᠦᠭᠡ ᠶᠢᠨ ᠲᠤᠭ᠎ᠠ 64 ᠠᠴᠠ 1024 ᠬᠦᠷᠲᠡᠯᠡᠬᠢ 2 ᠤᠨ ᠵᠡᠷᠭᠡᠲᠦ ᠲᠤᠭ᠎ᠠ ᠶᠢ ᠦᠨᠳᠦᠰᠦᠯᠡᠵᠦ᠂ ᠲᠡᠩᠴᠡᠭᠦᠦ ᠪᠠᠷ ᠬᠤᠶᠠᠷ ᠲᠡᠰᠢ ᠬᠤᠪᠢᠶᠠᠨ ᠶᠡᠬᠡᠴᠦᠳ ᠤᠨ ᠠᠰᠠᠷ ᠪᠤᠶᠤ ᠮᠠᠶᠢᠬᠠᠨ ᠤ ᠬᠤᠶᠠᠷ ᠲᠠᠯ᠎ᠠ ᠳᠤ ᠵᠢᠭᠦᠷᠯᠡᠨ ᠵᠢᠭᠰᠠᠭᠠᠳᠠᠭ᠃ ᠭᠡᠬᠦ ᠳᠡᠭᠡᠨ ᠲᠠᠯ᠎ᠠ ᠪᠦᠷᠢ  ᠶᠢᠨ ᠳᠡᠭᠡᠳᠦ ᠲᠠᠯ᠎ᠠ ᠳᠤ ᠨᠡᠷ᠎ᠡ ᠲᠦᠷᠦ ᠰᠠᠶᠢᠨ ᠪᠦᠭᠡ ︵ᠢᠳᠡᠰᠢ ᠠᠪᠬᠤ ᠪᠦᠭᠡ᠂ ᠬᠠᠯᠬ᠎ᠠ ᠳᠤ ᠪᠤᠰᠬᠠᠯᠲᠠ ᠭᠡᠲᠡᠭ︶  ᠶᠢ ᠥᠩᠭᠡᠷᠡᠭᠰᠡᠨ ᠵᠢᠯ ᠤᠳ ᠤᠨ ᠬᠢᠷᠢ ᠪᠦᠲᠦᠮᠵᠢ ᠶᠢᠨ ᠡᠷᠡᠮᠪᠡ ᠪᠠᠷ ᠲᠣᠬᠢᠷᠠᠭᠤᠯᠵᠤ᠂ ᠳᠣᠣᠷᠠᠳᠤ ᠲᠠᠯ᠎ᠠ ᠳᠤ ᠲᠦᠷᠪᠡᠨ ᠰᠢᠨ᠎ᠡ ᠪᠦᠭᠡ ᠪᠤᠶᠤ ᠪᠠᠷᠢᠯᠳᠤᠭᠠᠨ ᠳᠠᠭᠠᠨ ᠪᠠᠷᠤᠭᠲᠠᠢ ᠲᠦᠷᠪᠡᠨ ᠪᠦᠭᠡ ︵ᠢᠳᠡᠰᠢᠨ ᠳᠤ ᠣᠴᠢᠬᠤ ᠪᠦᠭᠡ︶  ᠶᠢ ᠲᠣᠬᠢᠷᠠᠭᠤᠯᠵᠤ᠂ ᠪᠤᠰᠤᠳ ᠢ ᠨᠢ ᠪᠠᠷᠢᠯᠳᠤᠬᠤ ᠰᠠᠶᠢᠨ ᠮᠠᠭᠤ ᠪᠠᠷ ᠲᠡᠰ ᠳᠠᠷᠠᠭᠠᠯᠠᠨ ᠵᠢᠭᠰᠠᠭᠠᠵᠤ ᠣᠨᠣᠭᠠᠳᠠᠭ᠃           ᠨᠠᠶᠢᠷ ᠰᠡᠷᠭᠦᠭᠡᠬᠦ᠃ ᠡᠷᠲᠡ ᠳᠤ ᠪᠠᠷᠢᠯᠳᠤᠭᠠᠨ ᠡᠬᠢᠯᠡᠬᠦ ᠠᠴᠠ ᠡᠮᠦᠨ᠎ᠡ ᠨᠡᠷ᠎ᠡ ᠲᠦᠷᠦ ᠲᠠᠢ ᠲᠠᠷᠬᠠᠯᠠᠭᠳᠠᠭᠰᠡᠨ ᠪᠦᠭᠡ ᠶᠢ ᠲᠠᠯᠠᠪᠤᠷ ᠲᠤ ᠤᠷᠢᠵᠤ᠂ ᠬᠡᠢ ᠲᠠᠪᠢᠭᠦᠯᠦᠨ ᠶᠣᠰᠣᠯᠠᠭᠤᠯᠤᠭᠠᠳ ᠱᠠᠩ ᠬᠡᠰᠢᠭ ᠭᠠᠷᠳᠠᠭᠤᠯᠤᠨ ᠨᠠᠶᠢᠷ ᠰᠡᠷᠭᠦᠭᠡᠬᠦ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠠᠢ᠃           ᠪᠦᠭᠡ ᠲᠠᠯᠪᠢᠬᠤ᠃ ᠡᠭᠦᠨ ᠢ ᠪᠠᠰᠠ ᠪᠦᠭᠡ ᠭᠠᠷᠭᠠᠬᠤ ᠬᠡᠲᠡᠭ᠃ ᠪᠦᠭᠡ ᠲᠠᠯᠪᠢᠬᠤ ᠠᠴᠠ ᠡᠮᠦᠨ᠎ᠡ ᠪᠦᠭᠡ ᠵᠠᠰᠠᠭᠴᠢ ᠶᠢᠨ ᠠᠵᠢᠯ ᠪᠠ ᠪᠦᠭᠡ ᠵᠣᠳᠣᠭᠯᠠᠬᠤ ᠶᠪᠤᠳᠠᠯ ᠪᠤᠢ᠃ ᠡᠭᠦᠨ ᠳᠤ ᠪᠦᠭᠡ ᠵᠠᠰᠠᠭᠴᠢ ᠶᠢᠨ ᠠᠵᠢᠯ ᠲᠤᠩ ᠴᠢᠬᠤᠯᠠ ᠪᠠᠶᠢᠳᠠᠭ᠃ ᠪᠦᠭᠡ ᠵᠠᠰᠠᠭᠴᠢ ᠪᠣᠯ ᠨᠠᠶᠢᠷ ᠤᠨ ᠪᠦᠭᠡ ᠶᠢᠨ ᠨᠤᠭᠤᠯᠤᠭ᠎ᠠ ᠪᠠᠷᠢᠯᠳᠤᠭᠠᠨ ᠢ ᠵᠣᠬᠢᠶᠠᠨ ᠪᠠᠶᠢᠭᠤᠯᠤᠭᠴᠢ ᠪᠤᠯᠬᠤ ᠪᠥᠭᠡᠳ ᠵᠠᠷᠢᠮ ᠨᠢ ᠪᠦᠭᠡ ᠶᠢᠨ ᠬᠢᠨᠠᠭᠴᠢ ᠶᠢᠨ ᠠᠵᠢᠯ ᠢ ᠬᠠᠪᠰᠤᠷᠭᠠᠨ ᠭᠦᠢᠴᠡᠳᠬᠡᠳᠡᠭ᠃ ᠪᠦᠭᠡ ᠵᠠᠰᠠᠭᠴᠢ ᠶᠢᠨ ᠠᠵᠢᠯ ᠤᠨ ᠰᠠᠶᠢᠨ ᠮᠠᠭᠤ ᠨᠢ ᠨᠠᠶᠢᠷ ᠤᠨ ᠪᠠᠷᠢᠯᠳᠤᠭᠠᠨ ᠤ ᠠᠮᠵᠢᠯᠲᠠ ᠲᠠᠢ ᠶᠠᠪᠤᠭᠳᠠᠬᠤ ᠶᠢ ᠰᠢᠭᠤᠳ ᠨᠥᠯᠥᠭᠡᠯᠡᠳᠡᠭ᠃ ᠡᠶᠢᠮᠦ ᠠᠴᠠ ᠵᠡᠭᠦᠨ ᠪᠠᠷᠠᠭᠤᠨ ᠬᠤᠶᠠᠷ ᠲᠠᠯ᠎ᠠ ᠳᠤ ᠲᠤᠰ ᠲᠤᠰ ᠭᠡᠲᠦ ᠬᠡᠳᠦᠨ ᠪᠦᠭᠡ ᠵᠠᠰᠠᠭᠴᠢ ᠪᠠᠶᠢᠳᠠᠭ᠃ ᠪᠦᠭᠡ ᠵᠠᠰᠠᠭᠴᠢ ᠶᠢᠨ ᠪᠠᠰᠠ ᠨᠢᠭᠡ ᠴᠢᠬᠤᠯᠠ ᠡᠭᠦᠷᠭᠡ ᠪᠣᠯ ᠨᠦᠭᠦᠭᠡ ᠲᠠᠯ᠎ᠠ ᠶᠢᠨ ᠪᠥᠬᠡᠴᠦᠳ  ᠤᠨ ᠪᠠᠶᠢᠳᠠᠯ ᠢ ᠰᠠᠶᠢᠲᠤᠷ ᠣᠶᠢᠯᠠᠭᠠᠭᠰᠠᠨ ᠰᠠᠭᠤᠷᠢᠨ ᠳᠡᠭᠡᠷ᠎ᠡ ᠥᠪᠡᠷ ᠤᠨ ᠲᠠᠯ᠎ᠠ ᠶᠢᠨ ᠪᠥᠬᠡᠴᠦᠳ ᠤᠨ ᠢᠶᠠᠨ ᠪᠠᠶᠢᠳᠠᠯ ᠢ ᠦᠨᠳᠦᠰᠦᠯᠡᠵᠦ᠂ ᠨᠦᠬᠦᠭᠡ ᠭᠠᠷ ᠤᠨ ᠪᠥᠬᠡᠴᠦᠳ ᠢ ᠬᠠᠶᠠᠵᠤ ᠲᠠᠶᠢᠯᠭᠦ ᠪᠠᠷ ᠵᠠᠰᠠᠵᠤ ᠲᠣᠬᠢᠷᠠᠭᠤᠯᠳᠠᠭ᠃ ᠭᠡᠬᠦ ᠳᠡᠭᠡᠨ ᠪᠦᠭᠡ ᠶᠢᠨ ᠭᠠᠢ ᠶᠢ ᠵᠠᠪᠠᠯ ᠰᠠᠶᠢᠲᠤᠷ ᠬᠡᠷᠡᠭᠯᠡᠵᠦ ᠴᠢᠳᠠᠬᠤ ᠬᠡᠷᠡᠭᠲᠡᠢ᠃ ᠪᠦᠭᠡ ᠶᠢᠨ ᠭᠠᠢ ᠭᠡᠲᠡᠭ ᠨᠢ ᠪᠠᠷᠢᠯᠳᠤᠭᠠᠨ ᠳᠤ ᠬᠢᠯᠪᠠᠷᠬᠠᠨ ᠣᠶᠢᠴᠢᠳᠠᠭ ᠦᠭᠡᠢ ᠮᠥᠷᠲᠡᠭᠡᠨ ᠡᠪ ᠲᠠᠭᠠᠷᠠᠪᠡᠯ ᠪᠠᠰᠠ ᠨᠡᠯᠢᠶᠡᠳ ᠨᠡᠷ᠎ᠡ ᠲᠦᠷᠦ ᠲᠠᠢ ᠪᠦᠭᠡ ᠶᠢ ᠭᠡᠨᠡᠳᠡᠭᠦᠯᠦᠨ ᠬᠠᠶᠠᠴᠢᠬᠠᠳᠠᠭ ᠪᠦᠭᠡ ᠶᠢ ᠬᠡᠯᠡᠨ᠎ᠡ᠃ ᠭᠡᠪᠡᠴᠦ ᠡᠶᠢᠮᠦ ᠪᠦᠭᠡ ᠣᠯᠠᠩᠬᠢ ᠳᠠᠭᠠᠨ ᠨᠠᠶᠢᠷ ᠨᠠᠭᠠᠳᠤᠮ ᠳᠤ ᠳᠡᠭᠡᠷ᠎ᠡ ᠦᠯᠡᠳᠡᠳᠡᠭ ᠦᠭᠡᠢ ᠪᠣᠯᠬᠤᠷ ᠪᠦᠭᠡ ᠵᠠᠰᠠᠭᠴᠢ ᠨᠦᠭᠦᠭᠡ ᠭᠠᠷ ᠤᠨ ᠰᠢᠯᠢᠳᠡᠭ ᠪᠦᠭᠡ ᠳᠤ ᠵᠣᠷᠢᠭᠤᠳᠠ ᠪᠦᠭᠡ ᠶᠢᠨ ᠭᠠᠢ ᠶᠢ ᠲᠠᠭᠠᠷᠠᠭᠤᠯᠵᠦ᠂ ᠤᠴᠠᠷᠠᠭ᠎ᠠ ᠪᠠᠨ ᠬᠠᠶᠠᠵᠤ ᠲᠠᠶᠢᠯᠬᠦ ᠦᠭᠡᠢ ᠪᠤᠯᠪᠠᠴᠦ ᠤᠳᠠᠲᠠᠯ᠎ᠠ ᠵᠢᠭᠤᠷᠠᠯᠳᠤᠨ ᠨᠣᠴᠣᠯᠳᠤᠭᠤᠯᠵᠤ ᠬᠦᠴᠦ ᠲᠡᠩᠬᠡᠭᠡ ᠶᠢ ᠨᠢ ᠮᠣᠬᠤᠭᠤᠭᠠᠳ ᠲᠠᠷᠠᠭᠠᠴᠢ ᠶᠢᠨ ᠨᠤᠭᠤᠯᠤᠭᠠᠨ ᠳᠤ ᠤᠴᠠᠷᠠᠬᠤ ᠪᠦᠭᠡ ᠳᠡᠭᠡᠨ ᠰᠠᠭᠤᠷᠢ ᠲᠠᠯᠪᠢᠵᠤ ᠦᠭᠲᠡᠭ᠃           ᠪᠦᠭᠡ ᠵᠣᠳᠣᠭᠯᠠᠬᠤ᠃ ᠳᠡᠭᠡᠭᠦᠷ ᠵᠣᠭᠰᠣᠯᠲᠠ ᠲᠠᠢ ᠰᠠᠶᠢᠨ ᠪᠦᠭᠡ ᠶᠢᠨ ᠭᠠᠷᠤᠭ᠎ᠠ ᠳᠤ ᠲᠤᠰᠬᠠᠢ ᠶᠣᠰᠣ ᠳᠦᠷᠢᠮ ᠲᠠᠢ ᠪᠠᠶᠢᠳᠠᠭ᠃ ᠲᠡᠳᠡ ᠥᠮᠥᠳᠦ ᠲᠤᠬᠤᠤ ᠪᠠᠨ ᠡᠮᠦᠰᠴᠦ᠂ ᠴᠢᠬᠢᠭᠡ ᠪᠠᠨ ᠲᠦᠷᠡᠢ ᠳᠤ ᠪᠠᠨ ᠴᠢᠬᠢᠵᠦ᠂ ᠭᠤᠳᠤᠯ ᠢᠶᠠᠨ ᠬᠦᠯᠢᠵᠦ ᠪᠣᠭᠤᠭᠠᠳ ᠲᠡᠪᠡᠯ ᠢᠶᠠᠨ ᠨᠥᠮᠥᠷᠴᠦ᠂ ᠵᠣᠳᠤᠭ ᠢᠶᠠᠨ ᠡᠪᠦᠷ ᠳᠡᠭᠡᠷ᠎ᠡ ᠪᠠᠨ ᠲᠠᠯᠪᠢᠵᠤ᠂ ᠤᠨᠤᠭ᠎ᠠ ᠪᠠᠨ ᠬᠦᠯᠢᠶᠡᠵᠦ ᠰᠠᠭᠤᠳᠠᠭ᠃ ᠪᠦᠭᠡ ᠵᠠᠰᠠᠭᠴᠢ ᠠᠴᠠ ᠤᠨᠤᠭ᠎ᠠ ᠶᠢᠨ ᠲᠡᠰ ᠳᠠᠷᠠᠭᠠᠯᠠᠯ ᠢ ᠤᠩᠰᠢᠵᠤ᠂ ᠬᠡᠨ  ᠤ ᠭᠠᠷᠤᠭ᠎ᠠ ᠪᠣᠯᠣᠮᠠᠭᠴᠠ ᠬᠡᠨ ᠵᠣᠳᠤᠭ ᠢᠶᠠᠨ ᠠᠪᠴᠤ ᠪᠣᠰᠣᠨ ᠵᠣᠭᠰᠣᠭᠠᠳ ᠤᠷᠤᠭᠰᠢ ᠭᠡᠲᠦ ᠠᠯᠬᠤᠬᠤ ᠵᠠᠭᠤᠷ᠎ᠠ  ᠪᠠᠨ ᠵᠣᠳᠤᠭ ᠤᠨ ᠢᠶᠠᠨ ᠬᠤᠶᠠᠷ ᠬᠠᠨᠴᠤᠢ ᠶᠢ ᠭᠠᠳᠠᠭᠰᠢ ᠬᠠᠨᠳᠤᠭᠤᠯᠤᠨ ᠳᠡᠭᠡᠭᠰᠢ ᠬᠦᠴᠦᠲᠡᠢ ᠲᠠᠯᠠᠨ ᠬᠤᠶᠠᠷ ᠡᠪᠦᠳᠦᠭ ᠢᠶᠠᠨ ᠨᠢᠭᠡ ᠨᠢᠭᠡ ᠪᠠᠷ ᠡᠭᠡᠯᠵᠢᠯᠡᠨ ᠬᠦᠴᠦᠲᠡᠶᠢᠬᠡᠨ ᠰᠢᠪᠬᠠᠳᠠᠭᠠᠳ ᠪᠠᠷᠢᠭ᠍ᠰᠡᠨ ᠬᠡᠪ ᠢᠶᠠᠷ ᠢᠶᠠᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢᠶᠠᠨ ᠡᠷᠭᠦᠵᠦ ᠵᠣᠳᠣᠭᠯᠠᠳᠠᠭ᠃ ᠵᠣᠳᠣᠭᠯᠠᠭᠰᠠᠨ ᠪᠦᠭᠡ ᠪᠦᠰᠡ᠂ ᠲᠡᠪᠡᠯ ᠢᠶᠠᠨ ᠠᠬᠠᠮᠠᠳ ᠪᠦᠭᠡ᠂ ᠳᠣᠲᠣᠨᠣ ᠬᠥᠮᠥᠨ ᠳᠡᠭᠡᠨ ᠲᠤᠰᠢᠶᠠᠨ ᠦᠭᠲᠡᠭ᠃ ᠪᠦᠭᠡ ᠵᠠᠰᠠᠭᠴᠢ ᠠᠴᠠ ︽ᠪᠦᠭᠡ ᠪᠠᠨ ᠲᠠᠯᠪᠢᠭᠲᠤᠨ︕︾ ᠭᠡᠵᠦ ᠵᠠᠷᠯᠠᠮᠠᠭᠴᠠ ᠠᠷᠤ ᠲᠠᠯ᠎ᠠ ᠠᠴᠠ ᠪᠦᠭᠡ ᠳᠤ ᠠᠪᠢᠶᠠᠰᠤᠲᠠᠢ ᠪᠥᠭᠡᠳ ᠪᠠᠭᠰᠢᠯᠠᠬᠤ ᠮᠠᠶ᠋ᠢᠭ ᠤᠨ ᠬᠤᠶᠠᠷ ᠬᠥᠮᠥᠨ ᠢᠳᠡᠪᠬᠢᠲᠡᠢ ᠭᠠᠷᠴᠤ ᠢᠷᠡᠭᠡᠳ ᠭᠠᠷᠬᠤ ᠪᠦᠭᠡ ᠶᠢᠨ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠲᠤᠯᠭᠠᠭᠤᠷᠢ ᠪᠣᠯᠣᠨ ᠵᠤᠭᠰᠤᠬᠤ ᠳᠤ ᠭᠠᠷᠬᠤ ᠪᠦᠭᠡ ᠬᠤᠶᠠᠷ ᠭᠠᠷ ᠢᠶᠠᠷ ᠢᠶᠠᠨ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠬᠥᠮᠥᠨ ᠤ ᠮᠥᠷᠥ ᠳᠡᠭᠡᠷ᠎ᠡ ᠲᠠᠯᠪᠢᠨ᠎ᠠ᠃ ᠡᠨᠡ ᠦᠶ᠎ᠡ ᠳᠤ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠬᠥᠮᠥᠨ ᠨᠦᠬᠦᠭᠡ ᠡᠲᠡᠭᠡᠳ ᠠᠴᠠ ᠭᠠᠷᠬᠤ ᠪᠦᠭᠡ ᠶᠢᠨ ᠪᠠᠶᠢᠳᠠᠯ ᠢ ᠲᠠᠨᠢᠯᠴᠠᠭᠤᠯᠬᠤ ᠶᠢᠨ ᠬᠠᠮᠲᠤ ᠪᠠᠷᠢᠯᠳᠤᠬᠤ ᠠᠷᠭ᠎ᠠ ᠮᠡᠭᠡ ᠶᠢ ᠵᠢᠭᠠᠨ ᠰᠤᠷᠭᠠᠳᠠᠭ᠃ ︽ᠪᠦᠭᠡ ᠪᠠᠨ ᠲᠠᠯᠪᠢ᠂ ᠲᠠᠯᠪᠢ᠂ ᠲᠠᠯᠪᠢ︕︾ ᠭᠡᠬᠦ ᠤᠷᠢᠶ᠎ᠠ ᠲᠠᠭᠤᠨ ᠭᠠᠷᠤᠩᠭᠤᠲᠠ ᠭᠠᠷᠬᠤ ᠭᠡᠵᠦ ᠲᠡᠰᠴᠦ ᠶᠠᠳᠠᠨ ᠭᠥᠯᠢᠶᠡᠨ ᠪᠠᠶᠢᠭ᠎ᠠ ᠪᠦᠭᠡ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠬᠥᠮᠥᠨ ᠤ ᠮᠥᠷᠥ ᠶᠢ ᠲᠤᠯᠵᠤ᠂ ᠣᠷᠣᠨ ᠳᠠᠭᠠᠨ ᠭᠤᠷᠪᠠᠨᠲᠠ ᠦᠰᠦᠷᠴᠦ ᠬᠦᠴᠦᠯᠡᠨ ᠳᠡᠪᠰᠡᠭᠡᠳ ᠬᠤᠷᠢᠭᠤᠯ ᠠᠴᠠ ᠭᠠᠷᠤᠭᠰᠠᠨ ᠠᠷᠰᠯᠠᠨ ᠪᠠᠷᠰ ᠰᠢᠭ ᠮᠠᠭᠰᠢᠬᠤ ᠪᠤᠶᠤ ᠬᠠᠷᠴᠠᠭᠠᠢ ᠪᠦᠷᠭᠦᠳ ᠮᠡᠲᠦ ᠲᠠᠪᠢᠵᠦ ᠭᠠᠷᠲᠠᠭ᠃           ᠲᠠᠪᠢᠵᠦ ᠮᠠᠭᠰᠢᠬᠤ᠃ ᠪᠥᠬᠡᠴᠦᠳ ᠪᠠᠷᠢᠯᠳᠤᠬᠤ ᠳᠤ ᠲᠠᠯᠠᠪᠤᠷ ᠲᠤ ᠭᠠᠷᠬᠤ ᠪᠠ ᠪᠠᠷᠢᠯᠳᠤᠭᠠᠨ ᠲᠡᠭᠦᠰᠴᠦ ᠲᠠᠯᠠᠪᠤᠷ ᠠᠴᠠ ᠪᠠᠭᠤᠬᠤ ᠳᠠᠭᠠᠨ ᠴᠥᠮ ᠲᠡᠪᠢᠵᠦ ᠮᠠᠭᠰᠢᠳᠠᠭ᠃ ᠲᠡᠪᠢᠵᠦ ᠮᠠᠭᠰᠢᠬᠤ ᠨᠢ ᠪᠥᠬᠡᠴᠦᠳ ᠰᠦᠷ ᠵᠢᠪᠬᠤᠭ᠎ᠠ᠂ ᠬᠦᠴᠦᠨ ᠴᠢᠳᠠᠯ ᠢᠶᠠᠨ ᠭᠠᠶᠢᠬᠠᠭᠤᠯᠤᠨ ᠤᠴᠠᠷᠠᠭ᠎ᠠ ᠪᠠᠨ ᠰᠦᠷᠳᠡᠭᠦᠯᠬᠦ ᠶᠢᠨ ᠬᠠᠮᠲᠤ ᠴᠢᠯᠡᠭᠡ ᠪᠠᠨ ᠭᠠᠷᠭᠠᠵᠤ᠂ ᠪᠡᠶ᠎ᠡ ᠪᠠᠨ ᠬᠠᠮᠠᠭᠠᠯᠠᠬᠤ ᠦᠢᠯᠡᠳᠦᠯ ᠲᠠᠢ ᠪᠠᠶᠢᠳᠠᠭ᠃ ᠲᠠᠯᠠᠪᠤᠷ ᠲᠤ ᠭᠠᠷᠤᠭᠰᠠᠨ ᠪᠦᠭᠡ ᠥᠪᠡᠷ ᠤᠨ ᠰᠤᠷᠤᠭᠰᠡᠨ ᠳᠡᠪᠢᠯᠲᠡ ᠪᠠᠷ ᠢᠶᠠᠨ ᠲᠡᠪᠢᠵᠦ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠪᠠᠷᠢᠯᠳᠤᠬᠤ ᠲᠠᠯᠠᠪᠤᠷ ᠲᠠᠭᠠᠨ ᠨᠠᠷᠡᠨ ᠡᠷᠭᠢᠯᠲᠡ  ᠪᠠᠷ ᠠᠭᠠᠵᠢᠮᠬᠠᠨ ᠭᠤᠷᠪᠠ ᠲᠣᠭᠤᠷᠢᠨ ᠡᠷᠭᠢᠭᠡᠳ ᠪᠠᠷᠠᠭᠤᠨ ᠭᠠᠷ ᠤᠨ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠳᠣᠯᠢᠶᠠᠵᠤ᠂ ᠠᠶᠤᠤᠯᠢᠬᠠᠢ ᠵᠢᠷᠦᠬᠡ ᠪᠠᠨ ᠢᠯᠪᠢᠵᠦ᠂ ᠬᠤᠶᠠᠷ ᠬᠥᠯ ᠤᠨ ᠭᠤᠳᠤᠯ ᠤᠨ ᠤᠯᠠ ᠪᠠᠨ ᠡᠭᠡᠯᠵᠢᠯᠡᠨ ᠢᠯᠪᠢᠳᠡᠭ᠃ ᠵᠠᠷᠢᠮ ᠰᠦᠰᠦᠭ ᠲᠠᠢ ᠪᠥᠬᠡᠴᠦᠳ ᠬᠤᠶᠠᠷ ᠭᠠᠷ ᠢᠶᠠᠨ ᠨᠠᠮᠠᠨᠴᠢᠯᠠᠨ ᠠᠭᠤᠯᠠ ᠣᠪᠣᠭᠠᠨ ᠤ ᠡᠵᠡᠳ ᠰᠠᠬᠢᠭᠤᠯᠰᠤᠨ ᠳᠤ ᠵᠠᠯᠪᠠᠷᠢᠵᠤ ᠠᠷᠭ᠎ᠠ ᠮᠡᠭᠡ᠂ ᠬᠦᠴᠦᠨ ᠴᠢᠳᠠᠯ ᠢᠪᠡᠭᠡᠬᠦ ᠶᠢ ᠳᠠᠭᠠᠳᠬᠠᠳᠠᠭ᠃ ᠵᠠᠷᠢᠮ ᠨᠢ ᠬᠤᠶᠠᠷ ᠭᠤᠶ᠎ᠠ ᠪᠠᠨ ᠬᠦᠴᠦᠲᠡᠢ ᠠᠯᠠᠭᠠᠳᠠᠬᠤ ᠴᠦ ᠪᠤᠢ᠃            ᠪᠠᠷᠢᠯᠳᠤᠬᠤ᠃ ᠪᠠᠷᠢᠯᠳᠤᠭᠠᠨ ᠤ ᠳᠦᠷᠢᠮ ᠢ ᠵᠥᠷᠢᠴᠡᠬᠦ ᠦᠭᠡᠢ ᠨᠥᠬᠦᠴᠡᠯ ᠳᠣᠣᠷ᠎ᠠ ᠬᠦᠴᠦᠨ ᠴᠢᠳᠠᠯ᠂ ᠤᠷ᠎ᠠ ᠮᠡᠭᠡ᠂ ᠠᠷᠭ᠎ᠠ ᠰᠠᠮᠪᠠᠭ᠎ᠠ ᠪᠠᠨ ᠭᠦᠢᠴᠡᠳ ᠠᠰᠢᠭᠯᠠᠵᠤ ᠤᠴᠠᠷᠠᠭ᠎ᠠ ᠪᠠᠨ ᠭᠠᠵᠠᠷᠳᠠᠭᠤᠯᠬᠤ ᠪᠠᠷ ᠬᠢᠳᠡᠭ ᠦᠢᠯᠡ ᠶᠢᠨ ᠶᠠᠪᠤᠴᠠ ᠶᠢ ᠪᠠᠷᠢᠯᠳᠤᠬᠤ ᠭᠡᠨ᠎ᠡ᠃ ᠪᠠᠷᠢᠯᠳᠤᠬᠤ ᠪᠣᠯ ᠪᠠᠷᠢᠯᠳᠤᠭᠠᠨ ᠤ ᠪᠦᠲᠦᠴᠡ ᠶᠢᠨ ᠭᠤᠣᠯ ᠱᠠᠲᠤ ᠪᠣᠯᠣᠨ᠎ᠠ᠃ ᠪᠠᠷᠢᠯᠳᠤᠵᠤ ᠪᠠᠶᠢᠭ᠎ᠠ ᠬᠤᠶᠠᠷ ᠪᠦᠭᠡ ᠶᠢᠨ ᠬᠠᠶᠠᠵᠤ ᠬᠠᠶᠠᠭᠳᠠᠬᠤ᠂ ᠲᠠᠶᠢᠯᠵᠦ ᠳᠡᠶᠢᠯᠦᠭᠳᠡᠬᠦ ᠨᠢ ᠡᠨᠡ ᠱᠠᠲᠤᠨ ᠳᠤ ᠢᠯᠭᠠᠷᠠᠳᠠᠭ᠃           ᠪᠦᠭᠡ ᠲᠠᠷᠬᠠᠯᠠᠬᠤ᠃ ᠥᠪᠥᠷ ᠮᠣᠩᠭᠤᠯ ᠳᠤ ᠤᠯᠠᠨ ᠵᠢᠯ ᠭᠠᠷᠮᠠᠭᠠᠢ ᠰᠠᠶᠢᠨ ᠪᠠᠷᠢᠯᠳᠤᠬᠤ ᠨᠡᠷ᠎ᠡ ᠠᠯᠲᠠᠷᠰᠢᠭ᠍ᠰᠡᠨ ᠪᠦᠭᠡ ᠨᠠᠰᠤᠨ ᠰᠡᠭᠦᠳᠡᠷ ᠥᠨᠳᠥᠷ ᠪᠣᠯᠵᠤ᠂ ᠪᠠᠷᠢᠯᠳᠤᠬᠤ ᠬᠦᠴᠦ ᠲᠡᠩᠬᠡᠭᠡ ᠬᠠᠷᠢᠵᠤ ᠪᠠᠭᠤᠷᠠᠬᠤ ᠦᠶ᠎ᠡ ᠳᠤ ᠡᠴᠦᠰ  ᠤᠨ ᠤᠳᠠᠭ᠎ᠠ ᠨᠠᠶᠢᠷ ᠨᠠᠭᠠᠳᠤᠮ ᠳᠤ ᠪᠠᠷᠢᠯᠳᠤᠭᠤᠯᠵᠤ᠂ ᠠᠶᠢᠮᠠᠭ ᠪᠤᠶᠤ ᠬᠤᠰᠢᠭᠤᠨ ᠵᠠᠰᠠᠭ ᠠᠴᠠ ᠲᠡᠭᠦᠨ ᠤ ᠤᠯᠠᠨ ᠵᠢᠯ ᠤᠨ ᠲᠤᠷᠰᠢ ᠬᠠᠷᠢᠯᠲᠠ ᠦᠭᠡᠢ ᠪᠠᠷᠢᠯᠳᠤᠭᠰᠠᠨ ᠬᠠᠴᠢᠨ ᠰᠣᠨᠢᠨ ᠪᠠᠶᠢᠳᠠᠯ ᠪᠠ ᠪᠦᠭᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠤ ᠬᠥᠭᠵᠢᠯᠲᠡ ᠳᠤ ᠦᠵᠡᠭᠦᠯᠦᠭᠰᠡᠨ ᠭᠠᠪᠢᠶ᠎ᠠ ᠵᠢᠳᠬᠦᠯ ᠢ ᠨᠢ ᠤᠯᠠᠨ ᠤ ᠡᠮᠦᠨ᠎ᠡ ᠮᠠᠭᠲᠠᠨ ᠰᠠᠶᠢᠰᠢᠶᠠᠵᠤ᠂ ︽ᠲᠠᠷᠬᠠᠨ ᠪᠦᠭᠡ︾ ᠭᠡᠵᠦ ᠴᠣᠯᠠᠯᠠᠬᠤ ᠶᠢᠨ ᠳᠠᠭᠠᠤ ᠬᠦᠨᠳᠦ ᠪᠠᠷ ᠱᠠᠩᠨᠠᠳᠠᠭ ᠂ ᠡᠭᠦᠨ ᠢ ᠪᠦᠭᠡ ᠲᠠᠷᠬᠠᠯᠠᠬᠤ ᠭᠡᠲᠡᠭ᠃ ᠲᠠᠷᠬᠠᠯᠠᠭᠳᠠᠭᠰᠡᠨ ᠪᠦᠭᠡ ᠲᠡᠷᠡ ᠳᠣᠣᠷ᠎ᠠ ᠪᠠᠨ ᠡᠮᠦᠰᠬᠡᠯ ᠢᠶᠠᠨ ᠲᠠᠶᠢᠯᠵᠦ᠂ ᠥᠪᠡᠷ ᠤᠨ ᠬᠦᠦ ᠪᠤᠶᠤ ᠲᠦᠷᠦᠯ᠂ ᠱᠠᠪᠢ᠂ ᠡᠰᠡᠬᠦᠯ᠎ᠡ ᠬᠠᠮᠤᠭ ᠤᠨ ᠲᠣᠭᠤᠭᠰᠠᠨ ᠢᠳᠡᠷ ᠵᠠᠯᠠᠭᠤ ᠪᠦᠭᠡ ᠳᠤ ︽ᠪᠦᠭᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠢ ᠨᠡᠩ ᠴᠢᠨᠠᠭᠰᠢᠳᠠ ᠬᠥᠭᠵᠢᠭᠦᠯᠵᠦ᠂ ᠤᠯᠠᠮ ᠰᠠᠶᠢᠨ ᠪᠠᠷᠢᠯᠳᠤᠬᠤ ᠪᠣᠯᠲᠤᠭᠠᠢ︕︾ ᠭᠡᠵᠦ ᠢᠷᠦᠭᠡᠭᠡᠳ ᠳᠤᠷᠠᠰᠬᠠᠯ ᠪᠣᠯᠭᠠᠨ ᠪᠡᠯᠭᠡᠯᠡᠬᠦ ᠳᠤ᠂ ᠭᠥᠯᠢᠶᠡᠨ ᠠᠪᠬᠤ ᠪᠦᠭᠡ ᠨᠢᠭᠡ ᠬᠥᠯ ᠳᠡᠭᠡᠷ᠎ᠡ ᠪᠠᠨ ᠴᠣᠮᠴᠣᠶᠢᠨ ᠰᠠᠭᠤᠵᠤ᠂ ᠬᠤᠶᠠᠷ ᠭᠠᠷ ᠢᠶᠠᠨ ᠲᠣᠯᠣᠭᠠᠢ ᠳᠡᠭᠡᠷ᠎ᠡ  ᠪᠠᠨ ᠡᠷᠭᠦᠨ ︽ᠢᠷᠦᠭᠡᠯ ᠰᠢᠩᠭᠡᠬᠦ ᠪᠣᠯᠲᠤᠭᠠᠢ︕︾ ᠭᠡᠵᠦ ᠭᠥᠯᠢᠶᠡᠨ ᠠᠪᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠳᠠᠭ᠃ ᠪᠦᠭᠡ ᠶᠢᠨ ᠪᠠᠷᠢᠯᠳᠤᠭᠠᠨ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠤᠯᠠᠮᠵᠢᠯᠠᠯᠲᠤ ᠨᠠᠭᠠᠳᠤᠮ ᠤᠨ ᠭᠤᠣᠯ ᠬᠡᠯᠪᠡᠷᠢ ᠪᠣᠯᠤᠭᠰᠠᠨ ᠤ ᠬᠤᠪᠢ ᠳᠤ᠂ ᠮᠣᠩᠭᠤᠯᠴᠤᠳ ᠤᠨ ᠤᠬᠠᠮᠰᠠᠷ ᠲᠠᠨᠢᠯᠲᠠ᠂ ᠦᠵᠡᠯ ᠰᠡᠳᠬᠢᠯᠭᠡ᠂ ᠭᠤᠸ᠎ᠠ ᠲᠠᠭᠠᠰᠢᠶᠠᠯ᠂ ᠵᠠᠩ ᠵᠠᠩᠰᠢᠯ ᠢ ᠤᠯᠠᠨ ᠲᠠᠯ᠎ᠠ ᠪᠠᠷ ᠲᠤᠰᠬᠠᠵᠤ᠂ ᠮᠣᠩᠭᠤᠯ ᠰᠣᠶᠣᠯ ᠤᠨ ᠬᠤᠷᠠᠮᠳᠤᠯ ᠲᠤᠨᠤᠳᠠᠰᠤ ᠶᠢᠨ ᠴᠢᠬᠤᠯᠠ ᠬᠡᠰᠡᠭ ᠪᠣᠯᠤᠭᠰᠠᠨ ᠪᠠᠶᠢᠨ᠎ᠠ᠃ 
ᠢᠷᠡᠯᠲᠡ᠄ ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠪᠡᠶ᠎ᠡ ᠶᠢᠨ ᠲᠠᠮᠢᠷ ᠤᠨ ᠲᠤᠪᠴᠢᠶ᠎ᠠ