ᠪᠤᠷᠬᠠᠨ ᠰᠡᠳᠭᠢᠯᠳᠤ ᠡᠵᠢ ᠮᠢᠨᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/16
                                 — ᠠᠴᠢᠳᠤ ᠪᠤᠭᠤᠷᠤᠯ ᠡᠵᠢ ᠪᠠᠨ ᠲᠤᠷᠠᠳᠬᠠᠪᠠ         ︽ᠨᠠᠮᠠᠭᠠᠨ ᠳᠠᠭᠠᠨ ᠲᠡᠶᠢᠯᠦᠭᠳᠡᠭᠰᠡᠨ ᠪᠤᠭᠤᠷᠤᠯ ᠬᠠᠶᠢᠯᠠᠰᠤ ᠰᠢᠭ᠋ ᠪᠦᠷᠳᠡᠶᠢᠵᠤ ᠪᠠᠷ᠎ᠠ ᠨᠢ ᠦᠭᠡᠶᠢᠯᠡᠭᠳᠡᠭᠡᠳ ᠪᠠᠶᠢᠬᠤ ᠶᠤᠮ᠂ ᠨᠠᠮᠤᠷ ᠤᠨ ᠨᠠᠮᠤᠷ ᠲᠠᠭᠠᠨ ᠭᠠᠩᠳᠠᠭᠰᠠᠨ ᠳᠠᠪᠡᠯ ᠨᠢ ᠪᠦᠭᠴᠦᠭᠡᠷ ᠨᠢᠷᠤᠭᠤᠨ ᠳᠤᠨᠢ ᠡᠯᠡᠭᠳᠡᠭᠡᠳ ᠯᠡ ᠪᠠᠶᠢᠨ᠎ᠠ ᠁︾᠂ ᠡᠨᠡ ᠲᠠᠭᠤᠤ ᠪᠤᠯ ᠮᠠᠨ ᠤ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠠᠯᠳᠠᠷᠳᠤ ᠳᠠᠭᠤᠴᠢᠨ ᠲᠡᠭᠷᠢ ᠶᠢᠨ ᠵᠤᠭᠢᠶᠠᠵᠤ ᠳᠠᠭᠤᠯᠠᠭᠰᠠᠨ ︽ᠪᠤᠷᠬᠠᠨ ᠰᠡᠳᠭᠢᠯᠳᠤ ᠡᠵᠢ ᠮᠢᠨᠢ︾ ᠭᠡᠬᠦ ᠰᠠᠶᠢᠬᠠᠨ ᠳᠠᠭᠤᠤ ᠶᠤᠮ᠃ ᠮᠦᠨ ᠴᠦ ᠮᠢᠨᠤ ᠬᠠᠮᠤᠭ ᠠᠴᠠ ᠳᠠᠭᠤᠯᠠᠬᠤ ᠲᠤᠷᠠᠳᠠᠢ᠂ ᠬᠠᠮᠤᠭ ᠠᠴᠠ ᠲᠤᠭᠤᠳᠠᠭ ᠮᠤᠩᠭᠤᠯ ᠲᠠᠭᠤᠤ ᠶᠢᠨ ᠨᠢᠭᠡ ᠨᠢ ᠶᠤᠮᠰᠠᠨ᠃         ᠬᠠᠶᠢᠷᠠᠳᠤ ᠡᠵᠢ ᠮᠢᠨᠢ ᠳᠠᠯᠠᠨ ᠨᠢᠭᠡᠨ ᠨᠠᠰᠤᠨ ᠳᠠᠭᠠᠨ ᠠᠮᠢᠳᠤᠷᠠᠯ ᠤᠨ ᠵᠠᠮ ᠢᠶᠠᠨ ᠡᠴᠤᠰᠯᠠᠵᠤ᠂ ᠤᠯᠠᠭᠠᠭᠴᠢᠨ ᠲᠠᠬᠢᠶ᠎ᠠ ᠵᠢᠯ ᠤᠨ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠲᠤᠯᠤᠭᠠᠨ ᠤ ᠬᠤᠯᠤᠭᠠᠨ᠎ᠠ ᠴᠠᠭ ᠲᠤ ᠠᠪᠤ ᠪᠢᠳᠡᠨ ᠢ ᠪᠠᠨ ᠤᠷᠬᠢᠭᠠᠳ ᠲᠡᠭᠷᠢ ᠳᠤ ᠬᠠᠯᠢᠴᠢᠬᠠᠯ᠎ᠠ᠃ ᠡᠪᠡᠳᠴᠢᠨ ᠡᠮᠬᠡᠭ ᠡᠵᠢ ᠶᠢ ᠮᠢᠨᠢ ᠲᠠᠷᠴᠢᠯᠠᠭᠠᠵᠤ᠂ ᠠᠷᠠᠰᠤ ᠶᠠᠰᠤ ᠪᠤᠯᠭᠠᠴᠢᠬᠠᠪᠠ᠃ ᠬᠡᠴᠡᠭᠦᠤ ᠡᠪᠡᠳᠴᠤ ᠰᠢᠨᠠᠯᠭᠠᠬᠤ ᠶᠢ ᠨᠢ ᠨᠡᠩ ᠪᠤᠤ ᠬᠡᠯᠡ︕ ᠠᠮᠢ ᠨᠠᠰᠤᠨ ᠤ ᠪᠠᠨ ᠡᠴᠤᠰ ᠤᠨ ᠬᠡᠳᠤᠨ ᠡᠳᠤᠷ ᠲᠤ ᠴᠦ ᠡᠵᠢ ᠮᠢᠨᠢ ᠶᠡᠭᠡ ᠪᠠᠷ ᠶᠤᠤᠯᠠᠵᠤ ᠲᠤᠤᠭᠠᠷᠤᠭᠰᠠᠨ ᠢ ᠤᠯᠵᠤ ᠰᠤᠨᠤᠰᠤᠭ᠎ᠠ ᠦᠭᠡᠢ᠃ ᠡᠵᠢ ᠮᠢᠨᠢ ᠨᠢᠭᠡ ᠪᠡᠶᠡᠨ ᠳᠤ ᠪᠠᠨ ᠦᠷᠦᠭᠡᠯ ᠪᠤᠰᠤᠳ ᠢ ᠵᠤᠪᠠᠭᠠᠭᠰᠠᠨ ᠦᠭᠡᠢ᠂ ᠦᠷ᠎ᠡ ᠭᠡᠤᠭᠡᠳ ᠢᠶᠠᠨ ᠨᠡᠩ ᠴᠦ ᠰᠠᠶᠢᠬᠠᠨ ᠬᠦᠮᠤᠵᠢᠬᠦᠯᠦᠨ ᠬᠦᠮᠤᠨ ᠤ ᠵᠡᠷᠭᠡ ᠳᠤ ᠬᠦᠷᠭᠡᠨ᠂ ᠬᠦᠮᠤᠨ ᠪᠤᠯᠬᠤ ᠶᠤᠰᠤ ᠶᠢ ᠵᠢᠭᠠᠵᠤ᠂ ᠬᠦᠰᠡᠯ ᠤᠨ ᠵᠢᠬᠦᠷ ᠤᠷᠭᠤᠭᠤᠯᠤᠭᠰᠠᠨ ᠠᠭᠤᠤ ᠮᠦᠷᠳᠡᠭᠡᠨ ᠡᠭᠡᠯ ᠪᠤᠷᠤᠭᠵᠢᠭᠤᠨ ᠬᠦᠮᠦᠨ ᠪᠢᠯᠡ︕         ᠡᠵᠢ ᠮᠢᠨᠢ ᠪᠤᠷᠬᠠᠨ ᠪᠤᠯᠳᠠᠯ᠎ᠠ ᠦᠪᠡᠷᠳᠡᠭᠡᠨ ᠲᠤᠭᠤᠭᠠᠳ ᠨᠢᠭᠡ ᠬᠤᠪᠴᠠᠰᠤ᠂ ᠨᠢᠭᠡ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠴᠦ ᠠᠪᠤᠭᠰᠠᠨ ᠦᠭᠡᠢ᠃ ᠡᠭᠡᠴᠢ ᠪᠢᠳᠡᠨ ᠶᠠᠮᠠᠷ ᠬᠤᠪᠴᠠᠰᠤ ᠠᠪᠤᠭᠠᠳ ᠦᠭᠪᠡᠯ ᠲᠡᠬᠦᠨ ᠢ ᠨᠢ ᠡᠮᠦᠰᠦᠭᠡᠳ ᠯᠠ ᠶᠠᠪᠤᠳᠠᠭ᠃ ᠤᠷᠠᠠ ᠤᠶᠤᠳᠠᠯᠴᠢᠨ ᠡᠵᠢ ᠮᠠᠨᠢ ᠦᠪᠡᠷ ᠤᠨ ᠪᠡᠶ᠎ᠠ ᠳᠡᠭᠡᠨ ᠭᠡᠵᠤ ᠭᠠᠳᠠᠷ ᠳᠡᠪᠡᠯ ᠤᠶᠤᠵᠤ ᠦᠵᠡᠭᠡ ᠦᠭᠡᠢ᠂ ᠤᠤᠵᠢ ᠯᠠ ᠤᠶᠤᠭᠰᠠᠨ ᠨᠢ ᠨᠠᠳᠠ ᠳᠤ ᠦᠨᠢᠳᠡ ᠶᠢᠨ ᠲᠤᠷᠠᠰᠬᠠᠯ ᠪᠤᠯᠪᠠ᠃         ᠬᠠᠶᠢᠷᠠᠳᠤ ᠡᠵᠢ ᠮᠢᠨᠢ ᠡ᠂ ᠦᠷ᠎ᠡ ᠨᠢ ᠪᠤᠯᠤᠭᠰᠠᠨ ᠪᠢᠳᠡ ᠲᠠᠨ ᠢ ᠪᠠᠨ ᠡᠬᠦᠷᠢᠳᠡ ᠲᠤᠷᠠᠰᠤᠨ ᠮᠦᠷᠦᠭᠡᠳᠴᠤ᠂ ᠡᠷᠭᠢᠬᠦ ᠲᠦᠷᠦᠯ ᠳᠡᠭᠡᠨ ᠨᠠᠩ ᠤᠷᠳᠤ ᠨᠠᠰᠤᠯᠠᠵᠤ ᠤᠳᠠᠭᠠᠨ ᠵᠢᠷᠭᠠᠰᠠᠢ ᠭᠡᠮᠡᠨ ᠵᠠᠯᠪᠠᠷᠢᠨ ᠵᠠᠯᠪᠠᠷᠢᠨ ᠰᠠᠭᠤᠨ᠎ᠠ︕ ᠡᠵᠢ ᠮᠢᠨᠢ ᠳ᠋ᠧᠪᠠᠵᠠᠨ ᠤ ᠤᠷᠤᠨ ᠠᠴᠠ ᠪᠤᠷᠬᠠᠨ ᠤ ᠮᠦᠷ ᠲᠤ ᠤᠷᠤᠵᠤ᠂ ᠲᠠᠪᠤᠨ ᠲᠢᠪ ᠤᠨ ᠴᠠᠭᠠᠨ᠎ᠠ ᠠᠴᠠ ᠬᠦᠮᠤᠨ ᠤ ᠤᠷᠴᠢᠯᠠᠩ — ᠦᠨᠡᠨ ᠤ ᠶᠢᠷᠳᠢᠨᠴᠤ ᠭᠡᠴᠢᠨᠡᠨ ᠠᠯᠤᠰ ᠬᠤᠯᠠ ᠭᠡᠵᠤ ᠪᠢᠳᠡᠬᠡᠢ ᠪᠤᠳᠤᠭᠠᠷᠠᠢ︕ ᠵᠡᠬᠦᠳᠤᠨ ᠰᠤᠪᠢᠩ᠂ ᠵᠢᠷᠤᠬᠡᠨ ᠤ ᠤᠶᠠᠭ᠎ᠠ ᠲᠠᠨ ᠲᠠᠢ ᠪᠠᠨ ᠬᠤᠯᠪᠤᠭ᠎ᠠ ᠲᠠᠢ᠃ ᠵᠢᠷᠤᠬᠡ ᠰᠡᠳᠬᠢᠯ᠂ ᠵᠤᠷᠢᠭᠰᠠᠨ ᠵᠠᠮ ᠳᠠᠭᠠᠨ ᠲᠠᠨ ᠤ ᠪᠠᠨ ᠰᠤᠷᠭᠠᠯ ᠢᠶᠠᠷ ᠠᠮᠢᠳᠤᠷᠠᠵᠠᠭᠠᠶ᠎ᠠ︕ ᠠᠮᠤᠷᠯᠢᠩᠭᠤᠢ ᠨᠦᠢᠷᠰᠤᠭᠠᠷᠠᠢ︕         ᠡᠵᠢ ᠮᠢᠨᠢ ᠡ᠂ ᠲᠠ ᠪᠤᠯ ᠪᠢᠳᠠᠨ ᠤ ᠰᠡᠳᠬᠢᠯ ᠤᠨ ᠨᠠᠷᠨ᠂ ᠵᠢᠷᠤᠬᠡᠨ ᠤ ᠲᠤᠯᠢ᠂ ᠡᠨᠡ ᠨᠠᠰᠤᠨ ᠤ ᠮᠦᠩᠭᠡ ᠶᠢᠨ ᠰᠢᠳᠦᠬᠡᠨ ᠪᠢᠯᠠ᠃ ᠪᠤᠷᠬᠠᠨ ᠰᠡᠳᠬᠢᠯᠳᠤ ᠡᠵᠢ ᠮᠢᠨᠤ᠂ ᠮᠦᠷᠤᠭᠡᠳᠤᠨ ᠮᠦᠷᠤᠭᠡᠳᠤᠨ ᠮᠦᠷᠬᠦᠨᠠᠮ︕         ᠪᠤᠳᠠᠩ ᠲᠠᠢ ᠪᠤᠭᠤᠷᠤᠯ ᠬᠤᠷᠸ᠎ᠠ ᠳᠠᠭᠠᠨ ᠪᠦᠪᠠᠶᠢᠯᠠᠵᠤ ᠦᠰᠭᠡᠭᠰᠡᠨ ᠡᠵᠢ ᠮᠢᠨᠢ ᠳ᠋ᠠ ᠬᠦᠢ         ᠪᠤᠷᠤᠭᠤ ᠵᠦᠪ ᠬᠤᠶᠠᠷ ᠢ ᠮᠢᠨᠢ ᠤᠬᠠᠭᠠᠷᠠᠭᠤᠯᠵᠤ ᠦᠰᠭᠡᠭᠰᠡᠨ ᠡᠵᠢ ᠮᠢᠨᠢ ᠳ᠋ᠠ         ᠲᠤᠭᠤᠰᠤ ᠲᠠᠢ ᠰᠢᠷᠭᠠᠯ ᠬᠤᠷᠸ᠎ᠠ ᠳᠠᠭᠠᠨ ᠲᠤᠷᠨᠢᠭᠤᠯᠤᠨ ᠦᠰᠭᠡᠭᠰᠡᠨ ᠡᠵᠢ ᠮᠢᠨᠢ ᠳ᠋ᠠ ᠬᠦᠢ         ᠲᠤᠭ᠎ᠠ ᠲᠠᠢ ᠭᠡᠳᠤᠭᠡᠨ ᠨᠠᠰᠤᠨ ᠳᠠᠭᠠᠨ ᠲᠤᠭᠯᠠᠭᠤᠯᠤᠨ ᠦᠰᠭᠡᠭᠰᠡᠨ ᠡᠵᠢ ᠮᠢᠨᠢ ᠳ᠋ᠠ         ᠡᠵᠢ ᠮᠢᠨᠢ ᠠᠪᠤ ᠲᠠᠢ ᠲᠠᠨᠢᠯᠴᠠᠭᠠᠳ ᠤᠤᠭᠠᠯ ᠨᠤᠳᠤᠭ ᠠᠴᠠ ᠪᠠᠨ ᠰᠠᠯᠵᠤ᠂ ᠰᠢᠨ᠎ᠠ ᠪᠠᠷᠭᠤ ᠵᠡᠬᠦᠨ ᠬᠤᠰᠢᠭᠤᠨ ᠳᠤ ᠢᠷᠡᠬᠦ ᠳᠤ ᠬᠦᠭᠡ ᠲᠡᠭᠷᠢ᠂ ᠴᠠᠭᠠᠨ ᠡᠬᠦᠯᠡ᠂ ᠨᠤᠮᠢᠨ ᠨᠤᠭᠤᠭᠠᠨ ᠲᠠᠯ᠎ᠠ ᠶᠢ ᠬᠠᠷᠠᠭᠠᠳ ᠪᠠᠭ᠋ᠠᠷᠬᠠᠳᠠᠭ ᠪᠠᠶᠢᠯ᠎ᠠ᠃ ᠲᠦᠷᠦᠭᠰᠡᠨ ᠨᠤᠳᠤᠭ ᠤᠨ ᠢᠶᠠᠨ ᠲᠠᠷᠢᠶᠠᠨ ᠦᠵᠦᠬᠦᠷ ᠨᠠᠭᠠᠳᠴᠤ᠂ ᠡᠪᠦᠭᠡ ᠶᠢ ᠲᠠᠭᠠᠨ ᠲᠠᠷᠢᠶ᠎ᠠ ᠠᠷᠴᠢᠵᠤ᠂ ᠲᠠᠷᠢᠶ᠎ᠠ ᠤᠰᠤᠯᠠᠵᠤ᠂ ᠲᠠᠷᠢᠶ᠎ᠠ ᠬᠤᠷᠢᠶᠠᠵᠤ ᠶᠠᠪᠤᠬᠤ ᠳᠤ ︽ᠲᠡᠮᠤᠷ ᠦᠭᠢᠨ︾ ᠴᠤᠯᠠ ᠤᠯᠤᠭᠰᠠᠨ ᠡᠳᠤᠷ ᠤᠳ ᠢᠶᠠᠨ ᠴᠦ ᠰᠠᠨᠠᠭᠠᠯᠵᠠᠳᠠᠭ ᠪᠠᠶᠢᠭᠰᠠᠨ᠃ ᠡᠵᠢ ᠮᠢᠨᠢ ᠢᠩᠭᠢᠵᠤ ᠯᠡ ᠪᠠᠷᠭᠤ ᠶᠢᠨ ᠠᠭᠤᠳᠠᠮ ᠲᠠᠯ᠎ᠠ ᠳᠤ ᠬᠦᠯ ᠲᠤᠭᠳᠠᠨ᠂ ᠠᠪᠤ ᠲᠠᠢ ᠮᠢᠨᠢ ᠬᠠᠮᠳᠤ ᠪᠠᠷ ᠴᠢᠷᠮᠠᠶᠢᠨ ᠲᠠᠪᠤᠨ ᠭᠡᠤᠭᠡᠳ ᠵᠶᠠᠨ ᠬᠦᠮᠦᠨ ᠤ ᠵᠡᠷᠭᠡ ᠳᠤ ᠬᠦᠷᠭᠡᠨ᠂ ᠡᠷᠳᠡᠮ ᠤᠨ ᠵᠢᠯᠤᠭᠤ ᠶᠢ ᠠᠳᠬᠤᠭᠤᠯᠤᠨ᠂ ᠡᠩ ᠦᠭᠡᠢ ᠡᠨᠡ ᠬᠤᠷᠸ᠎ᠠ ᠳᠤ ᠡᠶ᠎ᠡ ᠨᠠᠶᠢᠷ ᠲᠠᠢ ᠠᠮᠢᠳᠤᠷᠠᠬᠤ ᠤᠬᠠᠭᠠᠨ ᠪᠤᠳᠤᠯ ᠢ ᠰᠡᠳᠬᠢᠯ ᠳᠤ ᠮᠠᠨᠢ ᠬᠦᠨ ᠬᠠᠳᠠᠩᠰᠢᠭᠤᠯᠪᠠ᠃         ︽ᠵᠠᠮ ᠤᠨ ᠠᠯᠤᠰ ᠭᠤᠳᠤᠯ ᠢ ᠡᠯᠡᠬᠡᠨ᠎ᠡ᠂ ᠵᠢᠷᠤᠬᠡᠨ ᠤ ᠡᠷᠢᠯ ᠴᠠᠭ ᠢ ᠡᠯᠡᠭᠡᠨ᠎ᠡ︾ ᠭᠡᠳᠡᠭᠴᠢᠯᠡᠨ ᠬᠠᠶᠢᠷᠠᠳᠤ ᠡᠵᠢ ᠲᠠᠨ ᠢ ᠪᠠᠨ ᠪᠤᠳᠤᠬᠤ ᠪᠦᠷᠢ ᠬᠠᠶᠢᠷ᠎ᠠ ᠶᠢᠨ ᠨᠢᠯᠪᠤᠰᠤ ᠦᠪᠡᠷ ᠤᠨ ᠡᠷᠬᠡ ᠦᠭᠡᠢ ᠪᠦᠮᠪᠦᠷᠢᠨ᠎ᠠ᠃ ᠲᠠᠨ ᠤ ᠪᠠᠨ ᠦᠯᠡᠳᠡᠭᠡᠵᠤ ᠦᠭᠬᠦᠭᠰᠡᠨ ᠨᠠᠰᠤᠨ ᠤ ᠬᠦᠷᠦᠩᠭᠡ — ᠦᠨᠡᠨᠴᠢ ᠰᠢᠳᠤᠷᠭᠤ᠂ ᠠᠵᠢᠯᠴᠢ ᠠᠷᠪᠢᠴᠢ᠂ ᠨᠦᠬᠦᠷᠰᠡᠭ ᠳᠤᠲᠤᠨᠤ᠂ ᠴᠠᠶᠢᠯᠭᠠᠨ ᠴᠠᠭᠠᠪᠤᠷ᠂ ᠦᠷᠦᠭᠡᠯ ᠳᠤ ᠦᠷᠤᠪᠴᠢᠭᠡᠨ ᠰᠠᠶᠢᠬᠠᠨ ᠰᠤᠷᠳᠠᠯ ᠢ ᠲᠠᠨᠢ ᠦᠶ᠎ᠠ ᠶᠢᠨ ᠦᠶ᠎ᠠ ᠳᠤ ᠪᠠᠨ ᠤᠯᠠᠮᠵᠢᠯᠠᠨ ᠦᠯᠡᠳᠡᠭᠡᠨᠡᠮ︕         ︽ᠠᠪᠤ ᠶᠢᠨ ᠤᠷᠭ᠎ᠠ ᠶᠢ ᠪᠠᠷᠢᠵᠤ ᠰᠤᠷ᠂ ᠠᠵᠢᠯ ᠴᠢᠨᠢ ᠠᠮᠵᠢᠯᠳᠠ ᠲᠠᠢ ᠪᠤᠯᠬᠤ ᠶᠤᠮ᠂ ᠡᠵᠢ ᠶᠢᠨ ᠤᠶᠤᠳᠠᠯ ᠢ ᠬᠢᠵᠤ ᠰᠤᠷ᠂ ᠡᠷᠡᠬᠦᠯ ᠰᠠᠷᠠᠭᠤᠯ ᠠᠮᠢᠳᠤᠷᠠᠬᠤ ᠶᠤᠮ︾ ᠭᠡᠳᠡᠭ ᠢᠶᠠᠷ ᠡᠵᠢ ᠮᠢᠨᠢ ᠨᠠᠳᠠ ᠳᠤ ᠨᠠᠰᠤᠨ ᠲᠤᠷᠰᠢᠳᠠ ᠶᠢᠨ ᠦᠪ ᠢᠶᠠᠨ ᠦᠯᠡᠳᠡᠭᠡᠭᠰᠡᠨ ᠰᠠᠨ᠃ ᠮᠢᠨᠤ ᠡᠵᠢ ᠶᠢᠨ ᠬᠤᠸᠠᠷ ᠬᠠᠳᠬᠤᠮᠠᠯ ᠨᠢ ᠠᠮᠢᠳᠤ ᠴᠤᠪᠤᠭᠤᠯᠢᠭ᠂ ᠯᠤᠤ ᠭᠠᠷᠤᠳᠢ ᠨᠢ ᠠᠯᠳᠠᠨ ᠤᠳᠠᠰᠤ ᠪᠠᠷ ᠬᠡᠯᠬᠢᠵᠤ᠂ ᠲᠦᠷᠰᠦᠯᠢᠭ ᠲᠤᠳᠤᠬᠠᠨ᠂ ᠯᠢᠩᠬᠸ᠎ᠠ ᠬᠤᠸᠠᠷ ᠨᠢ ᠦᠩᠭᠡ ᠪᠤᠳᠤᠭ ᠰᠤᠷᠭᠤᠭ ᠭᠤᠶᠤᠬᠠᠨ ᠭᠠᠶᠢᠬᠠᠯᠳᠠᠢ ᠪᠠᠶᠢᠳᠠᠭ᠃ ᠡᠵᠢ ᠪᠢᠳᠡᠨ ᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠬᠤᠨᠢ ᠢᠮᠠᠭ᠎ᠠ᠂ ᠲᠡᠮᠡᠭᠡᠨ ᠤ ᠨᠤᠤᠰᠤ ᠶᠢ ᠵᠤᠯᠤᠭᠠᠳ ᠨᠠᠷᠢᠬᠠᠨ ᠤᠳᠠᠰᠤ ᠡᠭᠡᠷᠡᠵᠤ᠂ ᠳᠠᠬᠢᠨ ᠲᠦᠷᠪᠡ᠂ ᠲᠠᠪᠤᠨ ᠰᠢᠷᠬᠡᠭ ᠤᠳᠠᠰᠤ ᠶᠢ ᠨᠡᠶᠢᠯᠡᠬᠦᠯᠦᠨ ᠲᠠᠮᠤᠭᠠᠳ ᠨᠢᠭᠡ ᠪᠦᠳᠦᠬᠦᠨ ᠰᠢᠭ ᠨᠤᠤᠰᠤᠨ ᠤᠳᠠᠰᠤ ᠪᠤᠯᠭᠠᠭᠠᠳ᠂ ᠤᠯᠠᠨ ᠡᠳᠤᠷ ᠤᠨ ᠲᠠᠮᠤᠭᠰᠠᠨ ᠤᠳᠠᠰᠤ ᠪᠠᠨ ᠠᠪᠤ ᠶᠢᠨ ᠬᠤᠳᠠᠯᠳᠤᠨ ᠠᠪᠴᠢᠷᠠᠭᠰᠠᠨ ᠦᠩᠭᠡ ᠪᠦᠷᠢ ᠶᠢᠨ ᠨᠤᠤᠰᠤᠨ ᠤ ᠪᠤᠳᠤᠭ ᠢᠶᠠᠷ ᠥᠩᠭᠡᠯᠡᠴᠢᠬᠡᠭᠡᠳ ᠨᠠᠭᠠᠴᠤ ᠡᠮᠡᠭᠡ᠂ ᠠᠪᠤ ᠪᠤᠯᠤᠨ ᠮᠠᠨᠤᠰ ᠲᠤ ᠶᠠᠩᠵᠤ ᠪᠤᠯᠭᠠᠨ ᠤ ᠨᠤᠤᠰᠤᠨ ᠬᠠᠨᠳᠠᠭᠠᠰᠤ᠂ ᠨᠤᠤᠰᠤᠨ ᠮᠠᠯᠠᠭᠠᠢ᠂ ᠪᠡᠬᠡᠯᠡᠢ᠂ ᠬᠦᠵᠦᠬᠦᠨ ᠤᠷᠢᠶᠠᠯᠲᠠ ᠶᠢ ᠨᠡᠭᠡᠵᠤ ᠤᠷᠠᠯᠠᠳᠠᠭ ᠪᠠᠶᠢᠯ᠎ᠠ᠃ ᠮᠢᠨᠤ ᠡᠵᠢ ᠶᠢᠨ ᠮᠠᠰᠢᠨ ᠤᠶᠤᠳᠠᠯ᠂ ᠭᠠᠷ ᠤᠶᠤᠳᠠᠯ ᠨᠢ ᠴᠦ ᠨᠤᠳᠤᠭ ᠤᠰᠤᠨ ᠳᠠᠭᠠᠨ ᠠᠯᠳᠠᠷᠳᠠᠢ ᠪᠠᠶᠢᠳᠠᠭ᠃ ᠦᠡᠭᠭᠡᠷᠡᠭᠰᠡᠨ ᠳᠤ ᠠᠶᠢᠯ ᠰᠠᠭᠠᠬᠠᠯᠳᠠ ᠶᠢᠨ ᠬᠢᠨ ᠤ ᠲᠧᠯᠸᠢᠰ᠂ ᠬᠤᠪᠴᠠᠰᠤ ᠤᠭᠢᠶᠠᠬᠤ ᠮᠠᠰᠢᠨ ᠤ ᠪᠦᠳᠡᠭᠡᠯᠭᠡ᠂ ᠡᠬᠦᠳᠡᠨ ᠤᠷᠬᠢᠭᠤᠯ᠂ ᠤᠷᠤ ᠶᠢᠨ ᠪᠦᠳᠡᠭᠡᠯᠭᠡ ᠶᠢ ᠴᠠᠭᠠᠨ ᠪᠦᠰ ᠲᠡᠭᠡᠷ᠎ᠡ ᠵᠢᠷᠤᠭ ᠦᠰᠦᠭ ᠬᠠᠪᠰᠤᠷᠭᠠᠨ ᠬᠠᠳᠬᠤᠮᠠᠯ ᠤᠷᠠᠯᠠᠵᠤ᠂ ᠬᠦᠪᠡᠭᠡ ᠶᠢ ᠨᠢ ᠬᠦᠬᠡ᠂ ᠤᠯᠠᠭᠠᠨ᠂ ᠨᠤᠭᠤᠭᠠᠨ ᠮᠡᠳᠤ ᠶᠢᠨ ᠦᠩᠭᠡ ᠪᠦᠷᠢ ᠶᠢᠨ ᠪᠦᠰ ᠢᠶᠠᠷ ᠬᠦᠪᠡᠭᠡᠯᠡᠵᠤ ᠤᠶᠤᠵᠦ ᠦᠭᠬᠦᠭᠰᠡᠨ ᠨᠢ ᠲᠤᠩ ᠴᠦ ᠭᠤᠶᠤ ᠬᠠᠷᠠᠭᠳᠠᠳᠠᠭ ᠪᠠᠶᠢᠭᠰᠠᠨ᠃ ᠨᠠᠳᠠ ᠶᠢ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠪᠠᠶᠢᠬᠤ ᠳᠤ ᠨᠡᠭᠡᠵᠤ ᠦᠭᠬᠦᠭᠰᠡᠨ ᠲᠠᠪᠤᠨ ᠬᠤᠷᠤᠭᠤ ᠲᠠᠢ ᠡᠷᠢᠶᠡᠨ ᠲᠠᠬᠢ ᠶᠢᠨ ᠪᠡᠭᠡᠯᠡᠢ ᠶᠢ ᠪᠢ ᠭᠢᠴᠢᠶᠡᠯ ᠤᠨ ᠰᠢᠷᠡᠭᠡᠨ ᠤ ᠬᠤᠷᠭᠤᠨ ᠳᠠᠭᠠᠨ ᠤᠷᠬᠢᠭᠠᠳ ᠬᠡᠭᠡᠴᠢᠭᠡᠭᠰᠡᠨ ᠨᠢ ᠦᠨᠤ ᠪᠤᠳᠤᠬᠤ ᠳᠤ ᠴᠦ ᠦᠨᠡᠭᠡᠷ ᠬᠠᠷᠠᠮᠰᠠᠯᠳᠠᠢ᠃ ᠪᠢᠳᠡᠨ ᠢ ᠪᠠᠭ᠎ᠠ ᠳᠤ ᠡᠵᠢ ᠮᠢᠨᠢ ᠰᠠᠷ᠎ᠠ ᠶᠢᠨ ᠲᠤᠭ᠎ᠠ ᠲᠠᠢ ᠦᠭᠳᠡᠭ ᠬᠡᠳᠤᠬᠡᠨ ᠲᠤᠬᠤᠢ ᠪᠦᠰ ᠢᠶᠠᠨ ᠠᠷᠪᠢᠯᠠᠨ ᠪᠠᠶᠢᠵᠤ᠂ ᠨᠠᠭᠠᠴᠤ ᠡᠮᠡᠭᠡ᠂ ᠠᠪᠤ᠂ ᠪᠢᠳᠡᠨ ᠠᠬ᠎ᠠ ᠳᠡᠬᠦᠤ ᠬᠡᠳᠦᠬᠦᠯᠠ ᠳᠤ ᠴᠠᠭᠠᠨ ᠰᠠᠷ᠎ᠠ ᠠᠴᠠ ᠡᠮᠦᠨ᠎ᠡ ᠰᠢᠨ᠎ᠠ ᠬᠤᠪᠴᠠᠰᠤ ᠡᠮᠦᠰᠬᠡᠬᠦ ᠶᠢ ᠵᠤᠷᠢᠳᠠᠭ᠃ ᠲᠡᠬᠡᠬᠦ ᠳᠤ ᠪᠢᠳᠡᠨ ᠬᠦᠯᠢᠶᠡᠭᠰᠡᠭᠡᠷ ᠰᠢᠨ᠎ᠡ ᠬᠤᠪᠴᠠᠰᠤ ᠪᠠᠨ ᠡᠮᠤᠰᠴᠢᠬᠡᠭᠡᠳ ᠭᠠᠳᠠᠨ᠎ᠠ ᠡᠬᠦᠳᠡᠨ ᠤ ᠪᠠᠨ ᠠᠷᠤ ᠳᠤ ᠨᠢᠭᠤᠭᠳᠠᠵᠤ ᠡᠵᠢ ᠠᠴᠠ ᠪᠠᠨ᠄ ︽ᠮᠦᠮᠤ ᠡ᠂ ᠪᠢ ᠦᠰᠦᠭᠰᠡᠨ ᠤᠤ︖ ︾ᠭᠡᠪᠡᠯ ᠡᠵᠢ ᠬᠠᠷᠢᠭᠤ ᠳᠤᠨᠢ᠄ ︽ᠦᠰᠴᠡᠢ᠂ ᠦᠰᠴᠠᠢ︾ ᠭᠡᠪᠡᠯ ᠪᠢᠳᠡᠡ ᠦᠨᠡᠮᠰᠢᠵᠦ ᠬᠦᠭᠡᠷᠦᠭᠡᠳ ᠯᠡ ᠭᠡᠷ ᠲᠡᠭᠡᠨ ᠤᠷᠤᠵᠤ ᠠᠪᠤ ᠡᠵᠢ ᠳᠡᠭᠡᠨ ᠵᠤᠯᠭᠠᠳᠠᠭ᠃        ᠬᠠᠶᠢᠷᠠᠳᠤ ᠡᠵᠢ ᠮᠢᠨᠢ ᠡ᠂ ᠲᠠᠨ ᠤ ᠪᠠᠨ ᠠᠴᠢ ᠭᠠᠪᠢᠶ᠎ᠠ᠂ ᠰᠤᠳᠤᠨ ᠰᠤᠷᠭᠠᠯ᠂ ᠪᠤᠷᠤᠭᠵᠢᠭᠤᠨ ᠰᠤᠷᠳᠠᠯ ᠢ ᠲᠠᠨᠢ ᠦᠷ᠎ᠠ ᠴᠢᠨᠢ ᠪᠢᠳᠡᠨ ᠤᠯᠠᠮᠵᠢᠯᠠᠨ ᠵᠠᠯᠭᠠᠮᠵᠢᠯᠠᠵᠦ᠂ ᠲᠠᠨ ᠢ ᠪᠠᠨ ᠨᠠᠰᠤᠨ ᠲᠤᠷᠰᠢᠳᠠ ᠲᠤᠷᠠᠰᠤᠨ ᠰᠠᠨᠠᠭᠠᠯᠵᠠᠵᠤ ᠶᠠᠪᠤᠨ᠎ᠠ︕  
ᠢᠷᠡᠯᠲᠡ᠄ ᠬᠥᠯᠥᠨ ᠪᠤᠶᠢᠷ ᠮᠤᠩᠭᠤᠯ ᠰᠦᠯᠵᠢᠶ᠎ᠡ