ᠭᠤᠯᠣᠮᠲᠠ ᠶᠢᠨ ᠭᠤᠷᠪᠠᠨ ᠡᠷᠢᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/15
        ᠥᠴᠥᠭᠡᠳᠦᠷ - ᠦᠨᠡᠨᠳᠡᠭᠡᠨ ᠥᠨᠥᠳᠥᠷ ᠪᠠᠶᠢᠭᠰᠠᠨ᠂ ᠮᠠᠷᠭᠠᠰᠢ ᠴᠦ ᠪᠠᠶᠢᠭᠰᠠᠨ᠂ ᠥᠩᠭᠡᠷᠡᠭᠡᠳ ᠥᠴᠥᠭᠡᠳᠦᠷ ᠪᠣᠯᠴᠢᠬᠠᠭᠰᠠᠨ᠃ ᠴᠠᠭ ᠤᠨ ᠮᠡᠷᠡᠯᠲᠡ ᠶᠢ ᠶᠠᠭᠤ ᠴᠦ ᠳᠠᠭᠠᠭᠠᠵᠤ ᠳᠡᠶᠢᠯᠳᠡᠭ ᠦᠭᠡᠢ ᠪᠣᠯᠬᠤᠷ ᠥᠴᠥᠭᠡᠳᠦᠷ᠂ ᠥᠨᠥᠳᠥᠷ᠂ ᠮᠠᠷᠭᠠᠰᠢ；ᠡᠪᠦᠯ᠂ ᠵᠤᠨ᠂  ᠨᠠᠮᠤᠷ᠂ ᠬᠠᠪᠤᠷ；ᠤᠨ ᠵᠢᠯ᠂ ᠲᠡᠦᠬᠡ ᠢᠷᠡᠭᠡᠳᠦᠢ ᠭᠡᠵᠦ ᠣᠷᠴᠢᠭᠰᠠᠭᠠᠷ ᠪᠠᠶᠢᠨᠠᠮ᠃        ᠤᠯᠠᠨ ᠤᠯᠠᠨ ᠡᠳᠦᠷ ᠤᠳ ᠥᠩᠭᠡᠷᠡᠭᠡᠳ ᠯᠡ ᠪᠦᠷ ᠲᠡ᠊ - ᠷᠡ ᠬᠤᠯᠠ ᠪᠠᠷ᠎ᠠ ᠲᠠᠰᠦ᠃ ᠬᠠᠷᠢᠨ ᠡᠨᠡ ᠡᠳᠦᠷ ᠮᠠᠷᠭᠠᠰᠢ ᠲᠠᠭᠢᠨ ᠳᠠᠪᠲᠠᠭᠳᠠᠵᠤ᠂ ᠳᠠᠭᠢᠨ ᠳᠠᠪᠲᠠᠭᠳᠠᠬᠤ ᠳᠠᠭᠠᠨ ᠰᠢᠨ᠎ᠡ ᠪᠠᠷ ᠡᠬᠢᠯᠡᠭᠡᠳ ᠬᠠᠭᠤᠴᠢᠷᠠᠵᠤ ᠬᠤᠯᠠᠳᠠᠨ᠎ᠠ᠃ ᠭᠡᠬᠦ ᠳᠡᠭᠡᠨ ᠴᠠᠭ ᠬᠤᠭᠤᠴᠠᠭ᠎ᠠ ᠡᠨᠡ ᠪᠦᠭᠦ ᠵᠦᠢᠯ ᠢ ᠬᠠᠷᠠᠭᠰᠠᠨ ᠡᠰᠡ ᠬᠠᠷᠠᠭᠰᠠᠨ ᠮᠡᠲᠦ ᠥᠪᠡᠷ ᠤᠨ ᠬᠢ ᠲᠡᠷᠡ ᠬᠡᠪ ᠢᠶᠠᠷ ᠢᠶᠠᠨ ᠲᠠᠶᠢᠪᠤᠭᠤᠬᠠᠨ ᠵᠣᠭᠰᠣᠨ᠎ᠠ ᠪᠢᠯᠡ᠃ ᠪᠢ ᠰᠡᠳᠬᠢᠯ ᠤᠨ ᠬᠡᠨᠡᠭᠡ ᠲᠠᠢ ᠪᠣᠯᠣᠭᠠᠳ ᠲᠡᠷᠡ ᠪᠢᠵᠡ︕ ᠳᠠᠩᠳᠠ ᠡᠨᠡ ᠡᠳᠦᠷ ᠤᠨ ᠥᠨᠳᠥᠷ ᠣᠷᠣᠢ ᠳᠡᠭᠡᠷ᠎ᠡ ᠵᠣᠭᠰᠣᠨ ᠡᠷᠭᠢᠵᠦ ᠬᠠᠷᠠᠭᠠᠳ  ᠰᠡᠳᠬᠢᠯ ᠢᠶᠠᠨ ᠦᠢᠮᠡᠭᠦᠯᠵᠦ ᠵᠤᠬᠰᠤᠬᠤ ᠳᠤᠷᠠᠲᠠᠢ᠃        ᠲᠡᠨᠳᠡ - ᠶᠠᠭᠤ ᠴᠦ ᠪᠣᠯᠤᠭ᠎ᠠ ᠦᠭᠡᠢ ᠮᠡᠲᠦ ᠲᠦᠷᠯᠡᠶᠢᠨ ᠵᠤᠬᠰᠤᠬᠤ ᠣᠷᠴᠢᠯᠠᠩ ᠤᠤᠯ ᠤᠨ ᠳᠦᠷᠢ ᠲᠥᠷᠬᠦ ᠪᠠᠷ ᠢᠶᠠᠨ ᠲᠠᠶᠢᠪᠤᠭᠤᠬᠠᠨ ᠭᠢᠯᠠᠯᠵᠠᠭᠠᠳ ᠪᠠᠶᠢᠬᠤ ᠶᠢ ᠬᠠᠷᠠᠬᠤ ᠳᠤᠷᠠᠲᠠᠢ᠃        ᠨᠡᠩ ᠴᠤ ᠡᠨᠡ ᠨᠤᠲᠤᠭ ᠤᠨ ᠮᠥᠩᠬᠡ ᠶᠢᠨ ᠦᠵᠡᠰᠭᠦᠯᠡᠩ ᠢ ᠪᠦᠲᠦᠭᠡᠭᠰᠡᠨ ᠲᠡᠷᠡ ᠠᠭᠤᠯᠠ ᠲᠣᠯᠣᠭᠠᠳ᠂ ᠲᠡᠷᠡ ᠭᠤᠪᠢ ᠲᠠᠯ᠎ᠠ᠂ ᠡᠭᠡᠯᠵᠢᠯᠡᠨ ᠪᠤᠢ ᠲᠦᠷᠪᠡᠨ ᠤᠯᠠᠷᠢᠯ ᠥᠪᠡᠷ ᠬᠤᠭᠤᠷᠣᠨᠳᠤ ᠪᠠᠨ ᠤᠴᠢᠷᠯᠠᠨ ᠶᠠᠷᠢᠯᠴᠠᠬᠤᠢ ᠶᠢ ᠢᠮᠠᠭᠲᠠ ᠰᠤᠨᠤᠰᠬᠤ ᠳᠤᠷᠠᠲᠠᠢ᠃        ᠲᠡᠶᠢᠮᠤ ᠠ᠋᠂ ᠲᠡᠷᠡ ᠪᠦᠬᠦᠢ ᠵᠦᠢᠯ ᠬᠥᠮᠥᠨ ᠤ ᠳᠤᠷᠠᠰᠤᠯ ᠮᠥᠷᠥᠭᠡᠳᠦᠯ ᠳᠤ ᠦᠨᠳᠦᠰᠦᠯᠡᠵᠦ᠂ ᠴᠡᠴᠡᠭᠯᠡᠭᠡᠳ᠂ ᠪᠣᠯᠪᠠᠰᠤᠷᠠᠭᠰᠠᠨ ᠤᠷᠭᠤᠭ᠎ᠠ ᠮᠣᠳᠣᠨ ᠤ ᠦᠷ᠎ᠡ ᠵᠢᠮᠢᠰ ᠮᠡᠲᠦ ᠪᠠᠳᠠᠷᠠᠩᠭᠤᠢ ᠬᠠᠷᠠᠭᠳᠠᠳᠠᠭ ᠪᠣᠯᠬᠤᠷ ᠪᠢ ᠲᠡᠨᠳᠡ ᠤᠳᠠᠭᠠᠨ ᠵᠣᠭᠰᠣᠳᠠᠭ᠃        ᠴᠠᠭ ᠬᠤᠭᠤᠴᠠᠭ᠎ᠠ ᠲᠡᠨᠳᠡ ᠯᠡ ᠮᠥᠩᠬᠡ ᠶᠢᠨ ᠦᠵᠡᠰᠭᠦᠯᠡᠩ ᠢ ᠪᠦᠲᠦᠭᠡᠭᠰᠡᠨ ᠪᠣᠯᠬᠤᠷ ᠮᠥᠩᠬᠡ ᠶᠢᠨ ᠲᠠᠶᠢᠪᠤᠭᠤᠨ ᠣᠨ ᠵᠢᠯ ᠦᠷᠭᠦᠯᠵᠢᠯᠡᠳᠡᠭ ᠶᠤᠮ ᠳ᠋ᠠ᠃ ᠲᠡᠨᠳᠡ ᠠᠭᠤᠤ ᠬᠥᠮᠥᠰ ᠤᠨ ᠴᠢᠰᠤ ᠬᠥᠯᠥᠰᠦ ᠪᠠᠨ ᠤᠷᠤᠰᠬᠠᠭᠰᠠᠨ ᠠᠰᠤᠷᠤ ᠠᠭᠤᠳᠠᠮ ᠨᠤᠲᠤᠭ ᠲᠡᠭᠷᠢ ᠶᠢᠨ ᠬᠢᠵᠠᠭᠠᠷ ᠲᠤ᠂ ᠲᠡᠭᠷᠢ ᠶᠢᠨ ᠬᠢᠵᠠᠭᠠᠷ ᠤᠨ ᠳᠠᠪᠠᠭ᠎ᠠ ᠳᠠᠪᠠᠭᠠᠨ ᠤ ᠤᠷᠭᠢᠯ ᠳᠡᠭᠡᠭᠦᠷ ᠰᠡᠪᠰᠢᠨ ᠰᠡᠪᠡᠯᠵᠡᠬᠦ ᠤᠨᠢᠶᠠᠷ ᠬᠦᠳᠡᠩ ᠤᠨ ᠳᠤᠮᠳᠠ ᠪᠠᠨ ᠥᠨᠳᠡᠯᠵᠡᠭᠡᠳ ᠁ ᠵᠡᠯᠡᠬᠡᠨ ᠰᠢᠷᠭᠠᠯ ᠴᠠᠢ ᠶᠢᠨ ᠦᠨᠦᠷ ᠵᠡᠰ ᠳᠣᠮᠪᠤ ᠠᠴᠠ ᠨᠢ ᠬᠠᠩᠬᠤᠯᠣᠭᠠᠰᠤᠲᠠᠢ᠂ ᠨᠡᠭᠦᠳᠡᠯ᠂ ᠲᠤᠪᠤ ᠲᠣᠯᠣᠭᠠᠳ ᠤᠨ ᠨᠠᠭᠠᠭᠤᠷ ᠪᠠᠰᠠ ᠴᠠᠭᠠᠭᠤᠷ ᠵᠡᠷᠭᠡᠯᠭᠡᠨ ᠶᠤᠮᠰᠢᠭ ᠬᠠᠶᠠ ᠣᠶᠢᠷᠠᠲᠤᠨ ᠬᠠᠶᠠ ᠬᠤᠯᠠᠳᠠᠨᠠᠮ᠃ ᠢᠰᠬᠡᠷᠬᠦ ᠬᠦᠴᠦᠲᠦ ᠰᠠᠯᠬᠢ ᠳᠤᠨᠢ ᠴᠦ ᠶᠠᠮᠠᠷ ᠨᠢᠭᠡᠨ ᠠᠶ᠎ᠠ ᠳᠠᠭᠤᠤ ᠡᠩᠬᠡ ᠲᠠᠶᠢᠪᠤᠩ ᠤᠨ ︽ᠤᠤᠬᠠᠢ︾ ᠮᠡᠲᠦ ᠭᠠᠵᠠᠷ ᠤᠨ ᠬᠥᠷᠥᠰᠥ ᠶᠢ ᠲᠤᠬᠵᠢᠭᠤᠯᠤᠨ ᠳᠣᠷᠭᠢᠭᠤᠯᠬᠤ ᠠᠪᠠᠢ᠃        ᠥᠴᠥᠭᠡᠳᠦᠷ ᠨᠢᠭᠡᠨᠲᠡ ᠥᠩᠭᠡᠷᠡᠭᠰᠡᠨ᠂ ᠶᠠᠮᠠᠷ ᠰᠠᠶᠢᠬᠠᠨ ᠪᠠᠶᠢᠯ᠎ᠠ ᠭᠡᠳ ᠥᠩᠭᠡᠷᠡᠭᠡᠳ ᠯᠡ ᠣᠲᠣᠭᠰᠠᠨ ᠭᠡᠵᠦ ᠲᠠ ᠪᠢᠲᠡᠭᠡᠢ  ᠶᠠᠷᠢᠭᠠᠷᠠᠢ︕ ᠥᠴᠥᠭᠡᠳᠦᠷ ᠯᠡ ᠪᠠᠶᠢᠭᠰᠠᠨ ᠠᠴᠠ ᠥᠨᠥᠳᠥᠷ ᠤᠨ ᠪᠦᠭᠦ ᠶᠠᠭᠤᠮ᠎ᠠ ᠰᠠᠶᠢᠬᠠᠨ᠃ ᠥᠴᠥᠭᠡᠳᠦᠷ ᠤᠨ ᠥᠴᠥᠭᠡᠳᠦᠷ ᠠᠭᠤᠤ ᠶᠡᠭᠡ ᠡᠬᠡ ᠣᠷᠣᠨ ᠮᠢᠨᠢ ᠠᠳᠡ ᠠᠯᠳᠠᠷ ᠢᠶᠠᠨ᠂ ᠦᠢᠯᠡᠰ ᠢᠶᠠᠨ ᠮᠠᠨᠳᠤᠭᠤᠯᠤᠨ ᠮᠥᠩᠬᠡ ᠶᠢᠨ ᠲᠠᠮᠠᠭ᠎ᠠ ᠳᠠᠷᠤᠭᠰᠠᠨ᠃ ᠠᠰᠤᠷᠤ ᠠᠭᠤᠳᠠᠮ ᠪᠠᠶᠢᠭᠠᠯᠢ ᠳᠤ ᠠᠷᠠᠳ ᠲᠦᠮᠡᠨ ᠮᠢᠨᠢ ᠠᠷᠢᠭᠤᠨ ᠭᠦᠳᠡᠯᠮᠦᠷᠢ ᠶᠢᠨ ᠤᠯᠠ ᠮᠥᠷ ᠢᠶᠠᠨ ᠦᠯᠡᠳᠡᠭᠡᠭᠰᠡᠨ᠃ ᠮᠥᠨ ᠠᠳᠠᠯᠢᠬᠠᠨ ᠦᠶ᠎ᠡ ᠦᠶ᠎ᠡ ᠶᠢᠨ ᠡᠷᠳᠡᠮᠲᠡᠨ ᠮᠡᠷᠭᠡᠳ ᠥᠪᠡᠷ ᠤᠨ ᠤᠷᠠᠨ ᠭᠠᠷ ᠤᠶᠣᠨ ᠰᠠᠨᠠᠭ᠎ᠠ ᠪᠠᠷ ᠢᠶᠠᠨ ᠰᠢᠨ᠎ᠡ ᠡᠬᠡ ᠣᠷᠣᠨ᠂ ᠠᠯᠤᠰ ᠢᠷᠡᠭᠡᠳᠦᠢ ᠶᠢ ᠪᠦᠲᠦᠭᠡᠨ ᠶᠠᠪᠤᠭᠰᠠᠨ ᠨᠢ ᠭᠦᠩᠭᠠᠷᠠᠪᠠ ᠲᠠᠢ ᠪᠤᠷᠬᠠᠨ ᠥᠭᠡᠷ᠎ᠡ ᠦᠭᠡᠢ᠂ ᠭᠤᠶᠣ ᠬᠢᠴᠡ ᠲᠠᠢ ᠲᠠᠲᠠᠯᠠᠭᠠᠨ ᠵᠢᠷᠤᠭ ᠪᠣᠯᠵᠤ ᠡᠬᠡ ᠣᠷᠣᠨ ᠤ ᠪᠠᠨ ᠥᠷᠥᠴᠡᠨ ᠳᠤ ᠮᠥᠩᠬᠡ ᠰᠡᠶᠢᠯᠦᠭᠳᠡᠭᠰᠡᠨ᠃ ᠥᠨᠥᠳᠥᠷ ᠲᠡᠳᠡᠨ ᠤ ᠲᠠᠮᠠᠭᠠᠯᠠᠭᠰᠠᠨ᠂ ᠲᠡᠳᠡᠨ ᠤ ᠲᠠᠲᠠᠯᠠᠭᠰᠠᠨ ᠲᠠᠲᠠᠯᠠᠭᠠᠨ ᠵᠢᠷᠤᠭ ᠳᠡᠭᠡᠷ᠎ᠡ ᠰᠢᠨ᠎ᠡ ᠰᠢᠨ᠎ᠡ ᠲᠤᠰᠤᠨ ᠪᠤᠳᠤᠭ ᠤᠨ ᠵᠢᠷᠤᠭ ᠵᠢᠷᠤᠭᠳᠠᠨ ᠪᠤᠢ᠃ ᠲᠡᠷᠡ ᠰᠢᠨ᠎ᠡ ᠬᠠᠭᠤᠴᠢᠨ ᠵᠢᠷᠤᠭ ᠤᠳ ᠬᠡᠵᠢᠶᠡᠳᠡ ᠪᠠᠯᠠᠷᠠᠰᠢ ᠦᠭᠡᠢ ᠮᠥᠩᠬᠡ ᠭᠢᠯᠠᠯᠵᠠᠭᠠᠳ ᠁ ᠮᠥᠩᠬᠡ ᠶᠢᠨ ᠦᠵᠡᠰᠭᠦᠯᠡᠩ ᠢᠶᠠᠷ ᠢᠶᠠᠨ ᠬᠥᠮᠥᠨ ᠵᠤᠨ ᠤ ᠤᠶᠤᠨ ᠳᠤ ᠶᠠᠭᠤ ᠨᠢᠭᠡ ᠶᠢ ᠪᠤᠳᠤᠬᠲᠠᠭᠤᠯᠤᠨ ᠲᠡᠨᠳᠡ ᠪᠠᠨ ᠰᠡᠬᠦᠶᠢᠨ ᠪᠠᠶᠢᠨ᠎ᠠ᠃ ᠥᠨᠳᠥᠷ ᠲᠤ ᠵᠣᠭᠰᠣᠭᠠᠳ ᠠᠯᠤᠰ ᠢ ᠪᠠᠷᠠᠯᠠᠬᠤ ᠳᠤ ᠰᠢᠪᠠᠭᠤᠳ ᠬᠢᠮᠤᠰᠤ ᠪᠠᠨ ᠨᠢᠭᠤᠭᠠᠳ ᠲᠡᠭᠷᠢ ᠳᠤ ᠬᠥᠭᠡᠷᠬᠦ ᠮᠡᠲᠦ ᠰᠡᠳᠬᠢᠯ ᠮᠠᠰᠢ ᠳᠣᠭᠳᠣᠯᠤᠩᠭᠤᠢ᠃ ᠭᠡᠬᠦ ᠪᠠᠷ ᠡᠷᠬᠡ ᠴᠢᠯᠦᠭᠡᠲᠦ ᠠᠭᠤᠯᠠ ᠡᠭᠦᠯᠡ ᠬᠤᠶᠠᠷ ᠲᠤ ᠰᠡᠳᠬᠢᠯ ᠤᠨ ᠨᠢᠭᠤᠴᠠ ᠪᠠᠨ ᠳᠡᠯᠭᠡᠭᠡᠳ ᠪᠠᠶᠢᠮᠠᠷ ᠤᠷᠮᠠᠰᠢᠬᠤ ᠶᠤᠮ᠃        ᠪᠢ ᠳᠠᠩᠳᠠ ᠪᠠᠨ ᠥᠨᠥᠳᠥᠷ ᠤᠨ ᠥᠨᠳᠥᠷ ᠳᠡᠭᠡᠷ᠎ᠡ ᠵᠣᠭᠰᠣᠭᠠᠳ ᠥᠴᠥᠭᠡᠳᠦᠷ ᠢ ᠬᠠᠷᠠᠬᠤ ᠳᠤᠷᠠᠲᠠᠢ᠃ ᠮᠥᠩᠬᠡ ᠶᠢᠨ ᠲᠠᠶᠢᠪᠤᠭᠤᠨ ᠣᠨ ᠵᠢᠯ ᠰᠠᠯᠬᠢᠨ ᠪᠣᠷᠣᠭᠠᠨ᠂ ᠴᠠᠰᠤ ᠰᠢᠭᠤᠷᠭᠠᠨ ᠳᠤ ᠥᠩᠭᠡ ᠥᠩᠭᠡ ᠪᠠᠷ ᠲᠣᠳᠣᠷᠠᠨ ᠲᠣᠳᠣᠷᠠᠭᠠᠳ ᠪᠠᠶᠢᠬᠤ ᠶᠢ ᠬᠠᠷᠠᠬᠤ ᠳᠤᠷᠠᠲᠠᠢ᠃ ᠠᠶ᠎ᠠ᠂ ᠶᠠᠭᠤᠲᠠᠢ ᠭᠠᠶᠢᠬᠠᠯᠲᠠᠢ︕        ᠶᠠᠭᠤᠮ᠎ᠠ ᠪᠦᠭᠦᠨ ᠢ ᠰᠡᠳᠬᠢᠯ ᠳᠤ ᠲᠣᠳᠣᠷᠠᠭᠤᠯᠤᠨ ᠲᠣᠳᠣᠷᠠᠭᠤᠯᠬᠤ ᠥᠴᠥᠭᠡᠳᠦᠷ ᠪᠢ ᠡᠨᠡ ᠬᠦ ᠰᠡᠳᠬᠢᠯ ᠬᠡᠮᠡᠬᠦ ᠢᠭᠴᠤ ᠰᠠᠬᠤᠯᠢᠭ ᠤᠢ ᠶᠢᠨ ᠵᠠᠬ᠎ᠠ ᠪᠠᠷ ᠣᠯᠠᠨᠲᠠ ᠵᠠᠮᠨᠠᠭᠰᠠᠨ᠃ ᠵᠢᠭᠳᠡ ᠪᠥᠭᠡᠳ ᠥᠨᠳᠥᠷ ᠤᠷᠭᠤᠭᠰᠠᠨ ᠡᠨᠡ ᠰᠡᠳᠬᠢᠯ ᠬᠡᠮᠡᠬᠦ ᠤᠢ ᠴᠠᠷᠳᠠᠮᠠᠯ ᠵᠠᠮ ᠠᠴᠠ ᠠᠷᠤᠨᠰᠢ ᠪᠠᠨ ᠨᠡᠯᠢᠶᠡᠳ ᠦᠷᠭᠦᠯᠵᠢᠯᠡᠭᠰᠡᠨ ᠪᠥᠭᠡᠳ ᠤᠢ ᠶᠢᠨ ᠴᠤᠭᠤᠷᠬᠠᠢ ᠪᠠᠷ ᠠᠵᠢᠭᠯᠠᠪᠠᠯ ᠴᠠᠶᠢᠪᠤᠷᠬᠠᠨ᠂ ᠠᠭᠤᠳᠠᠮ ᠲᠡᠨᠢᠭᠦᠬᠡᠨ ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠶᠠᠭ ᠯᠡ ᠲᠡᠭᠦᠨ ᠤ ᠴᠠᠭᠠᠨᠠᠬᠠᠨ ᠪᠠᠶᠢᠬᠤ ᠮᠡᠲᠦ᠃ ᠲᠡᠭᠡᠭᠦ ᠪᠠᠷ᠄ ︽ᠠᠢ ᠬᠠᠢ ᠬᠠᠢ ᠁ ᠰᠠᠷᠠᠨ ᠮᠢᠨᠤ᠂ ᠠᠢ ᠬᠠᠢ ᠬᠠᠢ ᠁ ᠲᠡᠭᠷᠢ ᠮᠢᠨᠤ᠂ ᠥᠨᠢᠳᠡ ᠮᠥᠩᠬᠡ ᠲᠡᠭᠷᠢ ᠮᠢᠨᠤ ᠁︾ ᠬᠡᠮᠡᠬᠦ ︽ᠬᠥᠬᠡ ᠲᠡᠭᠷᠢ ᠶᠢᠨ ᠬᠤᠷᠤᠢ︾ ᠠᠶ᠎ᠠ ᠳᠠᠭᠤᠤ ᠨᠡᠭᠡᠭᠡᠯᠲᠡᠲᠡᠢ ᠴᠣᠩᠬᠤ ᠪᠠᠷ ᠤᠢ ᠶᠢᠨ ᠴᠠᠭᠠᠨᠠᠬᠢ ᠲᠡᠭᠷᠢ ᠶᠢᠨ ᠬᠠᠶᠠᠭᠠᠨ ᠤ ᠲᠡᠨᠳᠡ ᠠᠴᠠ ᠢᠷᠠᠭᠤ ᠲᠤᠩᠭᠠᠯᠠᠭᠬᠠᠨ ᠬᠠᠩᠭᠢᠨᠠᠨ ᠴᠤᠤᠷᠢᠶᠠᠲᠤᠭᠠᠳ ᠰᠡᠳᠬᠢᠯ ᠢ ᠤᠳᠤᠷᠢᠳᠤᠨ ᠭᠤᠸ᠎ᠠ ᠲᠠᠭᠠᠰᠢᠶᠠᠯ ᠵᠦᠭ ᠳᠡᠪᠳᠡᠷᠢᠨ᠎ᠡ ᠁        ᠬᠡᠴᠢᠨᠡᠨ ᠵᠢᠯ ᠤᠨ ᠡᠮᠦᠨ᠎ᠡ ᠪᠢ ᠡᠨᠡ ᠤᠢ ᠶᠢᠨ ᠬᠠᠵᠠᠭᠤ ᠪᠠᠷ ᠠᠩᠬ᠎ᠠ ᠥᠩᠭᠡᠷᠡᠬᠦ ᠳᠤ ᠨᠠᠮᠤᠷ ᠤᠨ ᠰᠡᠭᠦᠯᠴᠢ ᠪᠣᠯᠵᠤ ᠪᠠᠶᠢᠯ᠎ᠠ᠃ ᠮᠣᠳᠣᠳ ᠤᠨ ᠨᠠᠪᠴᠢᠰ ᠨᠠᠮᠤᠷ ᠤᠨ ᠬᠦᠢᠲᠡᠨ ᠪᠣᠷᠣᠭᠠᠨ ᠳᠤ ᠬᠡᠳᠦᠨᠲᠡ ᠭᠦᠪᠴᠢᠭᠳᠡᠨ ᠤᠨᠠᠭᠰᠠᠨ ᠪᠤᠯᠪᠠᠴᠦ ᠠᠷᠠᠶᠢᠬᠠᠨ ᠲᠣᠭᠲᠠᠨ ᠶᠠᠳᠠᠨ ᠪᠠᠶᠢᠬᠤ ᠤᠯᠠᠪᠤᠷ᠂ ᠰᠢᠷ᠎ᠠ᠂ ᠨᠣᠭᠤᠭᠠᠨ ᠤᠯᠠᠨ ᠶᠠᠩᠵᠤ ᠶᠢᠨ ᠴᠥᠭᠡᠨ ᠨᠠᠪᠴᠢ ᠨᠤᠭᠤᠳ ᠪᠠᠰᠠ ᠨᠢᠭᠡᠨ ᠵᠦᠢᠯ ᠤᠨ ᠭᠤᠸ᠎ᠠ ᠰᠠᠶᠢᠬᠠᠨ ᠢᠶᠠᠷ ᠡᠨᠡ ᠶᠡᠭᠡ ᠤᠢ ᠬᠥᠪᠴᠢ ᠪᠠᠨ᠂ ᠠᠭᠤᠤ ᠠᠭᠤᠳᠠᠮ ᠡᠬᠡ ᠪᠠᠶᠢᠭᠠᠯᠢ ᠪᠠᠨ ᠴᠢᠮᠡᠭᠰᠡᠨ ᠬᠠᠷᠠᠭᠳᠠᠨ᠎ᠠ᠃ ᠨᠡᠩ ᠣᠨᠴᠠᠭᠠᠶᠢᠯᠠᠨ ᠤᠢ ᠶᠢᠨ ᠴᠤᠭᠤᠷᠬᠠᠢ ᠶᠢᠨ ᠴᠠᠭᠠᠨᠠᠬᠠᠨ ᠪᠠᠶᠢᠬᠤ ᠪᠣᠯᠪᠠᠤ ᠭᠡᠮᠡᠷ ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠠᠭᠤᠵᠢᠮ ᠠᠴᠠ ᠠᠭᠤᠵᠢᠮ ᠲᠡᠭᠰᠢ ᠲᠠᠯ᠎ᠠ ᠲᠠᠢ ᠪᠠᠨ ᠬᠢᠯᠢᠯᠡᠨ ᠤᠯᠠᠮ ᠲᠣᠳᠣ ᠴᠠᠶᠢᠪᠤᠷᠳᠠᠨ ᠤᠨᠢᠶᠠᠷᠲᠤᠬᠤ ᠨᠢ ᠳᠡᠯᠭᠡᠭᠰᠡᠨ ᠬᠠᠳᠠᠭ ᠭᠡᠮᠡᠷ ᠦᠵᠡᠰᠭᠦᠯᠡᠩ᠃        ᠲᠡᠶᠢᠮᠦ ᠠ᠋᠂ ᠦᠯᠡᠮᠵᠢ ᠶᠢᠨ ᠭᠤᠸ᠎ᠠ ᠰᠠᠶᠢᠬᠠᠨ ᠢ ᠰᠡᠳᠬᠢᠯ ᠳᠤ ᠬᠠᠳᠠᠩᠰᠢᠭᠤᠯᠤᠭᠰᠠᠨ ᠡᠬᠡ ᠣᠷᠣᠨ ᠳᠠᠭᠠᠨ ᠲᠠᠬᠰᠢᠨ ᠠᠮᠤᠭᠤᠯᠠᠩ ᠰᠠᠭᠠᠲᠠᠬᠤ ᠨᠤᠲᠤᠭ ᠮᠢᠨᠢ ᠭᠡᠵᠦ ᠬᠠᠮᠢᠭ᠎ᠠ ᠶᠠᠪᠤᠭᠰᠠᠨ ᠴᠦ ᠳᠤᠷᠠᠰᠤᠯ ᠳᠤᠷᠠᠳᠬᠠᠯ ᠳᠤ ᠥᠩᠭᠡ ᠳᠦᠷᠢ ᠪᠠᠨ ᠲᠣᠳᠣ ᠲᠣᠮᠣᠷᠠᠭᠤᠨ ᠬᠠᠷᠠᠭᠳᠠᠭᠤᠯᠤᠭᠠᠳ ᠪᠠᠶᠢᠳᠠᠭ ᠭᠠᠵᠠᠷ ᠳ᠋ᠠ᠃ ᠭᠡᠬᠦᠯᠡᠷ ᠡᠨᠡ ᠤᠢ ᠶᠢᠨ ᠲᠡᠷᠭᠡᠲᠡᠭᠦᠷ ᠥᠩᠭᠡᠷᠡᠬᠦ ᠪᠣᠯᠭᠠᠨ ᠤᠢ ᠶᠢᠨ ᠴᠤᠭᠤᠷᠬᠠᠢ ᠪᠠᠷ ᠬᠠᠷᠠᠭᠳᠠᠬᠤ ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠵᠦᠭ ᠪᠤᠲᠣᠯ ᠰᠡᠳᠬᠢᠯ ᠥᠪᠡᠷ ᠤᠨ ᠡᠷᠬᠡ ᠦᠭᠡᠢ ᠲᠡᠮᠡᠦᠯᠦᠭᠡᠳ ᠪᠠᠶᠢᠬᠤ ᠶᠤᠮ ᠭᠡᠭᠴᠢ᠃ ᠲᠡᠷᠡ ᠤᠢ ᠶᠢᠨ ᠴᠠᠭᠠᠨ᠎ᠠ ᠪᠠᠶᠢᠬᠤ ᠲᠡᠭᠷᠢ ᠶᠢᠨ ᠬᠠᠶᠠᠭᠠᠨ ᠠᠴᠠ ᠡᠨᠡ ᠶᠡᠭᠡ ᠤᠢ ᠶᠢᠨ ᠱᠤᠤᠭᠢᠶᠠᠨ ᠰᠢᠭ᠋ ᠬᠠᠭ ᠤᠨ ᠲᠠᠪᠢᠨ ᠤ ᠮᠢᠨᠢ ᠦᠷ᠎ᠡ ᠬᠡᠦᠬᠡᠳ ᠤᠨ ︽ᠵᠢᠩᠭᠢᠷ ᠵᠢᠩᠭᠢᠷ︾ ᠬᠡᠮᠡᠬᠦ ᠬᠢᠴᠢᠶᠡᠯ ᠨᠣᠮ ᠢᠶᠠᠨ ᠤᠩᠰᠢᠬᠤ ᠲᠠᠭᠤᠨ ᠪᠤᠯᠠᠭ ᠤᠨ ᠣᠰᠤᠨ ᠪᠤᠷᠭᠢᠯᠤᠨ ᠭᠤᠷᠴᠢᠭᠢᠨᠠᠬᠤ ᠰᠢᠭ᠋᠃ ᠪᠠᠰᠠ ᠦᠷ ᠴᠦᠷ ᠢᠶᠠᠷ ᠦᠨᠢᠶ᠎ᠡ ᠲᠤᠭᠤᠯ ᠲᠠᠢ ᠪᠠᠨ ᠶᠠᠭᠠᠷᠠᠬᠤ ᠥᠬᠢᠳ ᠪᠦᠰᠡᠭᠦᠶᠢᠴᠦᠳ ᠤᠨ ᠭᠦᠷ ᠬᠥᠭᠵᠢᠶᠡᠨ ᠲᠤᠤᠨᠢᠬᠤ ᠰᠢᠭ᠋᠃ ᠲᠡᠶᠢᠮᠤ ᠠᠴᠠ ᠡᠨᠡ ᠤᠢ ᠶᠢᠨ ᠵᠠᠬ᠎ᠠ ᠪᠠᠷ ᠥᠩᠭᠡᠷᠡᠬᠦ ᠪᠣᠯᠭᠠᠨ ᠪᠢ ᠵᠠᠪᠠᠯ ᠲᠡᠷᠭᠡᠨ ᠤ ᠪᠠᠨ ᠴᠣᠩᠬᠤᠨ ᠰᠢᠯ ᠢ ᠳᠣᠷᠣᠭᠰᠢ ᠪᠠᠭᠤᠯᠭᠠᠨ ᠵᠢᠷᠪᠢᠯᠵᠡᠨ ᠥᠩᠭᠡᠷᠡᠬᠦ ᠤᠢ ᠲᠠᠶᠢᠭ᠎ᠠ ᠪᠣᠯᠣᠨ ᠤᠢ ᠲᠠᠶᠢᠭ᠎ᠠ ᠶᠢᠨ ᠴᠠᠭᠠᠨᠠᠬᠢ ᠡᠬᠡ ᠪᠠᠶᠢᠭᠠᠯᠢ᠂ ᠡᠬᠡ ᠪᠠᠶᠢᠭᠠᠯᠢ ᠠᠴᠠ ᠴᠤᠤᠷᠢᠶᠠᠲᠤᠬᠤ ᠠᠶ᠎ᠠ ᠳᠠᠭᠤᠤ ᠶᠢ ᠴᠢᠩᠨᠠᠬᠤ ᠳᠤᠷᠠᠲᠠᠢ᠃        ᠮᠠᠨ ᠤ ᠨᠤᠲᠤᠭ ᠲᠤ  ᠠᠭᠤᠯᠠ ᠬᠠᠶᠢᠷᠬᠠᠨ ᠪᠠᠶᠢᠳᠠᠭ ᠦᠭᠡᠢ᠃ ᠲᠡᠨᠢᠢᠭᠰᠡᠨ ᠠᠭᠤᠳᠠᠮ ᠰᠠᠶᠢᠬᠠᠨ ᠪᠣᠷᠣ ᠵᠣ᠂ ᠲᠠᠯ᠎ᠠ ᠭᠤᠪᠢ ᠦᠷᠭᠦᠯᠵᠢᠯᠡᠭᠡᠳ ᠯᠡ᠂ ᠴᠣᠬᠤᠮ ᠬᠠᠷᠠᠭ᠎ᠠ ᠠᠯᠳᠠᠮ᠎ᠠ ᠰᠠᠶᠢᠬᠠᠨ ᠢ ᠶᠠᠭᠠᠬᠢᠨ᠎ᠠ᠃ ᠮᠠᠯ ᠤᠨᠣᠭᠠᠨ ᠤ ᠡᠷᠢᠯ ᠳᠤ ᠶᠠᠪᠤᠭᠰᠠᠨ ᠬᠥᠮᠥᠨ ᠳᠣᠪᠣᠴᠠᠭ ᠳᠡᠭᠡᠷ᠎ᠡ ᠭᠠᠷᠤᠭᠠᠳ ᠲᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠣᠪᠬᠢᠰ ᠢ ᠪᠠᠷᠠᠯᠠᠪᠡᠯ ᠠᠯᠠᠭᠠᠨ ᠳᠡᠭᠡᠷᠡᠬᠢ ᠶᠠᠭᠤᠮ᠎ᠠ ᠪᠠᠨ ᠦᠵᠡᠵᠦ ᠪᠠᠶᠢᠬᠤ ᠰᠢᠤᠬᠠᠨ ᠲᠣᠳᠣᠬᠠᠨ ᠪᠠᠶᠢᠳᠠᠭ᠃  ᠲᠡᠷᠡ ᠲᠤᠪᠤ ᠲᠣᠯᠣᠭᠠᠳ ᠤᠨ ᠣᠷᠣᠢ ᠳᠡᠭᠡᠷ᠎ᠡ ᠵᠤᠬᠰᠤᠬᠤ ᠳᠤ ᠰᠠᠶᠢᠨ ᠰᠠᠶᠢᠬᠠᠨ ᠢ ᠤᠯᠠᠮ ᠰᠠᠶᠢᠬᠠᠨ ᠪᠦᠲᠦᠭᠡᠬᠦ ᠭᠡᠰᠡᠨ ᠮᠡᠲᠦ ᠪᠣᠷᠪᠢ ᠪᠣᠬᠢᠰᠬᠢᠯ ᠦᠭᠡᠢ ᠠᠵᠢᠯᠯᠠᠳᠠᠭ ᠡᠪᠦᠭᠡ᠂ ᠡᠪᠦᠭᠡᠳ ᠤᠨ ᠪᠠᠷ᠎ᠠ ᠬᠠᠷᠠᠭᠳᠠᠬᠤ ᠰᠢᠭ᠋᠃ ᠥᠴᠥᠭᠡᠳᠦᠷ ᠪᠦᠭᠦᠨ ᠢ ᠬᠠᠷᠠᠬᠤ ᠳᠤᠷᠠᠲᠠᠢ ᠮᠢᠨᠤ ᠵᠢᠷᠦᠬᠡᠨ ᠳᠤ ᠪᠠᠭ᠎ᠠ ᠡᠪᠦᠭᠡ ᠶᠢᠨ᠄ ︽ᠨᠠᠮ ᠤᠨ ᠰᠠᠶᠢᠨ ᠠ᠋᠂ ᠨᠠᠮ ᠤᠨ ᠰᠠᠶᠢᠨ︕︾ ᠬᠡᠮᠡᠬᠦ ᠠᠶᠢᠯ ᠪᠦᠯᠢ ᠳᠡᠭᠡᠨ᠂ ᠠᠴᠢᠷ ᠦᠷᠡᠰ ᠲᠡᠭᠡᠨ ᠢᠮᠠᠭᠲᠠ ᠶᠠᠷᠢᠳᠠᠭ ᠦᠭᠡ ᠲᠠᠭᠢᠨ ᠳᠠᠪᠲᠠᠭᠳᠠᠬᠤ ᠶᠤᠮ᠃  ᠲᠡᠶᠢᠮᠤ ᠠ᠋᠂ ᠲᠡᠳᠡᠭᠡᠷ ᠬᠥᠮᠥᠰ ᠤᠨ ᠬᠥᠯᠥᠰᠦ ᠰᠢᠩᠭᠡᠵᠦ ᠭᠦᠲᠡᠯᠮᠦᠷᠢ ᠨᠡᠪᠴᠢᠭᠰᠡᠨ ᠡᠬᠡ ᠣᠷᠣᠨ ᠮᠢᠨᠢ ᠪᠠᠶᠢᠳᠠᠭ ᠪᠣᠯᠬᠤᠷ ᠬᠥᠮᠥᠨ ᠵᠤᠨ ᠨᠢ ᠢᠮᠠᠭᠲᠠ ᠥᠭᠡᠳᠡ ᠲᠠᠢ ᠥᠩᠭᠡ ᠲᠠᠢ ᠪᠠᠶᠠᠨ ᠲᠠᠩᠰᠤᠭ ᠠᠵᠤ ᠲᠦᠷᠦᠭᠦ ᠶᠤᠮ᠃ ᠲᠡᠳᠡᠨ ᠤ ᠰᠠᠶᠢᠨ ᠰᠠᠶᠢᠬᠠᠨ ᠵᠥᠩᠨᠡᠯ ᠢᠷᠦᠭᠡᠯ ᠪᠠᠲᠤᠵᠢᠭᠰᠠᠨ ᠠᠴᠠ ᠨᠤᠲᠤᠭ ᠤᠰᠤ ᠮᠢᠨᠢ ᠳᠡᠯᠭᠡᠷ ᠦᠵᠡᠰᠭᠦᠯᠡᠩ ᠢᠶᠠᠨ ᠭᠠᠶᠢᠬᠠᠭᠤᠯᠬᠤ ᠶᠤᠮᠰᠠᠨ᠃        ᠨᠤᠲᠤᠭ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠠᠭᠤᠵᠢᠮ ᠰᠡᠳᠬᠢᠯᠲᠦ ᠡᠭᠡᠯ ᠪᠣᠷᠣᠬᠠᠨ ᠬᠥᠮᠥᠨ ᠠᠷᠠᠳ᠂ ᠠᠪᠤ ᠡᠵᠢ ᠮᠢᠨᠢ ᠭᠡᠵᠦ ᠵᠢᠯ ᠤᠨ ᠳᠦᠷᠪᠡᠨ ᠤᠯᠠᠷᠢᠯ ᠳᠤ ᠬᠥᠯ ᠠᠮᠠᠷᠠᠯ ᠦᠭᠡᠢ ᠦᠬᠡᠷ ᠠᠳᠤᠭᠤ ᠬᠤᠨᠢ ᠢᠮᠠᠭ᠎ᠠ ᠪᠠᠨ ᠬᠠᠷᠢᠭᠤᠯᠵᠤ᠂ ᠲᠡᠭᠦᠨ ᠤ ᠪᠠᠨ ᠬᠡᠰᠢᠭ ᠪᠤᠶᠠᠨ ᠢᠶᠠᠷ ᠠᠮᠢᠳᠤᠷᠠᠯ ᠢᠶᠠᠨ ᠥᠭᠡᠳᠡ ᠲᠠᠲᠠᠵᠤ᠂ ᠲᠡᠨᠢᠭᠦᠨ ᠰᠠᠶᠢᠬᠠᠨ ᠠᠮᠢᠳᠤᠷᠠᠯ ᠲᠠᠢ ᠰᠡᠳᠬᠢᠯ ᠰᠠᠨᠠᠭ᠎ᠠ ᠥᠭᠡᠳᠡᠷᠬᠡᠭ᠂ ᠲᠠᠩᠰᠤᠭ ᠰᠠᠶᠢᠬᠠᠨ ᠠᠵᠤ ᠲᠦᠷᠦᠵᠦ ᠶᠠᠪᠤᠳᠠᠭ ᠢ ᠥᠴᠥᠭᠡᠳᠦᠷ᠂ ᠥᠴᠥᠭᠡᠳᠦᠷ ᠤᠨ ᠥᠴᠥᠭᠡᠳᠦᠷ ᠲᠡᠮᠳᠡᠭᠯᠡᠵᠦ ᠲᠠᠯᠪᠢᠭᠰᠠᠨ᠃ ᠲᠡᠷᠡ ᠯᠡ ᠰᠠᠶᠢᠬᠠᠨ ᠣᠷᠴᠢᠨ ᠪᠠᠶᠢᠭᠠᠯᠢ ᠨᠢ ᠬᠥᠮᠥᠨ ᠵᠤᠨ ᠢᠶᠠᠨ ᠡᠯᠢᠭᠡᠨ ᠳᠡᠭᠡᠨ ᠪᠦᠪᠡᠶᠢᠯᠡᠵᠦ᠂ ᠢᠪᠡᠭᠡᠨ ᠲᠡᠳᠬᠦᠵᠦ ᠦᠩᠰᠢᠭ ᠥᠶᠥᠭ ᠪᠠᠶᠢᠳᠠᠭ ᠢ ᠪᠢ ᠢᠮᠠᠭᠲᠠ ᠬᠠᠷᠠᠳᠠᠭ ᠪᠣᠯᠬᠤᠷ ᠁ ᠮᠢᠨᠤ ᠬᠠᠶᠢᠷ᠎ᠠ ᠳᠤ ᠡᠷᠬᠡ ᠲᠠᠷᠬᠠᠨ ᠰᠦᠨᠳᠡᠷᠯᠡᠬᠦ ᠦᠭᠡᠢ ᠶᠠᠭᠠᠬᠢᠬᠤᠪ ᠳ᠋ᠠ᠃ ᠶᠠᠭ ᠯᠡ ᠲᠡᠷᠡ ᠤᠢ ᠶᠢᠨ ᠴᠠᠭᠠᠨ᠎ᠠ ᠠᠴᠠ ᠢᠷᠠᠭᠤᠬᠠᠨ ᠲᠤᠭᠤᠯᠳᠠᠬᠤ ︽ᠡᠬᠡ ᠭᠠᠵᠠᠷ ᠲᠠᠭᠠᠨ ᠬᠠᠶᠢᠷ᠎ᠠ ᠪᠠᠨ ᠰᠢᠩᠭᠡᠬᠡᠨ ᠳᠡᠭᠡᠳᠦᠯᠡᠨ ᠰᠦᠰᠦᠭᠯᠡᠨ ᠮᠥᠷᠭᠦᠶ᠎ᠡ︾ ᠬᠡᠮᠡᠬᠦ ᠤᠶᠠᠩᠭ᠎ᠠ ᠠᠶᠠᠰ ᠤᠨ ᠳᠠᠭᠤᠷᠢᠰᠬᠤᠯᠠᠩ ᠰᠡᠳᠬᠢᠯ ᠢ ᠰᠣᠭᠲᠣᠭᠠᠨ ᠬᠡᠵᠢᠶ᠎ᠡ ᠴᠦ ᠲᠡᠷᠡ ᠠᠭᠤᠳᠠᠮ ᠪᠠᠶᠢᠭᠠᠯᠢ᠂ ᠥᠨᠢᠷ ᠣᠷᠣᠨ ᠵᠦᠭ ᠢᠶᠠᠨ ᠤᠬᠠᠭ᠎ᠠ ᠪᠤᠳᠤᠯ ᠢ ᠰᠥᠬᠦᠷᠡᠭᠦᠯᠦᠨ ᠰᠥᠬᠦᠷᠡᠭᠦᠯᠬᠦ ᠮᠡᠲᠦ᠃        ᠨᠤᠲᠤᠭ ᠤᠰᠤ ᠶᠢ ᠮᠢᠨᠢ ᠳᠠᠩᠴᠤ ᠪᠤᠳᠤᠬᠳᠠᠭᠤᠯᠬᠤ᠂ ᠮᠥᠨ ᠴᠦ ᠶᠠᠪᠤᠭᠠᠳ ᠣᠴᠢᠮᠠᠷ ᠰᠠᠨᠠᠭᠳᠠᠭᠤᠯᠬᠤ ᠡᠨᠡ ᠤᠢ᠂ ᠤᠢ ᠶᠢᠨ ᠴᠠᠭᠠᠨ᠎ᠠ ᠪᠠᠶᠢᠬᠤ ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠲᠠᠢ ᠵᠠᠯᠭᠠᠯᠳᠤᠭᠰᠠᠨ ᠲᠡᠭᠰᠢ ᠲᠠᠯ᠎ᠠ᠂ ᠪᠠᠰᠠ ᠲᠡᠷᠡ ᠭᠤᠶᠢᠳᠠ ᠳᠠᠭᠤᠤ ᠨᠤᠲᠤᠭ ᠤᠰᠤ ᠶᠢᠨ ᠮᠢᠨᠢ ᠬᠥᠭᠵᠢᠯᠲᠡ ᠬᠤᠪᠢᠷᠠᠯᠲᠠ ᠭᠤᠸ᠎ᠠ ᠰᠠᠶᠢᠬᠠᠨ ᠢ ᠳᠠᠭᠤᠯᠠᠭᠠᠳ ᠪᠠᠶᠢᠳᠠᠭ ᠨᠢ ᠶᠠᠮᠠᠷ ᠰᠠᠶᠢᠬᠠᠨ ᠪᠤᠢ ᠬᠡᠮᠡᠨ ᠰᠠᠨᠠᠨ ᠪᠢ ᠡᠨᠡ ᠣᠢ ᠶᠢᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠪᠣᠯᠭᠠᠨ ᠰᠡᠳᠬᠢᠯ ᠥᠨᠳᠡᠯᠵᠡᠭᠡᠳ ᠪᠠᠶᠢᠬᠤ ᠶᠤᠮ ᠠ᠋᠃ ᠡᠰᠡᠬᠦᠯ᠎ᠡ ᠲᠡᠷᠡ ᠨᠢᠭᠡᠨ ᠥᠨᠳᠦᠷᠯᠢᠭ ᠪᠣᠯᠤᠭᠰᠠᠨ ᠥᠴᠥᠭᠡᠳᠦᠷ ᠤᠨ ᠣᠷᠣᠢ ᠳᠡᠭᠡᠷ᠎ᠡ ᠵᠣᠭᠰᠣᠭᠠᠳ ᠪᠠᠶᠢᠮᠠᠷ ᠪᠤᠯᠬᠤ ᠶᠤᠮ ᠠ᠋ ᠁ ᠤᠳᠠᠭᠠᠨ ᠵᠤᠬᠰᠤᠬᠤ ᠮᠠᠨᠢ ᠤᠴᠢᠷᠲᠠᠢ - ᠥᠴᠥᠭᠡᠳᠦᠷ ᠥᠩᠭᠡ ᠭᠡᠷᠡᠯᠲᠡᠢ ᠪᠠᠶᠢᠬᠰᠠᠨ； ᠥᠨᠥᠳᠥᠷ ᠥᠷᠨᠢᠯ ᠬᠥᠭᠵᠢᠯ ᠲᠠᠢ ᠪᠠᠶᠢᠨᠠᠮ； ᠢᠷᠡᠭᠡᠳᠦᠢ - ᠨᠡᠩ ᠭᠡᠭᠡᠨ ᠰᠠᠷᠠᠭᠤᠯ᠃  
ᠢᠷᠡᠯᠲᠡ᠄ ᠳᠤᠮᠳᠠᠳᠤ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠤᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠡ