ᠭᠠᠭᠴᠠ ᠪᠦᠭᠡᠭᠡᠨ ᠠᠳᠤᠭᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/16
                            ᠵᠣᠬᠢᠶᠠᠭᠴᠢ᠄ ᠲ᠊ · ᠪᠤᠮᠡᠷᠳᠡᠨᠢ ﹇ᠮᠤᠩᠭᠤᠯ﹈        ᠨᠠᠭᠤᠷ ᠤᠨ ᠡᠷᠬᠢ ᠳᠡᠭᠡᠷᠡᠬᠢ ᠰᠡᠭᠦᠯ ᠳᠤ ᠠᠪᠴᠢᠷᠠᠵᠤ ᠳᠠᠯᠪᠢᠭᠰᠠᠨ ᠪᠤᠯᠪᠠ ᠤᠤ ᠭᠡᠮᠡᠷ ᠳᠡᠭᠰᠢᠯᠡᠵᠤ ᠵᠠᠰᠠᠭᠰᠠᠨ ᠬᠠᠷ᠎ᠠ ᠬᠠᠳᠠᠨ ᠳᠡᠭᠡᠷ᠎ᠡ ᠳᠡᠷᠳᠡᠭᠡ ᠵᠡᠭᠦᠨᠳᠡᠢ ᠠᠴᠠ ᠨᠠᠭᠤᠷ ᠤᠨ ᠮᠠᠨᠳᠠᠯ ᠳᠡᠭᠡᠭᠦᠷ ᠴᠤᠬᠤᠶᠢᠬᠤ ᠨᠠᠷᠠ ᠶᠢ ᠠᠵᠢᠨ ᠰᠠᠭᠤᠭ᠎ᠠ ᠡᠷ᠎ᠡ ᠶᠢ ᠭᠠᠷᠮᠠᠵᠠᠪ ᠭᠡᠨ᠎ᠡ᠃ ︽ᠶᠡᠭᠡ ᠤᠰᠤ ᠶᠤᠮ ᠡ᠃ ᠦᠨᠡᠭᠡᠷ ᠳᠤᠮᠤ ᠨᠠᠭᠤᠷ ᠶᠤᠮ︾ ᠭᠡᠵᠤ ᠳᠡᠷᠡ ᠪᠠᠷ ᠱᠠᠭᠰᠢᠨ ᠪᠤᠳᠤᠯᠭᠠᠰᠢᠷᠠᠨ᠎ᠠ᠃ ᠦᠨᠡᠨ ᠳᠡᠭᠡᠨ ᠪᠤᠯ ᠨᠠᠭᠤᠷ ᠭᠡᠳ ᠪᠠᠶᠢᠭ᠎ᠠ ᠪᠤᠯᠬᠤ ᠠᠴᠠ ᠭᠠᠷᠮᠠᠵᠠᠪ ᠰᠢᠭ᠋ ᠤᠰᠤ ᠦᠭᠡᠢ ᠭᠠᠵᠠᠷ ᠤᠨ ᠬᠦᠮᠦᠨ ᠳᠤ ᠪᠤᠯ ᠳᠠᠯᠠᠢ ᠯᠠ ᠭᠡᠰᠡᠨ ᠦᠭᠡ ᠶᠤᠮ ᠳ᠋ᠠ᠃        ᠶᠠᠭᠤᠨ ᠳᠤ ᠴᠦ ᠰᠡᠭᠡᠯᠵᠡᠭᠡᠳ ᠦᠷ ᠬᠠᠶᠠᠭᠠᠷᠠᠬᠤ ᠶᠢᠨ ᠠᠯᠳᠠ ᠳᠤ ᠨᠦᠢᠷ ᠨᠢ ᠪᠦᠷᠢᠨ ᠰᠡᠷᠭᠦᠴᠢᠭᠡᠯ᠎ᠡ᠃ ᠦᠨᠦᠳᠦᠷ ᠠᠮᠠᠷᠠᠯᠳᠠ ᠶᠢᠨ ᠡᠳᠦᠷ ᠨᠢᠭᠡ ᠰᠠᠶᠢᠨ ᠤᠨᠳᠠᠭᠠᠳ ᠠᠪᠬᠤ ᠭᠡᠰᠡᠨ ᠳᠡᠭᠦᠨ ᠤ ᠬᠦᠰᠡᠯ ᠳᠠᠯᠠᠭᠠᠷ ᠦᠩᠭᠡᠷᠡᠪᠡ᠃ ᠴᠤᠩᠬᠤ ᠪᠠᠷ ᠭᠡᠶᠢᠬᠦ ᠦᠷ ᠤᠨ ᠰᠠᠭᠠᠷᠠᠯ ᠭᠡᠭᠡ ᠳᠡᠷᠡᠭᠦᠭᠡᠨ ᠦᠶ᠎ᠡ ᠳᠡᠭᠡᠨ ᠪᠦᠦᠳᠡᠶᠢᠬᠦ ᠠᠪᠠᠴᠤ ᠬᠤᠷᠤᠮ ᠮᠦᠴᠡ ᠦᠩᠭᠡᠷᠡᠬᠦ ᠳᠤᠰᠤᠮ ᠢᠯᠠᠨ ᠳᠡᠶᠢᠯᠬᠦ ᠶᠢᠨ ᠢᠳᠡ ᠬᠠᠪᠤ ᠰᠢᠩᠭᠡᠵᠤ᠂ ᠤᠯᠠᠮ ᠪᠦᠷ ᠳᠠᠮᠢᠷᠵᠢᠨ ᠳᠤᠶᠠᠭᠠᠷᠠᠨ᠎ᠠ᠃ ᠭᠠᠷᠮᠠᠵᠠᠪ ᠭᠡᠦᠭᠡᠳ ᠠᠬᠤᠢ ᠴᠠᠭ ᠲᠠᠭᠠᠨ ᠶᠠᠭ ᠯᠠ ᠡᠶᠢᠮᠦ ᠵᠤᠨ ᠤ ᠦᠷᠯᠦᠭᠡ ᠮᠥᠨ ᠴᠦ ᠤᠯᠠᠨ ᠤᠳᠠᠭ᠎ᠠ ᠡᠷᠳᠡᠯᠡᠨ ᠪᠤᠰᠴᠤ᠂ ᠬᠦᠬᠦᠷ ᠲᠠᠢ ᠠᠶᠢᠷᠠᠭ ᠠᠴᠠ ᠬᠤᠯᠤᠨ ᠳᠤ ᠬᠢᠨ᠂ ᠬᠦᠬᠡ ᠳᠤᠰᠤ ᠶᠢ ᠨᠢ ᠦᠯᠢᠶᠡᠭᠰᠡᠨ ᠪᠤᠯᠵᠤ ᠭᠡᠳᠦ ᠵᠠᠯᠬᠢᠯᠠᠭᠠᠳ ᠠᠳᠤᠭᠤᠨ ᠳᠠᠭᠠᠨ ᠮᠤᠷᠳᠠᠳᠠᠭ ᠰᠠᠨ᠃ ᠳᠡᠭᠦᠨ ᠢ ᠪᠠᠨ ᠰᠠᠨᠠᠭᠰᠠᠨ ᠤᠤ᠂ ᠡᠰᠡᠪᠡᠯ ᠪᠦᠭᠴᠢᠮ ᠬᠤᠨᠤᠭᠰᠠᠨ ᠠᠴᠠ ᠪᠤᠯᠤᠭᠰᠠᠨ ᠤᠤ᠂ ᠳᠡᠷᠡ ᠪᠠᠷ ᠤᠬᠤᠰᠬᠢᠨ ᠪᠤᠰᠴᠤ᠂ ᠬᠦᠷᠦᠭᠡᠭᠴᠢ ᠠᠴᠠ ᠬᠦᠢᠳᠡᠨ ᠤᠰᠤ ᠭᠠᠷᠭᠠᠨ ᠬᠤᠶᠠᠷ ᠵᠠᠪᠠᠵᠢ ᠪᠠᠷ ᠢᠶᠠᠨ ᠰᠠᠭᠠᠷᠠᠳᠠᠯ᠎ᠠ ᠵᠠᠯᠬᠢᠯᠠᠯ᠎ᠠ᠃ ᠳᠡᠭᠡᠭᠰᠡᠨ ᠢᠶᠠᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠨ ᠭᠠᠷᠴᠤ᠂ ᠳᠡᠷᠭᠡ ᠪᠠᠨ ᠠᠰᠠᠭᠠᠨ ᠶᠠᠮᠠᠷ ᠴᠦ ᠡᠷᠡᠭᠡᠯᠵᠡᠭᠡ ᠦᠭᠡᠢ ᠪᠠᠷ ᠨᠠᠭᠤᠷ ᠤᠨ ᠬᠦᠪᠡᠭᠡ ᠤᠷᠤᠭᠤ ᠳᠠᠪᠬᠢᠵᠤ ᠢᠷᠡᠭᠰᠡᠨ ᠨᠢ ᠡᠨᠡ᠃ ᠰᠡᠭᠦᠯ ᠤᠨ ᠦᠶ᠎ᠡ ᠳᠤ ᠶᠠᠭᠤᠮ᠎ᠠ ᠯᠠ ᠪᠤᠯ ᠠᠳᠡ ᠢᠷᠡᠵᠤ᠂ ᠡᠭᠦᠨ ᠠᠴᠠ ᠴᠠᠭᠠᠰᠢ ᠶᠠᠪᠤᠬᠤ ᠭᠠᠵᠠᠷ ᠦᠭᠡᠢ ᠪᠤᠯᠤᠭᠰᠠᠨ ᠮᠡᠳᠦ ᠵᠡᠭᠦᠨ ᠵᠦᠭ ᠢ ᠰᠢᠷᠳᠡᠨ ᠵᠤᠭᠰᠤᠬᠤ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠭ᠎ᠠ ᠶᠤᠮ᠃        ᠳᠤᠭ᠎ᠠ ᠳᠤᠮᠰᠢ ᠦᠭᠡᠢ ᠤᠯᠠᠨ ᠮᠠᠰᠢᠨ ᠤᠷᠤᠯᠳᠤᠨ ᠳᠠᠪᠬᠢᠬᠤ ᠦᠷᠭᠡᠨ ᠬᠠᠷ᠎ᠠ ᠵᠠᠮ ᠨᠠᠭᠤᠷ ᠤᠨ ᠬᠦᠪᠡᠭᠡ ᠶᠢ ᠡᠮᠵᠢᠶᠡᠷᠢᠯᠡᠨ ᠡᠴᠦᠰ ᠳᠡᠭᠦᠰᠭᠡᠯ ᠦᠭᠡᠢ ᠮᠡᠳᠦ ᠠᠯᠤᠰᠷᠠᠬᠤ ᠪᠦᠭᠡᠳ ᠶᠠᠭ ᠡᠨᠡ ᠵᠠᠮ ᠠᠴᠠ ᠪᠠᠷᠠᠭᠤᠨ ᠳᠡᠶᠢᠰᠢ ᠤᠯᠠᠨ ᠤᠯᠠᠨ ᠦᠨᠳᠦᠷ ᠪᠠᠷᠢᠯᠭ᠎ᠠ ᠨᠤᠭᠤᠳ ᠰᠢᠯᠢ ᠰᠢᠯᠢ ᠪᠠᠨ ᠬᠠᠷᠠᠨ ᠢᠷᠠᠶᠢᠭᠰᠠᠨ ᠶᠡᠭᠡ ᠬᠤᠳᠠ ᠨᠡᠭᠦᠭᠡᠯᠳᠦᠨ᠎ᠡ᠃ ᠦᠨᠳᠦᠷ ᠦᠨᠳᠦᠷ ᠪᠠᠶᠢᠰᠢᠩ ᠤᠨ ᠳᠦᠭ ᠳᠦᠮᠡᠨ ᠴᠤᠩᠬᠤ ᠨᠤᠭᠤᠳ ᠨᠠᠭᠤᠷ ᠤᠨ ᠴᠠᠭᠠᠨ᠎ᠠ ᠠᠴᠠ ᠮᠠᠨᠳᠤᠬᠤ ᠨᠠᠷᠠᠨ ᠤ ᠳᠤᠶᠠᠭ᠎ᠠ ᠶᠢ ᠬᠢᠯᠳᠤᠭᠠᠨᠠᠭᠤᠯᠤᠨ ᠬᠢᠯᠠᠯᠵᠠᠬᠤ ᠠᠭᠠᠳ ᠵᠠᠷᠢᠮ ᠨᠢᠭᠡ ᠨᠠᠮᠬᠠᠪᠳᠤᠷ ᠪᠠᠶᠢᠰᠢᠩ ᠨᠤᠭᠤᠳ ᠳᠡᠳᠡᠨ ᠤ ᠰᠦᠷ ᠲᠤ ᠳᠠᠷᠤᠭᠳᠠᠨ᠂ ᠴᠤᠩᠬᠤ ᠨᠤᠭᠤᠳ ᠨᠢ ᠭᠡᠵᠢᠶ᠎ᠡ ᠴᠦ ᠨᠠᠷᠠ ᠦᠵᠡᠬᠦ ᠦᠭᠡᠢ ᠪᠠᠷ ᠰᠦᠮᠡᠶᠢᠵᠡᠭᠡᠨ᠎ᠡ᠃ ᠰᠠᠶ᠎ᠠ ᠰᠠᠶ᠎ᠠ ᠬᠦᠮᠦᠰ ᠪᠠᠭᠳᠠᠵᠤ ᠶᠠᠳᠠᠨ ᠴᠢᠬᠢᠯᠳᠦᠭᠦ ᠳᠤ ᠡᠨᠡ ᠪᠤᠭᠤᠷᠤᠯ ᠬᠤᠳᠠ ᠤᠯᠠᠨ ᠵᠠᠭᠤᠨ ᠵᠢᠯ ᠤᠨ ᠤᠷᠳᠦ ᠳᠤ ᠦᠷᠯᠦᠭᠡ ᠪᠤᠯᠭᠠᠨ ᠳᠤ ᠢᠩᠬᠢᠵᠤ ᠯᠠ ᠤᠭᠳᠤᠭ᠎ᠠ ᠪᠤᠯᠪᠠ ᠤᠤ ᠭᠡᠮᠡᠷ ᠴᠠᠭᠠᠨ᠎ᠠ ᠪᠠᠨ ᠨᠢᠭᠡ ᠳᠤᠭᠤᠮᠰᠠᠷ ᠦᠭᠡᠶᠢᠭᠡᠨ᠂ ᠪᠠᠰᠠ ᠶᠡᠭᠡᠮᠰᠦᠭᠳᠡᠭᠦᠭᠡᠨ᠃ ᠠᠳᠡ ᠬᠦᠯ ᠬᠦᠳᠡᠯᠭᠡᠭᠡᠨ ᠳᠠᠰᠤᠷᠠᠨ᠎ᠠ ᠭᠡᠵᠤ ᠦᠭᠡᠢ᠃ ᠡᠭᠦᠷ ᠢᠶᠠᠨ ᠰᠠᠨᠳᠠᠴᠢᠭᠤᠯᠤᠭᠰᠠᠨ ᠰᠢᠷᠭᠤᠯᠵᠢ ᠮᠡᠳᠦ ᠤᠪᠤᠯᠵᠠᠬᠤ ᠨᠢ ᠶᠡᠭᠡ ᠬᠤᠳᠠ ᠶᠢᠨ ᠶᠡᠷᠦᠳᠡ ᠶᠢᠨ ᠰᠢᠨᠵᠢ᠃        ᠬᠠᠷᠢᠨ ᠵᠠᠮ ᠤᠨ ᠵᠡᠭᠦᠨ ᠳᠠᠯ᠎ᠠ ᠤᠷᠤᠭᠤ ᠨᠠᠭᠤᠷ ᠤᠨ ᠡᠷᠬᠢ ᠶᠢᠨ ᠪᠤᠯᠤᠩ ᠳᠤᠬᠤᠢ ᠪᠠᠷ ᠵᠤᠷᠢᠭᠤᠳᠠ ᠳᠤᠬᠢᠵᠢᠭᠤᠯᠤᠭᠰᠠᠨ ᠨᠠᠷᠠᠨ ᠰᠢᠷᠠᠯᠭ᠎ᠠ ᠶᠢᠨ ᠭᠠᠵᠠᠷ ᠤᠳ ᠶᠤᠰᠤᠳᠠᠢ ᠤᠶᠢᠷ᠎ᠠ ᠬᠠᠪᠢ ᠳᠤ ᠬᠤᠳᠠ ᠳᠤᠰᠬᠤᠨ ᠪᠠᠶᠢᠬᠤ ᠦᠭᠡᠢ ᠮᠡᠳᠦ ᠨᠠᠮ ᠭᠦᠮᠭᠡᠨ᠃ ᠭᠡᠬᠦ ᠳᠡᠭᠡᠨ ᠬᠦᠮᠦᠰ ᠮᠡᠷ ᠰᠡᠷᠭᠡᠨ ᠢᠷᠡᠭᠰᠡᠭᠡᠷ ᠳᠦᠳᠡᠭᠡᠨ ᠳᠦᠭᠦᠷᠭᠦ ᠪᠤᠯᠤᠨ᠎ᠠ ᠭᠡᠳᠡᠭ ᠢ ᠭᠠᠷᠮᠠᠵᠠᠪ ᠠᠨᠳᠠᠬᠤ ᠦᠭᠡᠢ᠃ ᠳᠡᠷᠳᠡᠭᠡ ᠳᠡᠭᠡᠭᠦᠷ ᠴᠠᠬᠤᠯᠠᠢ ᠰᠢᠪᠠᠭᠤ ᠭᠠᠭᠠᠭ ᠭᠠᠭᠠᠭ ᠳᠤᠤᠭᠠᠷᠤᠨ ᠡᠷᠬᠢᠯᠳᠦᠨ᠎ᠡ᠃ ᠪᠤᠳᠤᠪᠠᠯ ᠬᠤᠭᠤᠯᠠ ᠯᠠ ᠡᠷᠬᠢᠭᠦᠯᠵᠤ ᠶᠠᠪᠤᠭ᠎ᠠ ᠪᠤᠯᠪᠠ ᠤᠤ ᠭᠡᠮᠡᠷ ᠳᠡᠳᠡᠭᠡᠷ ᠰᠢᠪᠠᠭᠤ ᠭᠠᠷᠮᠠᠵᠠᠪ ᠲᠤ ᠳᠠᠨᠢᠯ ᠪᠢᠰᠢ ᠶᠢᠨ ᠠᠳᠠᠯᠢ ᠳᠤᠤᠭᠠᠷᠬᠤ ᠳᠠᠭᠤ ᠨᠢ ᠬᠦᠷᠳᠡᠯ᠎ᠡ ᠰᠡᠳᠬᠢᠯ ᠠᠴᠠ ᠬᠤᠯᠠ᠂ ᠠᠷᠭ᠎ᠠ ᠦᠭᠡᠢ ᠯᠠ ᠭᠠᠳᠠᠭᠠᠳᠦ ᠰᠢᠪᠠᠭᠤ᠃        ᠨᠠᠭᠤᠷ ᠤᠨ ᠮᠠᠨᠳᠠᠯ ᠳᠡᠭᠡᠭᠦᠷ ᠨᠢᠳᠦ ᠬᠦᠶᠦᠯᠭᠡᠨ ᠳᠡᠷᠳᠡᠭᠡ ᠠᠯᠤᠰ ᠢ ᠰᠢᠷᠳᠡᠬᠦ ᠦᠶ᠎ᠡ ᠳᠤ ᠨᠢᠳᠦᠨ ᠤ ᠬᠠᠷᠠᠭ᠎ᠠ ᠴᠤᠴᠠᠬᠤ ᠰᠢᠭ᠋ ᠪᠤᠯᠬᠤ ᠳᠤ᠂ ᠠᠳᠡ ᠢᠷᠡᠵᠤ ᠠᠮᠢᠳᠤᠷᠠᠭᠰᠠᠨ ᠭᠡᠳᠦᠨ ᠵᠢᠯ ᠳᠤ ᠢᠩᠬᠢᠵᠤ ᠠᠯᠤᠰ ᠢ ᠰᠢᠷᠳᠡᠭᠡ ᠦᠭᠡᠢ ᠮᠡᠳᠦ ᠰᠠᠨᠠᠭᠳᠠᠨ᠎ᠠ᠃ ᠬᠤᠳᠠ ᠰᠠᠭᠤᠷᠢᠨ ᠭᠠᠵᠠᠷ ᠤᠨ ᠠᠮᠢᠳᠤᠷᠠᠯ ᠭᠡᠳᠡᠭ ᠠᠷᠭ᠎ᠠ ᠦᠭᠡᠢ ᠯᠠ ᠪᠤᠭᠤᠨᠢ ᠵᠠᠢ ᠳᠤ ᠬᠤᠷᠳᠤᠨ ᠬᠦᠳᠡᠯᠵᠤ ᠠᠮᠢᠳᠤᠷᠠᠳᠠᠭ ᠰᠤᠨᠢᠨ ᠭᠡᠮᠨᠡᠯ ᠲᠠᠢ ᠶᠤᠮ ᠳ᠋ᠠ᠃        ᠳᠡᠭᠡᠳᠡᠯ᠎ᠡ ᠨᠠᠭᠤᠷ ᠤᠨ ᠦᠭᠡᠷ᠎ᠡ ᠨᠢᠭᠡ ᠳᠤᠬᠤᠢ ᠳᠤ ᠡᠩᠨᠡᠭᠦᠯᠦᠨ ᠳᠠᠯᠪᠢᠭᠰᠠᠨ ᠵᠠᠪᠢᠨ ᠤ ᠵᠤᠭᠰᠤᠭᠠᠯ ᠠᠴᠠ ᠨᠢᠭᠡ ᠵᠢᠵᠢᠭ ᠴᠠᠭᠠᠨ ᠵᠠᠪᠢ ᠭᠠᠷᠴᠦ᠂ ᠤᠰᠤᠨ ᠤ ᠮᠠᠨᠳᠠᠯ ᠢᠶᠠᠷ ᠬᠤᠷᠳᠤᠯᠠᠨ ᠳᠠᠪᠬᠢᠯ᠎ᠠ᠃ ᠪᠤᠳᠤᠪᠠᠯ ᠦᠨᠦ ᠦᠷᠯᠦᠭᠡᠨ ᠤ ᠬᠠᠮᠤᠭ ᠤᠨ ᠠᠩᠬᠠᠨ ᠤ ᠵᠠᠪᠢ ᠳᠦᠷᠢᠶᠡᠰᠦᠯᠡᠭᠴᠢ ᠪᠤᠯᠤᠯᠳᠠᠢ᠃ ᠭᠠᠷᠮᠠᠵᠠᠪ ᠳᠡᠭᠦᠨ ᠢ ᠠᠵᠢᠭᠯᠠᠨ᠂ ᠬᠦᠰᠡᠭᠰᠡᠨ᠂ ᠬᠦᠰᠡᠭᠡ ᠦᠭᠡᠢ ᠬᠠᠷᠠᠴᠠ ᠳᠠᠭᠠᠭᠤᠯᠤᠨ ᠰᠠᠭᠤᠨ᠎ᠠ᠃ ᠴᠠᠭᠠᠨ ᠵᠠᠪᠢ ᠠᠷᠤ ᠠᠴᠠ ᠪᠠᠨ ᠬᠦᠭᠡᠰᠦ ᠰᠠᠬᠠᠷᠠᠭᠤᠯᠤᠨ ᠤᠰᠤᠨ ᠵᠠᠮ ᠳᠠᠳᠠᠭᠤᠯᠤᠨ ᠭᠤᠷᠳᠢᠭᠯᠠᠨ ᠳᠤᠭᠤᠷᠢᠵᠤ ᠳᠠᠪᠬᠢᠬᠤ ᠨᠢ ᠡᠬᠡ ᠪᠠᠨ ᠳᠤᠭᠤᠷᠢᠨ ᠴᠢᠪᠬᠠᠳᠠᠬᠤ ᠨᠢᠯᠬ᠎ᠠ ᠤᠨᠠᠭ᠎ᠠ ᠮᠡᠳᠦ ᠡᠷᠭᠡ ᠳᠤᠷ᠎ᠠ ᠪᠠᠷ ᠢᠶᠠᠨ᠃ ᠠᠯᠢᠪᠠ ᠶᠠᠭᠤᠮ᠎ᠠ ᠡᠷᠭᠡ ᠳᠤᠷ᠎ᠠ ᠪᠠᠷ ᠢᠶᠠᠨ ᠪᠠᠶᠢᠬᠤ ᠳᠤᠰᠤᠮ ᠵᠢᠷᠭᠠᠯᠳᠠᠢ ᠬᠠᠷᠠᠭᠳᠠᠬᠤ ᠠᠵᠢ᠃ ᠵᠠᠪᠢ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠭᠡᠳᠦᠷᠡᠵᠤ ᠪᠤᠯᠬᠤ ᠦᠭᠡᠢ ᠬᠢᠵᠠᠭᠠᠷ ᠤᠨ ᠳᠡᠮᠳᠡᠭ ᠪᠤᠯᠬᠤ ᠬᠦᠪᠦᠭᠴᠢ ᠬᠦᠷᠢᠶ᠎ᠡ ᠤᠷᠤᠭᠤ ᠬᠤᠷᠳᠤ ᠪᠠᠨ ᠬᠠᠰᠤᠨ ᠠᠭᠠᠵᠢᠭᠤᠬᠠᠨ ᠳᠦᠭᠦᠭᠰᠡᠨ ᠢᠶᠠᠨ ᠴᠠᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠤᠯᠬᠤ ᠦᠭᠡᠢ ᠳᠤ ᠬᠠᠷᠠᠮᠰᠠᠨ ᠶᠡᠭᠡ ᠶᠡᠭᠡ ᠰᠠᠨᠠᠭ᠎ᠠ ᠠᠯᠳᠠᠬᠤ ᠮᠡᠳᠦ ᠤᠭᠵᠤᠮ ᠬᠠᠭᠠᠵᠠ ᠪᠠᠨ ᠨᠡᠮᠡᠨ ᠪᠤᠴᠠᠨ ᠴᠢᠪᠬᠠᠳᠠᠪᠠ᠃ ᠳᠡᠶᠢᠮᠦ ᠡ᠂ ᠳᠡᠷᠡ ᠵᠠᠪᠢ ᠳᠡᠭᠦᠨ ᠠᠴᠠ ᠴᠠᠭᠠᠰᠢ ᠶᠠᠪᠤᠵᠤ ᠪᠤᠯᠬᠤ ᠦᠭᠡᠢ᠃ ᠶᠠᠭ ᠡᠨᠡ ᠭᠱᠡᠨ ᠨᠢ ᠭᠠᠷᠮᠠᠵᠠᠪ ᠲᠠᠢ ᠶᠠᠮᠠᠷ ᠨᠢᠭᠡᠨ ᠰᠢᠵᠢᠮ ᠢᠶᠠᠷ ᠳᠦᠰᠳᠡᠢ ᠴᠦ ᠶᠤᠮ ᠰᠢᠭ᠃        ᠭᠠᠷᠮᠠᠵᠠᠪ ᠴᠦ ᠭᠡᠰᠡᠨ ᠡᠨᠡ ᠨᠠᠭᠤᠷ ᠢ ᠭᠠᠳᠤᠯᠤᠨ ᠳᠡᠷᠳᠡᠭᠡ ᠳᠡᠭᠷᠢ ᠶᠢᠨ ᠬᠠᠶᠠᠭᠠᠨ ᠠᠴᠠ ᠮᠠᠨᠳᠤᠬᠤ ᠨᠠᠷᠠᠨ ᠵᠦᠭ ᠶᠠᠪᠤᠬᠤ ᠬᠦᠰᠡᠯ ᠳᠦᠢᠯ ᠤᠨ ᠶᠡᠭᠡ ᠪᠤᠢ᠃ ᠭᠡᠪᠡᠴᠦ ᠴᠢᠳᠠᠬᠤ ᠦᠭᠡᠢ ᠯᠠ ᠪᠠᠶᠢᠨ᠎ᠠ᠃ ᠬᠦᠰᠡᠬᠦ ᠦᠭᠡᠢ ᠳᠡᠭᠡᠨ ᠴᠦ ᠪᠢᠰᠢ᠃ ᠬᠦᠰᠡᠭᠦ ᠶᠢᠨ ᠳᠡᠭᠡᠳᠦ ᠪᠠᠷ ᠬᠦᠰᠡᠵᠤ ᠪᠠᠶᠢᠭ᠎ᠠ᠃ ᠬᠠᠷᠢᠨ ᠪᠤᠯᠬᠤ ᠦᠭᠡᠢ ᠳᠡᠭᠡᠨ ᠪᠠᠶᠢᠨ᠎ᠠ ᠤᠤ᠂ ᠡᠰᠡᠪᠡᠯ ᠪᠤᠯᠤᠮᠵᠢ ᠦᠭᠡᠢ ᠳᠡᠭᠡᠨ ᠪᠠᠶᠢᠨ᠎ᠠ ᠤᠤ︖ ᠴᠤᠬᠤᠮ ᠶᠠᠭᠠᠬᠢᠭᠠᠳ ᠶᠤᠮ ᠪᠤᠯ︖ ᠭᠠᠷᠮᠠᠵᠠᠪ ᠲᠤ ᠳᠡᠷᠳᠡᠭᠡ ᠪᠠᠭ᠎ᠠ ᠶᠢᠨ ᠶᠠᠪᠤᠳᠠᠯ ᠰᠠᠨᠠᠭᠠᠨ ᠳᠤ ᠪᠠᠭᠤᠨ᠎ᠠ᠃ ᠳᠡᠳᠡᠨ ᠤ ᠡᠪᠦᠭᠡ ᠶᠢ ᠨᠤᠳᠤᠭ ᠤᠰᠤᠨ ᠤ ᠬᠢᠨ ᠨᠢ ᠪᠠᠷᠠᠭᠠᠨ ᠯᠤᠪᠰᠠᠩ ᠭᠡᠨ᠎ᠡ᠃ ︽ᠪᠠᠷᠠᠭᠠᠨ ᠤ ᠬᠢ ᠳᠡᠨᠳᠡ ᠵᠤᠰᠠᠵᠤ ᠪᠠᠶᠢᠭ᠎ᠠ ᠂ ᠪᠠᠷᠠᠭᠠᠨ ᠤ ᠠᠳᠤᠭᠤ ᠬᠤᠷᠳᠤ ᠰᠠᠶᠢᠳᠠᠢ︾ ᠭᠡᠵᠤ ᠨᠤᠳᠤᠭ ᠤᠨ ᠳᠦᠮᠡᠨ ᠠᠮᠠ ᠳᠠᠮᠵᠢᠨ ᠶᠠᠷᠢᠳᠠᠭ ᠰᠠᠨ᠃ ᠰᠢᠩᠭᠡᠨ ᠰᠢᠷ᠎ᠠ ᠴᠢᠷᠠᠢ ᠲᠠᠢ ᠯᠤᠪᠰᠠᠩ ᠢ ᠶᠠᠭᠠᠬᠢᠭᠠᠳ ᠪᠠᠷᠠᠭᠠᠨ ᠭᠡᠬᠦ ᠪᠤᠯᠪᠠ ᠭᠡᠬᠦ ᠪᠠᠷ ᠳᠡᠳᠡᠨ ᠤ ᠬᠢ ᠪᠠᠷᠠᠭᠠᠨ ᠭᠤᠤᠯᠳᠠᠭᠤ ᠠᠳᠤᠭᠤ ᠲᠠᠢ᠃ ᠪᠠᠷᠠᠭᠠᠨ ᠪᠠᠷᠠᠭᠠᠨ ᠳᠠᠭᠠᠨ ᠬᠠᠷ᠎ᠠ ᠭᠤᠤᠯᠳᠠᠢ ᠤᠯᠠᠭᠠᠨ ᠭᠡᠭᠡᠷ ᠵᠢᠰᠦᠮ ᠤᠨ ᠠᠳᠤᠭᠤ ᠵᠤᠩᠬᠢᠯᠠᠨ᠎ᠠ᠃ ᠳᠡᠭᠡᠭᠡᠳ ᠦᠩᠭᠡ ᠳᠠᠭᠠᠭᠠᠳ ᠬᠠᠷ᠎ᠠ᠂ ᠬᠠᠯᠳᠠᠷ᠂ ᠬᠦᠷᠡᠩ᠂ ᠵᠡᠭᠡᠷᠳᠡ ᠭᠡᠳ ᠦᠷᠭᠦᠯᠵᠢᠯᠡᠨ᠎ᠡ᠃ ᠴᠠᠭᠠᠨ᠂ ᠪᠤᠷᠤ ᠵᠢᠰᠦᠮ ᠤᠨ ᠠᠳᠤᠭᠤ ᠪᠦᠷ ᠪᠠᠶᠢᠬᠤ ᠦᠭᠡᠢ᠃ ᠬᠠᠷᠢᠨ ᠬᠤᠯᠠ᠂ ᠰᠢᠷᠭ᠎ᠠ ᠵᠢᠰᠦᠮ ᠤᠨ ᠠᠳᠤᠭᠤ ᠭᠠᠭᠴᠠ ᠨᠢᠭᠡ ᠠᠴᠠ ᠭᠡᠳᠦᠷᠡᠬᠦ ᠦᠭᠡᠢ᠃ ᠳᠡᠶᠢᠮᠦ ᠠᠴᠠ ᠪᠠᠷᠠᠭᠠᠨ ᠯᠤᠪᠰᠠᠩ ᠭᠡᠮᠡᠨ ᠨᠡᠷᠡᠶᠢᠳᠦᠨ᠎ᠡ᠃        ᠲᠡᠷᠡ ᠵᠢᠯ ᠭᠠᠷᠮᠠᠵᠠᠪ ᠶᠡᠭᠡ ᠳᠤᠵᠢᠯ ᠤᠨ ᠦᠪᠦᠷ ᠬᠦᠨᠳᠡᠢ ᠳᠤ ᠵᠤᠰᠠᠵᠤ ᠪᠠᠶᠢᠭᠰᠠᠨ ᠡᠪᠦᠭᠡ ᠶᠢᠨ ᠳᠡᠭᠡᠨ ᠦᠨᠵᠢᠬᠦ ᠪᠤᠯᠪᠠ᠃ ᠡᠨᠡ ᠬᠦᠨᠳᠡᠢ ᠤᠷᠢᠳᠦ ᠨᠢ ᠶᠡᠭᠡ ᠨᠠᠮᠤᠭᠠᠷᠬᠠᠭ ᠴᠢᠬᠢᠭᠯᠢᠭ ᠬᠦᠨᠳᠡᠢ ᠪᠠᠶᠢᠭᠰᠠᠨ ᠢᠶᠠᠨ ᠰᠡᠭᠦᠯ ᠤᠨ ᠵᠢᠯ ᠤᠳ ᠲᠤ ᠡᠷᠡᠰ ᠬᠠᠭᠤᠷᠠᠶᠢᠰᠢᠨ᠂ ᠠᠳᠡ ᠳᠡᠨᠳᠡ ᠦᠭᠡᠢ ᠴᠠᠬᠢᠯᠳᠠᠭ ᠠᠷᠵᠠᠶᠢᠵᠤ᠂ ᠬᠤᠵᠢᠷ ᠴᠠᠶᠢᠷᠠᠭᠰᠠᠨ ᠬᠦᠨᠳᠡᠢ ᠪᠤᠯᠤᠭᠰᠠᠨ ᠪᠠᠶᠢᠪᠠ᠃ ᠵᠤᠨ ᠤ ᠡᠳᠦᠷ ᠤᠨ ᠬᠠᠯᠠᠭᠤᠨ ᠤ ᠡᠷᠴᠢ ᠨᠤᠭᠤᠷᠠᠵᠤ᠂ ᠶᠡᠭᠡ ᠦᠳᠡ ᠶᠢᠨ ᠨᠠᠷᠠ ᠪᠠᠷᠠᠭᠤᠨ᠎ᠠ ᠬᠡᠯᠪᠠᠶᠢᠵᠤ᠂ ᠭᠠᠷᠮᠠᠵᠠᠪ ᠬᠦᠦ ᠭᠡᠷ ᠤᠨ ᠰᠡᠭᠦᠳᠡᠷ ᠪᠠᠷᠠᠳᠠᠨ ᠭᠡᠭᠦᠦ᠂ ᠰᠠᠭᠠᠮᠠᠨ ᠤ ᠬᠤᠭᠤᠷᠤᠨᠳᠦ ᠨᠦᠢᠷᠮᠤᠭᠯᠠᠨ ᠨᠤᠵᠤᠭᠤᠷᠠᠵᠤ ᠰᠠᠭᠤᠳᠠᠯ᠎ᠠ ᠡᠪᠦᠭᠡ ᠨᠢ ᠦᠨᠳᠦᠰᠦᠨ ᠠᠵᠢᠯ ᠪᠤᠯᠬᠤ ᠨᠢᠳᠦ᠂ ᠳᠤᠷᠠᠨ ᠢᠶᠠᠨ ᠨᠡᠶᠢᠯᠡᠭᠦᠯᠦᠨ ᠰᠠᠭᠤᠭᠰᠠᠨ ᠢᠶᠠᠨ ᠭᠡᠨᠡᠳᠳᠡᠭᠡᠨ ᠬᠠᠷᠠᠭᠰᠠᠨ ᠵᠦᠢᠯᠡᠰ ᠠᠴᠠ ᠪᠠᠨ ᠰᠤᠴᠢᠭᠰᠠᠨ ᠠᠶᠠᠳᠠᠢ᠄        — ᠬᠦᠶ᠋ᠢ︕ ᠡᠨᠡ ᠴᠢᠨᠢ᠂ ᠶᠠᠭᠤᠨ ᠭᠠᠭᠴᠠ ᠠᠳᠤᠭᠤ ᠭᠠᠷᠤᠭᠠᠳ ᠢᠷᠡᠳᠡᠭ ᠪᠢᠯᠡ︖ ᠭᠡᠵᠤ ᠠᠮᠠᠨ ᠳᠠᠭᠠᠨ ᠰᠢᠪᠡᠨᠡᠭᠡᠳ᠂ ᠤᠯᠠᠮ ᠯᠠᠪᠰᠢᠷᠠᠭᠤᠯᠤᠨ ᠳᠤᠷᠠᠨᠳᠠᠪᠠ᠃ ᠭᠠᠷᠮᠠᠵᠠᠪ ᠡᠪᠦᠭᠡ ᠶᠢᠨ ᠢᠶᠠᠨ ᠳᠤᠷᠠᠨᠳᠠᠵᠤ ᠪᠤᠢ ᠵᠦᠭ ᠬᠠᠷᠠᠪᠠᠯ ᠳᠡᠳᠡᠨ ᠤ ᠵᠡᠭᠦᠨᠳᠡᠢ ᠬᠢ ᠦᠵᠦᠭᠦᠷ ᠳᠤᠯᠤᠭᠠᠢ ᠶᠢᠨ ᠢᠷᠤᠭᠠᠯ ᠢᠶᠠᠷ ᠭᠠᠭᠴᠠ ᠪᠤᠷᠤ ᠮᠤᠷᠢ ᠳᠤᠷᠤᠯᠵᠠᠳᠠᠯ᠎ᠠ ᠶᠦᠷᠭᠡᠭᠦᠯᠦᠭᠰᠡᠭᠡᠷ ᠭᠠᠷᠴᠤ ᠢᠷᠡᠭᠡᠳ ᠡᠶᠢᠰᠢ ᠳᠡᠶᠢᠰᠢ ᠭᠡᠰᠡᠭ ᠬᠠᠷᠠᠭᠠᠴᠢᠯᠠᠨ ᠵᠤᠭᠰᠤᠭᠰᠠᠨ ᠢᠶᠠᠨ᠂ ᠭᠡᠵᠢᠶ᠎ᠡ ᠶᠠᠵᠢᠶᠠᠨ ᠤ ᠮᠡᠳᠡᠳᠡᠭ ᠶᠤᠮ ᠰᠢᠭ ᠪᠦᠭᠡᠮ ᠴᠠᠬᠢᠯᠳᠠᠭ ᠳᠤᠮᠳᠠᠭᠤᠷ ᠬᠤᠳᠳᠤᠭ ᠴᠢᠭᠯᠡᠨ ᠱᠤᠭᠰᠢᠪᠠ᠃ ᠳᠡᠭᠡᠳᠡᠯ᠎ᠡ ᠡᠪᠦᠭᠡ ᠨᠢ᠄        — ᠡᠪᠡᠢ᠂ ᠡᠪᠡᠢ ᠬᠠᠳᠠᠵᠤ ᠦᠭᠦᠭᠦ ᠭᠡᠵᠤ ᠶᠠᠪᠤᠭ᠎ᠠ ᠠᠴᠠ ᠵᠠᠶᠢᠯᠠᠬᠤ ᠦᠭᠡᠢ᠃ ᠭᠠᠷᠮᠠᠵᠠᠪ᠂ ᠬᠦᠦ ᠮᠢᠨᠢ ᠶᠠᠪᠤᠭᠠᠷᠠᠢ᠃ ᠤᠴᠢᠵᠤ ᠰᠠᠮᠰᠠ ᠶᠢ ᠨᠢ ᠳᠡᠪᠳᠦᠭᠡᠭᠡᠷᠡᠢ ᠭᠡᠬᠦ ᠳᠠᠭᠤᠨ ᠢᠶᠠᠷ ᠤᠶᠢᠳᠴᠦ ᠰᠠᠭᠤᠭᠰᠠᠨ ᠭᠠᠷᠮᠠᠵᠠᠪ ᠠᠰᠢᠭᠦᠢ ᠬᠢᠬᠦ ᠶᠠᠭᠤᠮ᠎ᠠ ᠲᠠᠢ ᠪᠤᠯᠤᠭᠰᠠᠨ ᠳᠠᠭᠠᠨ ᠪᠠᠶᠠᠰᠤᠨ ᠤᠬᠤᠰᠬᠢᠨ ᠤᠶᠠᠭ᠎ᠠ ᠤᠷᠤᠭᠤ ᠬᠦᠶᠦᠬᠦ ᠳᠤ᠂        — ᠵᠦᠭᠡᠯᠡᠨ ᠤᠴᠢᠭᠠᠷᠠᠢ᠂ ᠴᠢ᠃ ᠠᠶᠤᠵᠤ ᠡᠮᠢᠶᠡᠵᠤ ᠶᠠᠪᠤᠭ᠎ᠠ ᠠᠮᠢᠳᠠᠨ ᠢ ᠦᠷᠭᠦᠭᠡᠴᠢᠭᠡᠬᠦ ᠪᠤᠢ ᠡ︕ ᠭᠡᠵᠤ ᠵᠠᠬᠢᠬᠤ᠂ ᠵᠠᠩᠳᠤᠷᠬᠤ ᠶᠢᠨ ᠬᠤᠭᠤᠷᠤᠨᠳᠦ ᠭᠡᠯᠡᠪᠡ᠃        ᠭᠠᠭᠴᠠ ᠮᠤᠷᠢ ᠤᠰᠤᠯᠠᠬᠤ ᠶᠢᠨ ᠳᠦᠯᠦᠭᠡ ᠶᠠᠭᠤᠨ ᠳᠤ ᠢᠩᠬᠢᠵᠤ ᠶᠡᠭᠡ ᠴᠢᠬᠤᠯᠠᠴᠢᠯᠠᠬᠤ ᠶᠢ ᠭᠠᠷᠮᠠᠵᠠᠪ ᠭᠠᠶᠢᠬᠠᠭᠰᠠᠨ ᠭᠡᠳᠦᠢ ᠴᠦ ᠤᠶᠢᠯᠠᠭᠠᠭᠰᠠᠨ ᠦᠭᠡᠢ᠃ ᠳᠡᠭᠦᠨ ᠢ ᠬᠤᠳᠳᠤᠭ ᠳᠡᠭᠡᠷ᠎ᠡ ᠢᠷᠡᠭ᠊ ᠳᠤ ᠪᠤᠷᠤ ᠮᠤᠷᠢ ᠦᠷᠭᠦᠭᠦ ᠠᠶᠠᠳᠠᠢ ᠵᠢᠭᠠᠬᠠᠨ ᠴᠠᠭᠠᠰᠢᠯᠠᠪᠠᠴᠤ ᠳᠡᠭᠡᠳᠡᠯ᠎ᠡ ᠪᠠᠨ ᠬᠤᠯᠠ ᠱᠤᠭᠰᠢᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠦᠭᠡᠢ᠃ ᠤᠰᠤᠨ ᠤ ᠦᠨᠦᠷ ᠠᠪᠤᠭᠰᠠᠨ ᠢᠶᠠᠨ ᠮᠡᠳᠡᠭᠳᠡᠬᠦ ᠭᠡᠰᠡᠨ ᠮᠡᠳᠦ ᠡᠷᠬᠢᠨ ᠡᠷᠬᠢᠨ ᠰᠤᠷᠳᠤᠯᠵᠠᠨ᠎ᠠ᠃ ᠡᠬᠢᠨ ᠤ ᠬᠤᠪᠤᠭ᠎ᠠ ᠪᠠᠨ ᠳᠠᠳᠠᠨ ᠶᠡᠭᠦᠯᠡᠬᠦ ᠳᠤ ᠡᠳᠦᠷ ᠤᠨ ᠨᠠᠷᠠᠨ ᠳᠤ ᠬᠠᠳᠠᠵᠤ ᠠᠷᠭᠠᠭᠰᠠᠨ ᠮᠤᠳᠤᠨ ᠤᠩᠭᠤᠴᠠᠨ ᠤ ᠢᠷᠤᠭᠠᠯ ᠢᠶᠠᠷ ᠬᠦᠢᠳᠡᠨ ᠤᠰᠤ ᠬᠠᠷ᠎ᠠ ᠵᠢᠷᠤᠭ᠎ᠠ ᠳᠠᠳᠠᠭᠤᠯᠤᠭᠰᠠᠭᠠᠷ ᠠᠭᠤᠷᠳᠠᠢ ᠴᠦ ᠶᠤᠮ ᠰᠢᠭ᠋ ᠤᠷᠤᠰᠪᠠ᠃ ᠳᠡᠷᠡᠭᠦᠭᠡᠨ ᠭᠱᠡᠨ ᠳᠤ ᠨᠤᠷᠴᠦ ᠪᠤᠢ ᠤᠩᠭᠤᠴᠠᠨ ᠠᠴᠠ ᠴᠢᠬᠢᠭ ᠤᠨ ᠠᠭᠤᠷᠰᠢᠮᠠᠯ ᠦᠨᠦᠷ ᠬᠠᠩᠬᠤᠯᠤᠨ᠎ᠠ᠃ ᠳᠦᠳᠡᠯ ᠦᠭᠡᠢ ᠤᠩᠭᠤᠴᠠ ᠳᠦᠭᠦᠷᠡᠩ ᠤᠰᠤ ᠴᠡᠪᠭᠡᠯᠵᠡᠵᠤ᠂ ᠤᠩᠭᠤᠴᠠᠨ ᠤ ᠠᠩᠭᠠᠷᠬᠠᠢ ᠴᠤᠭᠤᠷᠬᠠᠢ ᠪᠠᠷ ᠰᠠᠪᠢᠷᠠᠨ ᠱᠤᠵᠢᠬᠢᠨᠠᠬᠤ ᠨᠢ ᠰᠤᠨᠤᠰᠳᠠᠨ᠎ᠠ᠃ ᠪᠤᠷᠤ ᠭᠡᠳᠦᠢ ᠠᠮᠠ ᠨᠢ ᠴᠠᠩᠭᠠᠭᠰᠠᠨ ᠭᠡᠳᠦᠢ ᠴᠦ ᠭᠠᠷᠮᠠᠵᠠᠪ ᠠᠴᠠ ᠦᠷᠭᠦᠭᠡᠳ ᠤᠶᠢᠷᠠᠳᠴᠦ ᠴᠢᠳᠠᠬᠤ ᠦᠭᠡᠢ ᠪᠠᠶᠢᠭ᠎ᠠ ᠶᠢ ᠠᠩᠵᠠᠭᠠᠷᠠᠵᠤ᠂ ᠤᠨᠤᠵᠤ ᠢᠷᠡᠭᠰᠡᠨ ᠬᠦᠷᠡᠩ ᠮᠤᠷᠢ ᠪᠠᠨ ᠠᠮᠠᠭᠠᠶᠢᠪᠴᠢᠯᠠᠨ ᠤᠰᠤᠯᠠᠪᠠ᠃ ᠳᠡᠭᠡᠳᠡᠯ᠎ᠡ ᠪᠤᠷᠤ ᠮᠤᠷᠢ ᠬᠠᠮᠠᠷ ᠢᠶᠠᠨ ᠳᠤᠤᠭᠠᠷᠭᠠᠨ ᠬᠤᠯᠮᠠᠯᠵᠠᠨ ᠬᠤᠯᠮᠠᠯᠵᠠᠭᠰᠠᠭᠠᠷ ᠬᠦᠷᠡᠩ ᠮᠤᠷᠢᠨ ᠤ ᠴᠠᠭᠠᠭᠤᠷ ᠳᠤᠭᠤᠷᠢᠨ ᠤᠩᠭᠤᠴᠠ ᠲᠠᠢ ᠤᠰᠤᠨ ᠠᠴᠠ ᠰᠢᠮᠡᠯ᠎ᠡ᠃ ᠪᠤᠷᠤ ᠮᠤᠷᠢᠨ ᠤ ᠰᠤᠭᠤ ᠴᠠᠪᠢ᠂ ᠬᠤᠭᠤᠯᠠᠢ ᠭᠡᠩᠭᠦᠳᠡᠭ ᠤᠨ ᠨᠤᠭᠤᠯᠤᠭ᠎ᠠ᠂ ᠴᠢᠬᠢᠨ ᠤ ᠤᠭ ᠭᠡᠳ ᠨᠢᠮᠭᠡᠨ ᠠᠷᠠᠰᠤ ᠲᠠᠢ ᠭᠡᠰᠡᠭ ᠬᠦᠯᠦᠷᠡᠭᠰᠡᠨ ᠬᠠᠷᠠᠭᠳᠠᠨ᠎ᠠ᠃ ᠳᠠᠰᠢᠶᠠᠨ ᠳᠤᠯᠤᠭᠠᠢ ᠨᠢ ᠳᠤᠪᠤᠶᠢᠨ᠂ ᠰᠦᠪᠡᠭᠡᠨ ᠤ ᠨᠢ ᠭᠡᠳᠦᠨ ᠬᠠᠪᠢᠷᠭ᠎ᠠ ᠡᠷᠡᠶᠢᠵᠤ᠂ ᠭᠡᠳᠡᠰᠦ ᠨᠡᠯᠢᠶᠡᠳ ᠳᠠᠳᠠᠭᠰᠠᠨ ᠪᠤᠷᠤ ᠮᠤᠷᠢ ᠬᠦᠬᠡ ᠮᠢᠬ᠎ᠠ ᠪᠠᠨ ᠪᠦᠩᠵᠢᠭᠡᠨᠡᠳᠡᠯ᠎ᠡ ᠴᠢᠴᠢᠭᠡᠨᠡᠭᠦᠯᠦᠨ᠂ ᠪᠦᠷᠢᠶᠡᠯᠡᠨ ᠰᠠᠷᠳᠠᠯᠵᠠᠬᠤ ᠬᠠᠮᠠᠷ ᠤᠨ ᠢᠶᠠᠨ ᠨᠦᠭᠡ ᠪᠠᠷ ᠤᠰᠤ ᠭᠠᠷᠳᠠᠯ᠎ᠠ ᠤᠤᠭᠤᠪᠠ᠃ ᠳᠡᠭᠦᠨ ᠤ ᠭᠡᠩᠭᠦᠳᠡᠭ ᠴᠡᠭᠡᠵᠢ᠂ ᠭᠤᠶ᠎ᠠ ᠬᠠ ᠭᠡᠳ ᠠᠳᠡ ᠳᠡᠨᠳᠡ ᠦᠭᠡᠢ ᠰᠢᠪᠠᠷ ᠰᠢᠪᠠᠭ᠋ᠠᠢ ᠨᠠᠭᠠᠯᠳᠤᠨ ᠬᠠᠳᠠᠭᠰᠠᠨ ᠢ ᠬᠠᠷᠠᠬᠤ ᠳᠤ ᠬᠤᠯᠠ ᠭᠠᠵᠠᠷ ᠳᠤᠭᠤᠰᠢᠳᠠᠢ ᠶᠠᠪᠤᠭᠰᠠᠨ ᠨᠢ ᠢᠯᠡᠳᠳᠡ᠃ ᠭᠠᠷᠮᠠᠵᠠᠪ ᠡᠨᠡ ᠪᠦᠭᠦᠳᠡ ᠶᠢ ᠬᠠᠷᠠᠨ ︽ᠡᠨᠡ ᠶᠠᠭᠠᠬᠢᠴᠢᠬᠠᠭᠰᠠᠨ ᠮᠤᠷᠢ ᠶᠤᠮ ᠪᠤᠯ ᠳ᠋ᠠ︖ ᠮᠠᠨ ᠤ ᠤᠷᠤᠭ᠎ᠠ ᠬᠠᠷ᠎ᠠ ᠰᠢᠭ᠋ ᠪᠠᠰᠠ ᠤᠷᠭ᠎ᠠ ᠪᠠᠷᠢᠭᠰᠠᠨ ᠬᠦᠮᠦᠨ ᠦᠵᠡᠵᠤ ᠴᠢᠳᠠᠳᠠᠭ ᠦᠭᠡᠢ ᠠᠭᠤᠷ ᠪᠠᠷᠠᠭᠰᠠᠨ ᠠᠳᠤᠭᠤ ᠶᠤᠮ ᠪᠤᠯᠪᠠ ᠤᠤ︾ ᠭᠡᠵᠤ ᠪᠤᠳᠤᠵᠤ ᠰᠠᠭᠤᠳᠠᠯ᠎ᠠ ᠠᠷᠤ ᠳᠤᠨᠢ ᠭᠡᠨᠡᠳᠳᠡ ᠡᠪᠦᠭᠡ ᠶᠢᠨ ᠬᠢᠨᠢ ᠳᠠᠭᠤ ᠭᠠᠷᠴᠤ᠄        — ᠡᠪᠡᠢ᠂ ᠡᠪᠡᠢ ᠭᠡᠬᠦ ᠳᠤ ᠬᠦᠦ ᠮᠤᠷᠢ ᠬᠤᠶᠠᠷ ᠪᠤᠨᠳᠤᠭᠤᠰ ᠬᠢᠳᠡᠯ᠎ᠡ ᠰᠤᠴᠢᠪᠠ᠃ ᠡᠪᠦᠭᠡ ᠨᠢ ᠠᠩᠵᠠᠭᠠᠷᠠᠭᠰᠠᠨ ᠰᠢᠨᠵᠢ ᠦᠭᠡᠢ᠄        — ᠬᠠᠮᠢᠭ᠎ᠠ ᠠᠴᠠ ᠬᠦᠶᠦᠵᠤ ᠶᠠᠪᠤᠭ᠎ᠠ ᠶᠤᠮ ᠪᠤᠯ ᠳ᠋ᠠ︖ ᠬᠠᠷᠠᠬᠤ ᠳᠤ ᠵᠠᠯᠠᠭᠤ ᠯᠠ ᠠᠳᠤᠭᠤ ᠬᠠᠷᠠᠭᠳᠠᠬᠤ ᠶᠤᠮ᠃ ᠰᠢᠨᠳᠠᠰᠤ ᠲᠠᠢ ᠯᠠ ᠠᠷᠭᠤᠮᠠᠭ ᠶᠤᠮ ᠳ᠋ᠠ᠃ ᠮᠢᠨᠤ ᠬᠦᠦ ᠱᠠᠪᠠᠢ ᠶᠢ ᠨᠢ ᠬᠠᠨᠤᠳᠠᠯ᠎ᠠ ᠤᠰᠤᠯᠠᠭᠠᠷᠠᠢ᠃ ᠤᠭᠵᠤᠮ ᠦᠷᠭᠦᠭᠡᠵᠤ ᠠᠶᠤᠯᠭᠠᠵᠤ ᠪᠤᠯᠬᠤ ᠦᠭᠡᠢ ᠰᠢᠦ᠃ ᠳᠡᠭᠡᠪᠡᠯ ᠬᠦᠮᠦᠨ ᠪᠠᠷᠠᠳᠠᠵᠤ ᠤᠮᠳᠠ ᠵᠠᠯᠭᠠᠬᠤ ᠪᠠᠨ ᠪᠤᠯᠢᠴᠢᠬᠠᠨ᠎ᠠ᠃ ᠬᠦᠭᠡᠷᠦᠭᠦᠢ ᠮᠢᠨᠢ᠂ ᠬᠠᠮᠢᠭ᠎ᠠ ᠬᠦᠷᠳᠡᠯ᠎ᠡ ᠴᠦ ᠶᠠᠪᠤᠬᠤ ᠭᠡᠵᠤ ᠪᠠᠶᠢᠭ᠎ᠠ ᠶᠤᠮ ᠪᠢᠯᠡ ᠭᠡᠵᠤ ᠶᠡᠬᠡᠳᠡ ᠬᠠᠶᠢᠷᠠᠯᠠᠭᠰᠠᠨ ᠦᠩᠭᠡ ᠪᠠᠷ ᠭᠡᠯᠡᠬᠦ ᠳᠤ᠂        — ᠡᠪᠦᠭᠡ ᠡ᠂ ᠡᠨᠡ ᠶᠠᠭᠠᠬᠢᠭᠰᠠᠨ ᠮᠤᠷᠢ ᠶᠤᠮ ᠪᠤᠢ︖ ᠮᠠᠨ ᠤ ᠬᠠᠷ᠎ᠠ ᠮᠤᠷᠢ ᠰᠢᠭ᠋ ᠤᠷᠤᠭ᠎ᠠ ᠶᠤᠮ ᠪᠤᠯᠪᠠ ᠤᠤ︖         — ᠦᠭᠡᠢ ᠳ᠋ᠠ᠂ ᠬᠦᠦ ᠮᠢᠨᠢ᠃ ᠡᠨᠡ ᠬᠦᠶᠦᠵᠤ ᠶᠠᠪᠤᠭ᠎ᠠ ᠠᠳᠤᠭᠤ ᠪᠠᠶᠢᠨ᠎ᠠ᠃        — ᠬᠦᠶᠦᠨ᠎ᠡ ᠭᠡᠵᠤ ᠶᠠᠭᠠᠬᠢᠳᠠᠭ ᠶᠤᠮ︖        — ᠬᠦᠶᠦᠨ᠎ᠡ ᠭᠡᠵᠤ ᠤᠤ︖ ᠬᠠᠮᠢᠭ᠎ᠠ ᠨᠢᠭᠡ ᠬᠠᠷᠢ ᠶᠢᠨ ᠨᠤᠳᠤᠭ ᠲᠤ ᠤᠴᠢᠭᠠᠳ᠂ ᠳᠡᠨᠳᠡ ᠪᠠᠨ ᠢᠳᠡᠭᠡᠰᠢᠵᠤ ᠳᠠᠰᠬᠤ ᠦᠭᠡᠢ᠂ ᠳᠦᠷᠦᠵᠤ ᠦᠰᠦᠭᠰᠡᠨ ᠨᠤᠳᠤᠭ ᠦᠭᠡᠳᠡ ᠪᠠᠨ ᠶᠠᠪᠤᠬᠤ ᠶᠢ ᠭᠡᠯᠡᠳᠡᠭ ᠶᠤᠮ᠃ ᠡᠶᠢᠮᠦ ᠬᠦᠶᠦᠮᠡᠯ ᠠᠳᠤᠭᠤ ᠳᠡᠶᠢᠮᠦ ᠴᠦ ᠤᠯᠠᠨ ᠪᠠᠶᠢᠳᠠᠭ ᠦᠭᠡᠢ ᠶᠤᠮ᠃ ᠰᠠᠶᠢᠨ ᠠᠳᠤᠭᠤᠨ ᠤ ᠯᠠ ᠰᠢᠨᠵᠢ ᠳ᠋ᠠ᠂ ᠬᠦᠦ ᠮᠢᠨᠢ᠃        — ᠶᠠᠭᠠᠬᠢᠭᠠᠳ ᠦᠭᠡᠷ᠎ᠡ ᠨᠤᠳᠤᠭ ᠲᠤ ᠤᠴᠢᠬᠤ ᠭᠡᠵᠤ︖        — ᠶᠠᠭᠠᠬᠢᠬᠤ ᠪᠤᠢ ᠳ᠋ᠠ᠂ ᠬᠦᠦ ᠮᠢᠨᠢ᠃ ᠠᠯᠳᠠᠭᠤᠯ ᠵᠦᠢᠭᠤᠯ ᠶᠠᠭᠤᠮᠠᠨ ᠳᠤ ᠬᠦᠭᠡᠭᠡᠭᠳᠡᠭᠰᠡᠨ ᠪᠠᠶᠢᠵᠤ ᠪᠤᠯᠤᠨ᠎ᠠ᠃ ᠡᠰᠡᠪᠡᠯ ᠠᠷᠠᠯᠵᠢᠶ᠎ᠠ ᠨᠠᠶᠢᠮᠠᠭ᠎ᠠ᠂ ᠠᠪᠴᠠᠭ᠎ᠠ ᠦᠭᠴᠡᠭᠡᠨ ᠳᠤ ᠴᠦ ᠶᠠᠪᠤᠭᠰᠠᠨ ᠪᠠᠶᠢᠵᠤ ᠪᠤᠯᠤᠨ᠎ᠠ᠃ ᠠᠮᠢᠳᠤᠷᠠᠯ ᠳᠤ ᠶᠡᠷᠦ ᠨᠢ ᠶᠠᠭᠤ ᠡᠰᠡ ᠳᠤᠬᠢᠶᠠᠯᠳᠤᠬᠤ ᠪᠤᠢ᠃ ᠬᠦᠮᠦᠨ ᠴᠦ ᠭᠡᠰᠡᠨ ᠦᠭᠡᠷ᠎ᠡ ᠴᠦ ᠦᠭᠡᠢ ᠰᠢᠦ ᠳ᠋ᠠ ᠭᠡᠳ ᠪᠠᠷᠠᠭᠤᠨ ᠳᠡᠶᠢᠰᠢ ᠨᠠᠷᠠᠨ ᠳᠤᠤᠭᠤᠷ ᠰᠠᠷᠠᠪᠴᠢᠯᠠᠨ ᠬᠠᠷᠠᠬᠤ ᠵᠠᠭᠤᠷ᠎ᠠ ᠪᠠᠨ᠂        — ᠵᠠ᠂ ᠬᠦᠦ ᠮᠢᠨᠢ᠂ ᠭᠡᠭᠦᠦ ᠳᠤ ᠭᠠᠷᠬᠤ ᠴᠠᠭ ᠪᠤᠯᠵᠤ ᠪᠠᠶᠢᠭ᠎ᠠ ᠶᠤᠮ ᠰᠢᠭ᠋ ᠪᠠᠶᠢᠨ᠎ᠠ᠂ ᠱᠠᠯᠠᠪᠯᠠᠭᠠᠷᠠᠢ ᠭᠡᠯ᠎ᠡ᠃ ᠪᠠᠷᠠᠭᠤᠨᠳᠠᠢ ᠠᠴᠠ ᠮᠠᠨ ᠤ ᠠᠳᠤᠭᠤ ᠭᠡᠭᠦᠨ ᠵᠡᠯ᠎ᠡ ᠤᠷᠤᠭᠤ ᠴᠤᠪᠤᠵᠤ ᠪᠠᠶᠢᠪᠠ᠃ ᠠᠳᠤᠭᠤᠨ ᠤ ᠬᠦᠯ ᠢᠶᠠᠷ ᠡᠪᠡᠰᠦ ᠨᠤᠭᠤᠭᠠᠨ ᠤ ᠳᠤᠭᠤᠰᠤ ᠫᠤᠷᠬᠢᠵᠤ᠂ ᠢᠯᠠᠭ᠎ᠠ ᠰᠢᠮᠠᠭᠤᠯ ᠪᠤᠵᠢᠬᠢᠨᠠᠯᠳᠤᠬᠤ ᠨᠢ ᠨᠠᠷᠠᠨ ᠤ ᠳᠤᠶᠠᠭᠠᠨ ᠳᠤ ᠳᠤᠭᠤᠰᠤᠷᠠᠨ ᠬᠠᠷᠠᠭᠳᠠᠨ᠎ᠠ᠃ ᠳᠦᠳᠡᠯ ᠦᠭᠡᠢ ᠪᠤᠷᠤ ᠮᠤᠷᠢ ᠬᠠᠨᠤᠪᠠ ᠪᠤᠯᠤᠯᠳᠠᠢ᠂ ᠬᠤᠳᠳᠤᠭ ᠤᠨ ᠬᠠᠵᠠᠭᠤᠬᠠᠨ ᠳᠤ ᠭᠡᠳᠦ ᠰᠠᠶᠢᠨ ᠬᠦᠷᠪᠡᠭᠡᠵᠤ ᠠᠪᠤᠭᠠᠳ ᠨᠢᠷᠤᠭᠤᠨ ᠳᠠᠭᠠᠨ ᠨᠠᠭᠠᠯᠳᠤᠭᠰᠠᠨ ᠡᠪᠡᠰᠦ ᠨᠤᠭᠤᠭ᠎ᠠ ᠶᠢ ᠤᠨᠠᠭᠠᠬᠤ ᠭᠡᠰᠡᠨ ᠰᠢᠭ ᠳᠤᠯᠤᠭᠠᠢ ᠠᠴᠠ ᠪᠠᠨ ᠠᠪᠤᠭᠤᠯᠤᠭᠠᠳ ᠪᠦᠭᠦᠢ ᠯᠠ ᠪᠡᠶ᠎ᠡ ᠪᠠᠨ ᠰᠡᠭᠰᠦᠷᠦᠨ ᠰᠢᠯᠭᠡᠭᠡᠪᠡ᠃ ᠳᠡᠭᠡᠭᠰᠡᠨ ᠢᠶᠠᠨ ᠠᠮᠠ ᠪᠠᠨ ᠶᠠᠶᠢᠵᠢᠢᠯᠭᠠᠨ ᠡᠪᠰᠢᠶᠡᠬᠦ ᠡᠶ᠎ᠡ ᠦᠵᠡᠭᠦᠯᠵᠤ᠂ ᠬᠤᠶᠠᠷ ᠭᠤᠷᠪᠠ ᠳᠤᠷᠬᠢᠭᠠᠳ ᠰᠠᠶ᠋ᠢ ᠨᠢᠭᠡ ᠪᠡᠶ᠎ᠡ ᠨᠢ ᠠᠮᠠᠷᠠᠪᠠ ᠭᠡᠯᠳᠡᠢ ᠪᠤᠯᠤᠭᠠᠳ ᠪᠠᠷᠠᠭᠤᠨ ᠳᠡᠶᠢᠰᠢ ᠠᠯᠬᠤᠯ᠎ᠠ᠃ ᠳᠡᠭᠡᠬᠦ ᠳᠤ ᠡᠪᠦᠭᠡ ᠨᠢ᠄        — ᠵᠠ ᠲᠡᠷᠡ᠂ ᠡᠨᠡ ᠮᠤᠷᠢ ᠴᠢᠮ᠎ᠠ ᠳᠤ ᠪᠠᠶᠠᠷᠯᠠᠵᠤ ᠪᠠᠶᠢᠨ᠎ᠠ᠃ ᠠᠳᠤᠭᠤ ᠪᠠᠶᠠᠷᠯᠠᠬᠤ ᠪᠠᠷ ᠢᠶᠠᠨ ᠡᠪᠰᠢᠶᠡᠳᠡᠭ ᠶᠤᠮ ᠭᠡᠵᠤ ᠰᠡᠳᠬᠢᠯ ᠨᠢ ᠬᠠᠨᠤᠭᠰᠠᠨ ᠪᠠᠶᠢᠷᠢ ᠲᠠᠢ ᠭᠡᠯᠡᠯ᠎ᠡ᠃ ᠪᠤᠷᠤ ᠮᠤᠷᠢ ᠠᠯᠬᠤᠯᠠᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠱᠤᠭᠰᠢᠵᠤ ᠡᠬᠢᠯᠡᠪᠡ᠃ ᠦᠭᠡᠳᠡ ᠠᠴᠠ ᠨᠢ ᠢᠷᠡᠵᠤ ᠶᠠᠪᠤᠭ᠎ᠠ ᠮᠠᠨ ᠤ ᠠᠳᠤᠭᠤ ᠶᠢ ᠵᠢᠭᠠᠬᠠᠨ ᠵᠠᠬᠠᠯᠠᠰᠬᠢᠭᠡᠳ ᠶᠡᠷᠦ ᠶᠠᠭᠤᠮᠠᠨ ᠳᠤ ᠰᠠᠳᠠᠭᠠᠷᠠᠬᠤ ᠰᠢᠨᠵᠢ ᠦᠭᠡᠢ ᠨᠠᠷᠠᠨ ᠰᠦᠷᠭᠡᠦ ᠶᠦᠷᠭᠡᠵᠤ ᠤᠳᠪᠠ᠃        — ᠠᠢ ᠳ᠋ᠠ᠂ ᠮᠥᠨ ᠴᠦ ᠰᠠᠶᠢᠬᠠᠨ ᠠᠮᠢᠳᠠᠨ ᠶᠤᠮ ᠳ᠋ᠠ ᠭᠡᠵᠤ ᠭᠡᠯᠡᠭᠡᠳ ᠡᠪᠦᠭᠡ ᠪᠠᠨ ᠨᠢᠭᠡ ᠶᠡᠭᠡ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠳᠤᠨᠢ ᠡᠷᠬᠢᠨ ᠬᠠᠷᠠᠪᠠᠯ ᠤᠨᠢᠭᠠᠷ ᠬᠤᠶᠠᠷ ᠨᠢᠳᠦᠨ ᠳᠤᠨᠢ ᠨᠢᠯᠪᠤᠰᠤ ᠴᠡᠶᠢᠯᠡᠯᠵᠡᠨ ᠪᠠᠶᠢᠬᠤ ᠶᠢ ᠦᠵᠡᠭᠡᠳ ᠶᠡᠬᠡᠳᠡ ᠭᠠᠶᠢᠬᠠᠵᠤ ᠪᠢᠯᠡ᠃ ᠡᠪᠦᠭᠡ ᠪᠠᠨ ᠤᠬᠢᠯᠠᠵᠤ ᠪᠠᠶᠢᠬᠤ ᠶᠢ ᠳᠡᠷᠡ ᠡᠮᠦᠨ᠎ᠡ ᠨᠢ ᠬᠠᠷᠠᠵᠤ ᠪᠠᠶᠢᠭ᠎ᠠ ᠦᠭᠡᠢ᠃ ᠭᠠᠷᠮᠠᠵᠠᠪ ᠢ ᠤᠨᠠᠭ᠎ᠠ ᠳᠠᠳᠠᠵᠤ ᠳᠠᠭᠤᠰᠬᠤ ᠳᠤ ᠴᠦ ᠭᠡᠰᠡᠨ ᠡᠪᠦᠭᠡ ᠭᠠᠪ ᠭᠠᠭᠴᠠᠭᠠᠷ ᠢᠶᠠᠨ ᠬᠤᠳᠳᠤᠭ ᠳᠡᠭᠡᠷ᠎ᠡ ᠶᠡᠭᠡ ᠯᠠ ᠤᠳᠠᠭᠠᠨ ᠰᠠᠭᠤᠭᠰᠠᠨ ᠶᠤᠮ ᠳ᠋ᠠᠭ᠃ ᠶᠠᠭᠠᠬᠢᠭᠠᠳ ᠢ ᠪᠤᠤ ᠮᠡᠳᠡ᠃        ᠡᠪᠦᠭᠡ ᠮᠢᠨᠢ ︽ᠡᠨᠡ ᠵᠠᠯᠠᠭᠤᠬᠠᠨ ᠠᠳᠤᠭᠤ ᠪᠠᠶᠢᠨ᠎ᠠ︾ ᠭᠡᠰᠡᠨ ᠰᠠᠨᠠᠭᠳᠠᠨ᠎ᠠ᠃ ᠤᠳᠤ ᠪᠤᠳᠤᠬᠤ ᠳᠤ ᠪᠠᠭ᠎ᠠ ᠠᠳᠤᠭᠤ ᠭᠡᠬᠦ ᠳᠤ ᠳᠡᠭᠦᠨ ᠳᠤ ᠶᠠᠭᠠᠬᠢᠭᠰᠠᠨ ᠴᠦ ᠶᠡᠭᠡ ᠵᠤᠷᠢᠭ ᠵᠢᠷᠦᠭᠡ᠂ ᠨᠤᠳᠤᠭ ᠢᠶᠠᠨ ᠭᠡᠰᠡᠨ ᠳᠡᠮᠡᠦᠯᠦᠯ ᠪᠠᠶᠢᠳᠠᠭ ᠶᠤᠮ᠃ ᠨᠤᠳᠤᠭ ᠲᠤᠨᠢ ᠭᠠᠩ ᠭᠠᠴᠢᠭ᠂ ᠪᠤᠷᠤᠭ᠎ᠠ ᠰᠢᠷᠤᠢ᠂ ᠴᠢᠨ᠋ᠸ᠎ᠠ ᠨᠤᠬᠠᠢ ᠭᠡᠳ ᠶᠠᠭᠤ ᠴᠦ ᠬᠦᠯᠢᠶᠡᠵᠤ ᠪᠠᠶᠢᠵᠤ ᠪᠤᠯᠤᠨ᠎ᠠ ᠰᠢᠦ ᠳ᠋ᠠ᠃ ᠳᠡᠭᠡᠬᠦ ᠳᠤ ᠶᠠᠮᠠᠷ ᠴᠦ ᠪᠠᠶᠢᠯ᠎ᠠ ᠭᠡᠰᠡᠨ ᠨᠤᠳᠤᠭ ᠤᠰᠤ ᠪᠠᠨ ᠭᠡᠵᠤ ᠳᠡᠮᠡᠦᠯᠦᠭᠰᠡᠨ ᠳᠡᠷᠡ ᠭᠠᠭᠴᠠ ᠠᠮᠢᠨ ᠳᠤ ᠶᠠᠮᠠᠷ ᠶᠡᠭᠡ ᠤᠳᠬ᠎ᠠ ᠤᠶᠠᠩᠭ᠎ᠠ ᠤᠷᠤᠰᠢᠨ᠎ᠠ ᠪᠤᠢ᠃ ᠡᠪᠦᠭᠡ ᠶᠢᠨ ᠮᠢᠨᠢ ᠤᠬᠢᠯᠠᠵᠤ ᠰᠠᠭᠤᠳᠠᠭ ᠠᠷᠭ᠎ᠠ ᠦᠭᠡᠢ ᠪᠠᠶᠢᠵᠠᠢ᠃ ᠭᠡᠳᠡᠯ᠎ᠡ ᠪᠢ ᠳᠡᠶᠢᠮᠦ ᠴᠦ ᠵᠠᠯᠠᠭᠤ ᠬᠦᠮᠦᠨ ᠪᠢᠰᠢ ᠰᠢᠦ ᠳ᠋ᠠ᠃ ᠮᠢᠨᠤ ᠨᠠᠰᠤ ᠪᠤᠯ ᠶᠠᠭᠤᠮ᠎ᠠ ᠶᠢ ᠤᠬᠠᠭᠠᠷᠠᠵᠤ᠂ ᠤᠴᠢᠷ ᠢ ᠳᠤᠩᠭᠠᠬᠤ ᠨᠠᠰᠤ᠃ ᠭᠡᠪᠡᠴᠦ ᠪᠢ ᠡᠨᠡ ᠬᠠᠷᠢ ᠤᠷᠤᠨ ᠳᠤ ᠰᠠᠭᠤᠭᠰᠠᠭᠠᠷ ᠯᠠ ᠪᠠᠶᠢᠬᠤ ᠶᠤᠮ ᠳ᠋ᠠ᠃        ᠲᠡᠷᠡ ᠤᠯᠠᠨ ᠪᠠᠷᠠᠭᠠᠨ ᠠᠳᠤᠭᠤ ᠶᠢ ᠰᠦᠷᠭᠡᠨ᠂ ᠰᠢᠩᠭᠡᠵᠤ ᠪᠤᠢ ᠨᠠᠷᠠᠨ ᠤ ᠰᠢᠷᠭᠤᠴᠢᠵᠤ ᠳᠤᠰᠤᠭᠰᠠᠨ ᠵᠦᠭᠡᠯᠡᠨ ᠰᠢᠷᠭᠠᠯ ᠳᠤᠶᠠᠭ᠎ᠠ ᠢᠰᠭᠦᠴᠢᠵᠤ ᠤᠳᠤᠭᠰᠠᠨ ᠭᠠᠭᠴᠠ ᠪᠦᠭᠡᠭᠡᠨ ᠠᠳᠤᠭᠤ ᠭᠠᠷᠮᠠᠵᠠᠪ ᠤᠨ ᠰᠡᠳᠬᠢᠯ ᠤᠨ ᠴᠢᠭᠳᠠᠭᠠᠨ ᠠᠴᠠ ᠴᠢᠩᠭᠠᠭᠠᠭᠰᠠᠭᠠᠷ ᠁        ᠭᠡᠨᠡᠳᠭᠡᠨ ᠰᠦᠷ ᠰᠠᠷ ᠬᠡᠬᠦ ᠴᠢᠮᠡᠭᠡ ᠭᠠᠷᠴᠦ᠂ ᠨᠢᠳᠦᠨ ᠤ ᠡᠮᠦᠨᠡᠭᠦᠷ ᠤᠷᠤᠭ ᠴᠠᠭᠠᠨ ᠰᠢᠪᠠᠭᠤ ᠳᠡᠭᠦᠨ ᠤ ᠪᠤᠳᠤᠯ ᠢ ᠰᠠᠷᠨᠢᠭᠠᠵᠤ ᠨᠢᠰᠬᠦ ᠨᠢ ᠦᠨᠦᠬᠢ ᠭᠠᠳᠠᠭᠠᠳᠦ ᠰᠢᠪᠠᠭᠤ ᠁                    ︵ᠲᠤᠰ ᠵᠤᠬᠢᠶᠠᠯ ᠢ ᠰ᠊ · ᠦᠯᠵᠠᠶᠢᠵᠢᠷᠭᠠᠯ ᠺᠢᠷᠢᠯ ᠦᠰᠥᠭ ᠠᠴᠠ ᠪᠠᠭᠤᠯᠭᠠᠪᠡ︶  
ᠢᠷᠡᠯᠲᠡ᠄ ᠬᠥᠯᠥᠨ ᠪᠤᠶᠢᠷ ᠮᠤᠩᠭᠤᠯ ᠰᠦᠯᠵᠢᠶ᠎ᠡ